​ប្រែ​សម្រួល : កញ្ញា​ដា​លី​ស (​ដេលី​មែ​ល​) ៖ តម្លៃ​រូបិយប័ណ្ណ​អេឡិចត្រូនិ​ចបាន​ធ្លាក់ចុះ​បន្ទាប់​ពី​ប្រទេស​រុស្ស៊ី​បាន​ស្នើ​ឱ្យ​ហាមឃាត់​ការប្រើប្រាស់ និង​ការជីក​យក​រ៉ែ​រូបិយប័ណ្ណ​អេឡិចត្រូនិច​(mining)​ខណៈ​អ្នកជួញដូរ​មានការ​ព្រួយ​បារ​ម្មណ៍​ចំពោះ​ផលប៉ះពាល់​ដែល​នឹង​កើតឡើង​ចំពោះ​សាច់ប្រាក់​ងាយស្រួល​របស់​ទីផ្សារ​ពី​ការកាត់បន្ថយ​បរិមាណ និង​ការដំឡើង​អត្រា​ការប្រាក់​។​

​លុយ Bitcoin​បាន​ធ្លាក់​ក្រោម​កម្រិត ៤០.០០០ ដុល្លារ​មក​នៅត្រឹម ៣៥.២២៦ ដុល្លារ​កាលពី​ថ្ងៃ​ចន្ទ​ទី​២៤​មករា​នៅ​ម៉ោង ១ រសៀល ខណៈ​លុយ Ethereum បាន​ធ្លាក់​ចុះ​ក្រោម ៣.០០០​ដុល្លារ​មក​​នៅត្រឹម ២.៤៤៦ ដុល្លារ​។​

​តម្លៃ​រូបិយប័ណ្ណ​អេឡិចត្រូនិ​ចបាន​ស្ទុះ​ងើប​ឡើងវិញ​បន្តិច​កាលពី​ថ្ងៃ​ចន្ទ ប៉ុន្តែ​ទីផ្សារ​សរុប​នៅតែ​ទាប​ជាង ២ ទ្រី​លាន​ដុល្លារ គឺ​នៅ​ត្រឹម ១,៧ ទ្រី​លាន​ដុល្លារ​។​

​យោង​តាម​វេបសាយ Bloomberg បានឱ្យដឹងថា មហាសេដ្ឋី​បច្ចេកវិជ្ជា​កំពូល​ទាំង ៥ របស់​ពិភពលោក​បាន​ខាតបង់​ទ្រព្យសម្បត្តិ​សរុប​ចំនួន ៦៧​ពាន់​លាន​ដុល្លារ​ដោយសារ​តែ​តម្លៃ​ធ្លាក់ចុះ​នេះ​​កាលពី​សប្តាហ៍​មុន​។​

​ទីផ្សារ​រូបិយប័ណ្ណ​អេឡិចត្រូនិច​សកល​បាន​កំពុងមើល​ឃើញ​ការសម្រុកល​ក់​ចេញ​យ៉ាង​ខ្លាំងក្លា​ចាប់តាំងពី​ថ្ងៃទី ២១ ខែ​មករា​បន្ទាប់ពី​ធនាគារ​កណ្តាល​រុស្ស៊ី​បានប្រកាស​ការហាមឃាត់​លើ​ការប្រើប្រាស់​​និង​ការជីក​យក​រ៉ែ​រូបិយប័ណ្ណ​អេឡិចត្រូនិច​ទាំងអស់ ដោយ​និយាយថា​ពួក​វា​គឺ​ជា​ទ្រព្យសម្បត្តិ​ប៉ាន់ស្មាន​ដែល​មាន​សក្តានុពល​កើន​តម្លៃ​ខ្ពស់កប់ពពក​ដែល​អាច​គំរាមកំហែង​ដល់​សន្តិសុខ​ហិរញ្ញវត្ថុ​​របស់​ប្រទេស​។​

​នៅពេល​ដែល​ការ​ហាមប្រាម​នេះ​ត្រូវបាន​ដាក់ចេញ វិនិយោគិន​នៃ​ស្ថាប័ន​ហិរញ្ញវត្ថុ​រុស្ស៊ី​នឹង​ត្រូវ​បាន​រារាំង​ពី​ការកាន់កាប់​ទ្រព្យសម្បត្តិ​ណាមួយ​ដែល​ទាក់ទង​នឹង​ប្រតិបត្តិការ​ពាក់ព័ន្ធ​នឹង​លុយ​អេឡិចត្រូនិច​។ យន្តការ​ដើម្បី​ទប់ស្កាត់​និង​រកឃើញ​ប្រតិបត្តិ​ការជួញដូរ​ណាមួយ​ដែល​ទាក់ទង​នឹង​រូបិយប័ណ្ណ​អេឡិចត្រូនិចក៏​នឹងត្រូ​វ​បាន​បង្កើត​ឡើង​និង​ដាក់ឱ្យ​ដំណើរការ​ផងដែរ​។​

​រុស្ស៊ី​គឺជា​ប្រទេស​មួយ​ក្នុងចំណោម​ប្រទេស​ដែល​មាន​បរិមាណ​ដ៏​ធំ​បំផុត​នៃ​ប្រតិបត្តិ​ការ​ទាក់ទង​នឹង​លុយ​អេ​ឡិ​ច​ត្រូនិច ជាមួយ​នឹង​ទំហំ​ពាណិជ្ជកម្ម​ជា​មធ្យម​មាន​រហូត​ដល់​ទៅ ៥​ពាន់​លាន​ដុល្លារ​ក្នុង​មួយឆ្នាំ​។​

​រុស្ស៊ី​ក៏​ជា​ប្រភព​រុករក​រ៉ែ Bitcoin ធំជាងគេ​ទី ៣ នៅលើ​ពិភពលោក​ផង​ដែរ​បន្ទាប់​ពី​សហរដ្ឋអាម៉េរិក​និង​កា​ហ្សាក់​ស្ថាន​។​

​ធនាគារ​កណ្តាល​រុស្ស៊ី​បាន​និយាយថា ការជីក​យក​រ៉ែ Bitcoin ប្រើប្រាស់​ថាមពល​យ៉ាងច្រើន​ដែល​បានមក​ពី​ឥន្ធនៈហ្វូស៊ីល ដែល​បង្ក​គ្រោះថ្នាក់​ដល់​បរិស្ថាន​៕

រុស្ស៊ី​ស្នើឱ្យ​ហាមឃាត់​ការប្រើប្រាស់ និង​ការជីក​យក​រ៉ែ​រូបិយប័ណ្ណ​អេឡិចត្រូនិច​ដូចជា Bitcoin និង Ethereum