​ប្រែ​សម្រួល : កញ្ញា​ដា​លី​ស (​ដេលី​មែ​ល​) ៖ ប៉ូលិស​បាន​និយាយ​កាលពី​ថ្ងៃ​អង្គារ​ទី​២៥​មករា​ថា មនុស្ស​យ៉ាង​ហោច​ណាស់ ១៨​នាក់​ត្រូវបាន​សម្លាប់​ក្នុងអំឡុងពេល​ការប៉ះទង្គិច​គ្នា​រវាង​មនុស្ស​ពីរ​ក្រុម​​នៅ​ក្លិប​រាត្រី​មួយ​នៅ​ទីក្រុង​សូ​រ៉ុង (Sorong)​ក្នុង​ខេត្ត​ប៉ាពួ​ខាងលិច ប្រទេស​ឥណ្ឌូនេស៊ី ដោយ​ភាគច្រើន​បាន​ស្លាប់​បន្ទាប់ពី​ក្លិប​នោះបាន​ឆេះ​។​

​មេ​ប៉ូលិស​ក្រុង​បាន​និយាយ​នៅក្នុង​សេចក្តីថ្លែងការណ៍​មួយ​ថា “​ការ​ប៉ះទង្គិច​គ្នា​បាន​ផ្ទុះឡើង​កាល​ពី​យប់មិញ​ថ្ងៃ​ចន្ទ​ទី​២៤​មករា​នៅ​ម៉ោង ១១ យប់​។​វា​គឺជា​ជម្លោះ​ដែល​បានអូសបន្លាយ​​ពី​ការប៉ះទង្គិច​គ្នា​កាលពី​ថ្ងៃ​សៅរ៍​”​។​

​ក្រុមមន្ត្រី​បាន​និយាយថា ជនរងគ្រោះ​ម្នាក់​ត្រូវ​បាន​ចាក់​ស្លាប់ និង ១៧ នាក់​ទៀត​បាន​ស្លាប់​ក្នុង​អគ្គិភ័យ​នៅ​ក្លិប​រាត្រី Double O​។​

​ប្រធាន​ផ្នែក​សុខភាព​របស់​ប៉ូលិស​ក្រុង​សូ​រ៉ុង បាន​និយាយថា “​យើង​បាន​រកឃើញ​សាកសព​ចំនួន ១៧ នាក់​នៅក្នុង​ក្លិប Double O ។ ពួកគេ​ទាំងអស់​នោះ​ត្រូវបាន​រកឃើញ​នៅ​ជាន់​ទី​ពីរ​។ យើង​បាន​ជម្លៀស​សាកសព​ទៅកាន់​មន្ទីរពេទ្យ Selebe Solu”​។​

​ប៉ូលិស​បាន​និយាយថា ការ​ប៉ះទង្គិច​គ្នា​នេះ​មិន​ពាក់ព័ន្ធ​នឹង​អ្នកស្រុក​នៅ​តំបន់​ដាច់ស្រយាល​នៃ​ខេត្ត​ប៉ាពួ​ខាងលិច ជាទី​ដែល​មាន​ការបះបោរ​រយៈ​ពេល​វែង​និង​កម្រិត​ទាប​នោះទេ​។​

​ពួកគេ​កំពុង​ស៊ើបអង្កេត​រក​មូលហេតុ​នៃ​អគ្គីភ័យ​ដែល​ឆាបឆេះ​អគារ​ដ៏​ធំ​ពណ៌​ក្រហម​និង​ស​នេះ​៕

​សាកសព​ភាគច្រើន​ត្រូវបាន​រកឃើញ​នៅ​ជាន់​ទី​២​នៃ​ក្លិប Double O