ប្រែ​សម្រួល : កញ្ញា​ដា​លី​ស (​ដេលី​មែ​ល​) ៖ កំពូល​តារាចម្រៀង​ប៉ុប​ដ៏​ល្បី​លោក អែល​តុ​ន ច​ន (Elton John)​កាលពី​ថ្ងៃ​អង្គារ​ទី​២៥​មករា​បាន​ពន្យារពេល​ការប្រគុំ​តន្ត្រី​ចំនួន​ពីរ​នៅ​ទីក្រុង​ដាល់​ឡាស (Dallas) បន្ទាប់ពី​បាន​ធ្វើតេស្តិ៍​វិជ្ជមាន​កូវី​ដ​១៩​។​

​តន្ត្រីករ​ជនជាតិ​អង់គ្លេស​អាយុ ៧៤ ឆ្នាំ​រូប​នេះ​បាន​និយាយ​នៅក្នុង​សេចក្តីថ្លែងការណ៍​នៅលើ​បណ្តាញ​សង្គម​ថា “​វា​តែងតែ​ជា​ការខកចិត្ត​ដ៏​ធំ​ក្នុង​ការលើក​ពេល​កម្មវិធី​ហើយ​ខ្ញុំ​ពិតជា​សោកស្តាយ​​ចំពោះ​អ្នក​ដែល​អាក់អន់ចិត្ត​ក្នុង​រឿងនេះ ប៉ុន្តែ​ខ្ញុំ​ចង់​រក្សា​ខ្លួន​ខ្ញុំ និង​ក្រុមការងារ​របស់​ខ្ញុំ​ឱ្យមាន​សុវត្ថិភាព​។ សំណាងល្អ ខ្ញុំ​បាន​ចាក់​ថ្នាំ​បង្ការ​ពេញលេញ​និង​បាន​ចាក់ដូស​ជំរុញ ហើយ​រោគសញ្ញា​របស់ខ្ញុំ​គឺ​ស្រាល​ទេ​”​។​

​ការប្រគុំ​តន្ត្រី​ដែល​ជា​ផ្នែក​មួយ​នៃ​ដំណើរ​ទេសចរណ៍​ឈ្មោះថា Farewell Yellow Brick Road របស់​លោក​ច​ន​គ្រោង​ធ្វើឡើង​នៅ​ថ្ងៃទី ២៥ ខែ​មករា និង​ថ្ងៃទី ២៦ ខែ​មករា​។ ​ទាំង​ច​ន​និង​មជ្ឈមណ្ឌល​អាកាសចរណ៍​អាម៉េរិក (American Airlines Center)​ជា​កន្លែង​ដែល​កម្មវិធី​នឹង​ប្រព្រឹត្តទៅ បាន​និយាយថា ការសម្តែង​នឹងត្រូវ​កំណត់​ពេល​ឡើង​វិញ​ហើយ​អ្នកគាំទ្រ​​គួរតែ​រក្សាទុក​សំបុត្រ​របស់​ពួកគេ​។

​លោក​ច​ន​បាន​និយាយថា​គាត់​រំពឹង​មាន​សុខភាព​ល្អ​គ្រប់គ្រាន់​ដើម្បី​សម្តែង​ក្នុង​កម្មវិធី​របស់​គាត់​នៅ​ថ្ងៃទី ២៩ ខែ​មករា​នៅ​ទីក្រុង​លី​តថល​រ៉ុក (Little Rock) រដ្ឋ​អា​កាន់​សាស​។​

​ដំណើរ​ប្រគុំ​តន្ត្រី ដែល​គេ​រំពឹង​ថា​ជា​ការសម្តែង​ចុងក្រោយ​របស់​លោក​អែល​តុ​ន ច​ន បាន​ឈាន​ចូលដល់​ដំណាក់កាល​លុបចោល​និង​ពន្យារពេល​ក្នុងសម័យ​ជំងឺ​រាតត្បាត​ដូច​ព្រឹត្តិការណ៍​សិល្បៈ​សម្តែង​​ជាច្រើន​ទៀត​ផង​ដែរ​។​

​ថ្មីៗ​នេះ តារាចម្រៀង​ប៉ុប​រូប​នេះ​ក៏​បាន​វះកាត់​ត្រគាក​ផងដែរ ដែល​បង្ខំ​ឱ្យ​គាត់​លើក​កាលបរិច្ឆេទ​សម្តែង​ជាច្រើន​។​

​កាលពី​ឆ្នាំមុន លោក​ច​ន​បាន​ចេញ​អាល់​ប៊ុម​មួយ​ដែល​មានចំណ​ង​ជើងថា The Lockdown Sessions​ដែល​ថត​ទាំងស្រុង​នៅក្រោម​ការ​រឹតបន្តឹង​ទប់ស្កាត់​កូវី​ដ​១៩៕

​លោក​អែល​តុ​ន ច​ន ពន្យារ​ពេល​ការសម្តែង​តន្ត្រី​ចំនួន​២​ដោយសារ​ឆ្លងកូវី​ដ​១៩