​ប្រែ​សម្រួល : កញ្ញា​ដា​លី​ស (​ដេលី​មែ​ល​) ៖ កែវយឹត​អវកាស​ដ៏​ធំ​បំផុត​និង​មាន​ឥទ្ធិពល​បំផុត​របស់​ពិភពលោក​បាន​ទៅដល់​ទីតាំង​សង្កេត​របស់​វា​ស្ថិត​នៅ​ចម្ងាយ ១,៦​លាន​គីឡូម៉ែត្រ​ពី​ផែនដី​កាលពី​ថ្ងៃ​ចន្ទ​ទី​២៤​មករា ពោលគឺ​មួយខែ​គត់​បន្ទាប់​ពី​វា​ត្រូវ​បាន​បាញ់​បង្ហោះ​ដើម្បី​ស្រាវជ្រាវ​ប្រភពដើម​នៃ​ចក្រ​វាល​។​

​តាម​ការបញ្ជា កែវ​យឺត​អវកាស James Webb បាន​បាញ់​យាន​រ៉ុក្កែត​របស់​វា​អស់​រយៈពេល​ជិត ៥ នាទី​ដើម្បី​ចូលទៅ​ក្នុង​គន្លង​ជុំវិញ​ព្រះអាទិត្យ នៅ​ទីតាំង​ដែល​បាន​កំណត់​ហើយ​អង្គការ​ណា​សា​​បានបញ្ជាក់​ថា ប្រតិបត្តិការ​បាន​ប្រព្រឹត្ត​ទៅ​រលូន​តាម​ការគ្រោង​ទុក​។​

​កញ្ចក់​នៅលើ​កែវយឹត​សង្កេត​តម្លៃ ១០ ពាន់​លាន​ដុល្លារ​នេះ​នៅ​ត្រូវ​តម្រឹម​យ៉ាង​ល្អិតល្អន់​សិន ឧបករណ៍​ចាប់​សញ្ញា​អ៊ី​ន​ហ្វ្រា​រ៉េដ​គឺ​ត្រូវ​ត្រជាក់​គ្រប់គ្រាន់ និង​ឧបករណ៍​វិទ្យាសាស្ត្រ​គឺ​ត្រូវ​ក្រិត​តាម​ខ្នាត មុន​ពេល​ការសង្កេត​អាច​ចាប់ផ្តើមបាន​នៅ​ខែ​មិថុនា​ខាងមុខ​។​

​ប៉ុន្តែ​អ្នក​គ្រប់គ្រង​ជើងហោះហើរ​នៅ​ទីក្រុង​បាល់​ទី​ម័រ (Baltimore) សប្បាយ​ចិត្ត​ជា​ខ្លាំង​បន្ទាប់ពី​ទទួលបាន​ជោគជ័យ​មួយទៀត​។​

​លោក ប៊ី​ល នែ​ល​សុន (Bill Nelson)​ជា​អ្នកគ្រប់គ្រង​ណា​សាបាន​និយាយ​នៅក្នុង​សេចក្តីថ្លែងការណ៍​មួយ​ថា “​យើង​កាន់តែ​ខិត​ទៅជិត​មួយ​ជំហាន​ទៀត​ក្នុង​ការស្វែងរក​អាថ៌កំបាំង​នៃ​ចក្រ​វាល​។ ហើយ​ខ្ញុំ​មិន​អាច​ទ្រាំ​រង់ចាំ​មើល​ទិដ្ឋភាព​ថ្មី​ដំបូង​របស់​កែវយឹត Webb អំពី​ចក្រវាល​នៅ​រដូវក្តៅ​នេះបានទេ​!”​។​

​កែវយឹត​នេះ​នឹង​អាច​ឱ្យ​ពួក​តារាវិទូ​ពិនិត្យមើល​ពេលវេលា​ត្រឡប់​ថយក្រោយ​បាន​ឆ្ងាយ​ជាង​ពេល​ណាៗ​ទាំងអស់ គឺ​ត្រឡប់​ទៅរក​ពេលដែល​ផ្កាយ និង​កាឡាក់ស៊ី​ដំបូង​បាន​កកើតឡើង​កាលពី ១៣,៧ ពាន់​លាន​ឆ្នាំមុន​។ វា​មាន​រយៈពេល​តែ ១០០ លាន​ឆ្នាំ​ប៉ុណ្ណោះ​ពី​បន្ទុះ​ប៊ីក​ប៊ែង (Big Bang) នៅពេល​ដែល​ចក្រវាល​ត្រូវបាន​បង្កើតឡើង​៕

កែវ​យឺត​អវកាស James Webb ទៅដល់​គោលដៅ​របស់​វា​នៅ​ចម្ងាយ ១,៦ លាន​គីឡូម៉ែត្រ​ពី​ផែនដី​