ដោយៈ ដេប៉ូ / កំពង់ស្ពឺៈ កោះកុងៈ ក្រសួងបរិស្ថាន រួមជាមួយ​ដៃគូ​បាន​បានរៀបចំ ដំណើរ ទស្សនកិច្ច ស្វែងយល់​អំពី ផលិតផល និង​សេវាកម្ម ទេសចរណ៍ធម្មជាតិ ក្នុង​តំបន់​ការពារ ធម្មជាតិ ស្ថិតនៅក្នុង​ភូមិសាស្ត្រ ខេត្តកំពង់ស្ពឺ និង​ខេត្តកោះកុង រយៈពេល ៤ ថ្ងៃ ពោលគឺ ចាប់​ថ្ងៃទី ២៥-២៨ ខែមករា ឆ្នាំ ២០២២​។​

​គួរ​បញ្ជាក់ថា ក្នុង​ដំណើរ​ទស្សនកិច្ច​នេះ មាន​កិច្ចសហការ រវាង​ក្រសួងបរិស្ថាន ក្រសួង​អភិវឌ្ឍន៍ជនបទ ធន​គា​ពិភពលោក វិស័យ​ឯកជន សារព័ត៌មាន និង​អង្គការ​ក្រៅ រដ្ឋាភិបាល​។​

​ក្នុង​សេចក្តីជូនដំណឹង​របស់ ក្រសួងបរិស្ថាន បានឱ្យដឹងថាៈ ក្នុង​ដំណើរ​ទស្សន កិច្ច​នេះ មាន​មនុស្ស​ប្រមាណ ៥៥ នាក់ ចូលរួម ក្នុង​ដំណើរ​ជាមួយគ្នា រួមមាន ប្រតិបត្តិ​ករ ទេសចរណ៍ ឈានមុខ ២៥ នាក់ ប្រព័ន្ធ​ផ្សព្វផ្សាយ ក្នុងស្រុក ១០ នាក់ បុគ្គលិក​មកពី ក្រសួងបរិស្ថាន និង​ក្រសួង​ផ្សេងទៀត ១៥ នាក់ និង​មន្ត្រី​មកពី ធនាគារពិភពលោក ៥ នាក់​។

​សម្រាប់​គោលបំណង​សំខាន់ ក្នុង​ដំណើរ​ទស្សនកិច្ច​នេះដែរ​គឺៈ ទី​១​ផ្សព្វផ្សាយ អំពី សកម្មភាព​របស់​គម្រោង “​និរន្ត​ភាព​តំបន់​ទេសភាព និង​ទេសចរណ៍ធម្មជាតិ កម្ពុជា​” ទី​២ ស្វែងយល់​ពី​គុណភាព សេវាកម្ម​ទេសចរណ៍ធម្មជាតិ ការអភិរក្ស ជីវៈចម្រុះ និង​ជីវភាព រស់នៅ របស់​ប្រជាជន​សហគមន៍ តំបន់​ទេសចរណ៍ ធម្មជាតិ​។​

​ក្រសួងបរិស្ថាន បានឱ្យដឹង​ដែរ​ថាៈ ក្នុង​ដំណើរ​ទស្សនកិច្ច​សិក្សា (Familiarization Trip) ដែល​រៀបចំឡើង ស្រប​ជាមួយគ្នា​នឹង​គម្រោង ទេសភាព​និរន្តរភាព និង​អេកូ ទេសចរណ៍​កម្ពុជា មាន​គោលបំណង ផ្តល់ជូន​ដល់​អន្តរការី ដែល​រួមមាន អ្នក​កត់ត្រា ធ្វើដំណើរ អ្នកសារព័ត៌មាន និង​ប្រតិបត្តិ​ករ ទេសចរណ៍ ក្នុង​វិស័យ ឯកជន ដើម្បី​ទទួលបាន បទពិសោធន៍ ផ្សងព្រេង​ដោយផ្ទាល់​នៅតាម​គោល ដៅ​ទេសចរណ៍ធម្មជាតិ ឈានមុខ​គេ និង​កន្លែង​ទាក់ទាញ​ទេសចរណ៍​ផ្សេងទៀត ដែល​រកឃើញ​មាន នៅតាម​តំបន់​ធម្មជាតិ ជួរ​ក្រវាញ​។​

​ប្រភព​ដដែល បានបញ្ជាក់​បន្ថែមថាៈ គោលបំណង​ជាក់លាក់​នៃ​ទស្សនកិច្ច សិក្សា​៖
• ដើម្បី​បង្ហាញ​ពី​តំបន់​ល្អ​ដាច់​គេ នៃ​តំបន់​ក្រវាញ​ទៅកាន់​ប្រព័ន្ធ​ផ្សព្វផ្សាយ ដែលមាន មូលដ្ឋាន នៅក្នុង​ស្រុក​។​
• ដើម្បី​ចែករំលែក​ចំណុច​ពិសេស នៃ​តំបន់​ក្រវាញ ជាមួយ​ប្រតិបត្តិ​ករ ទេសចរណ៍​ក្នុងស្រុក និង​អន្តរជាតិ និង DMC ដែល​ឈានមុខ​គេ​។​
• ដើម្បី​ណែនាំ​ពី​ស្រ​ឡាយ​ផលិតផល ដែល​ផ្តល់ជូន នៅក្នុង​តំបន់​ក្រវាញ រួមទាំង​អ្វីៗ ដែលមាន​ក្នុង​កម្រិត ចាប់ពី CBET រហូតដល់​កន្លែង​ស្នាក់នៅ កម្រិត​ខ្ពស់ Eco-lodge ។
• ដើម្បី​បង្ហាញ​សក្តានុពល សម្រាប់​ការវិនិយោគ អេកូ​ទេសចរណ៍​ប្រកបដោយ និរន្តរភាព នៅក្នុង​តំបន់ តាមរយៈ​ការផ្សព្វផ្សាយ ឬ​ការចាប់អារម្មណ៍​ពី​ប្រតិបត្តិ​ករ ទេសចរណ៍​។​
• ដើម្បី​បង្ហាញ​ពី​សកម្មភាព​សហគមន៍ និង​ការចូលរួម​របស់​សហ​គម​ន៍​នៅ​តំបន់ ក្រវាញ រួមមាន របៀប​រស់នៅ និង​ជីវភាព​រស់នៅក្នុង​តំបន់​។​
• ដើម្បី​ណែនាំ​សត្វព្រៃ​ក្នុង​តំបន់ រួមទាំង​ការ​ទស្សនា​ទៅកាន់​ស្ថានីយ៍​ដោះ លែង​សត្វព្រៃ នៅ​ជី​ផាត់ និង​ជំរុំ​បោះតង់ ជួរ​ភ្នំក្រវាញ​៕/V​-PC