ដោយៈ គង់​ហេង​/ កំពង់ចាមៈ សិស្ស​នុ​សិស្ស ជា​បេក្ខជន​ប្រឡង​ជាប់​ទទួលបាន​និទ្ទេស «A»(​អេ​) ប្រមាណ ១.៧៥៣ នាក់ នៃ​បេក្ខជន​ជាប់​សញ្ញាបត្រ​មធ្យមសិក្សា​ទុតិយភូមិ សរុប ៧២.០១៦ នាក់​ទូទាំងប្រទេស ប្រឡង​នា​ចុងខែ​ធ្នូ ឆ្នាំ​២០២១ កន្លងទៅ នឹងមាន សំណាង​ជួប​ជាមួយ​សម្តេច​តេ​ជោ ហ៊ុន សែន នាយករដ្ឋមន្ត្រី ក្នុងពេល​ឆាប់ៗ ខាងមុខនេះ​។​

​នេះ​បើតាម​ការប្រកាស​ឱ្យដឹង ជា​សាធារណៈ នៅក្នុង​សាលាខេត្ត នា​ថ្ងៃទី ២៥ មករា របស់លោក អ៊ុន ចាន់​ដា អភិបាលខេត្ត​កំពង់ចាម នៅក្នុង​ពិធី​សំណេះសំណាល និង​ឧបត្ថម្ភ សម្ភារ ថវិកា ដល់​សិស្សានុសិស្ស ចំនួន ៣២ នាក់ និង​អាណាព្យាបាល នៅ​ក្រុង​កំពង់ចាម ដែល​ទទួលបាន​និទ្ទេស A ការប្រឡង​មធ្យមសិក្សា​ទុតិយភូមិ ឆ្នាំ​សិក្សា ២០២០-២០២១ កន្លងមកនេះ​។​

​លោក​អភិបាលខេត្ត​កំពង់ចាម បាន​មានប្រសាសន៍ថាៈ ចាត់ទុកជា​ប្រវត្តិសាស្ត្រ​ហើយ ដែល​សិស្សានុសិស្ស ប្រឡង​សញ្ញាបត្រ​ទុតិយភូមិ ឆ្នាំ​សិក្សា​២០២០-២០២១ ទទួលបាន និទ្ទេស A នៅ​ទូទាំង​ខេត្ត រហូតដល់​ចំនួន ១១៨ នាក់ ពិសេស​នៅ​ក្រុង​កំពង់ចាម បាន​ច្រើន ជាង​បណ្តា​ស្រុក គឺ​បាន​ចំនួន ៣២ នាក់​។ ប៉ុន្តែ​លទ្ធផល​ទូទាំងប្រទេស ខេត្តកំពង់ចាម ជាប់​ចំណាត់ថ្នាក់​លេខ ៥ ខណៈ​លេខ ១ បាន​ទៅលើ​រាជធានី​ភ្នំពេញ​។​

​លោក​បាន​បន្តថាៈ ជាពិសេស ក្មួយៗ ដែល​ទទួលបាន​និទ្ទេស A នៅ​ទូទាំងប្រទេស សរុប​ចំនួន ១.៧៥៣ នាក់ នឹងមាន​សំណាង បាន​ជួប​ជាមួយ​សម្តេច​តេ​ជោ ហ៊ុន សែន នាយករដ្ឋមន្ត្រី នៃ​ព្រះរាជាណាចក្រ​កម្ពុជា គឺ​សម្តេច លោក​នឹងដាក់​កម្មវិធី​ជួប​សំណេះ សំ​ណា​ល ជាមួយ​ក្មួយៗ ដែល​ប្រឡង​សញ្ញាបត្រ​ទុតិយភូមិ ទទួលបាន​និទ្ទេស A ទាំងអស់ ដើម្បី​លើកទឹកចិត្ត ដែល​បានទទួល​នូវ ចំណាត់ថ្នាក់​ល្អ ជា​សិស្ស​ឆ្នើម​ប្រចាំខេត្ត និង​ជា​សិស្ស ឆ្នើម​ប្រចាំ​សាលា​។​

​គួរ​បញ្ជាក់ថា លទ្ធផល​ប្រឡង​សញ្ញាបត្រ​មធ្យមសិក្សា​ទុតិយភូមិ ថ្ងៃទី ២៧ ខែធ្នូ ឆ្នាំ​២០២១ កន្លងទៅ នៅ​ទូទាំងប្រទេស បេក្ខជន​ដែល​ប្រឡង​ជាប់ មាន​ចំនួន ៧២.០១៦ នាក់ ដោយ មាន​បេក្ខជន ដែល​ដណ្តើមបាន​និទ្ទេស A ចំនួន ១.៧៥៣ នាក់ គឺ​ក្នុងនោះ ខេត្តកំពង់ចាម បេក្ខជន​ទទួលបាន​និទ្ទេស A ចំនួន ១១៨ នាក់ ស្រី​ចំនួន ៧៥ នាក់ នៃ​បេក្ខជន​ដែល​ជាប់ សរុប​ចំនួន ៤.៣៣៣ នាក់ ស្រី​ចំនួន ២.៦១៥ នាក់​៕/V​