ដោយ​: ស​រិ​ទ្ធ​/​ប៉ៃលិន​: ជន​មិន​ស្គាល់​អត្តសញ្ញាណ​ម្នាក់ បាន​ទាក់ទង​ផ្ញើ​ប្រអប់​មួយ​តាមរយៈ​ក្រុមហ៊ុន J&T ។ ដោយមាន​ការសង្ស័យ ខាង​ក្រុមហ៊ុន ក៏​បើក​មើល ស្រាប់តែ​ប្រទះឃើញ​គ្រាប់បែក​កែច្នៃ នៅ​ខាងក្នុង ។ ហេតុការណ៍​នេះ បាន​កើតឡើង​កាលពី​វេលា​ម៉ោងជាង ៧​យប់ ថ្ងៃទី ២៥ ខែ មករា ឆ្នាំ ២០២២ ម្សិលមិញ​នេះ នៅ​ចំណុច​ទីតាំង​ក្រុមហ៊ុន J&T ស្ថិតក្នុង​ភូមិ​ប៉ា​ហ៊ី​ត្បូង សង្កាត់​ប៉ៃលិន ក្រុងប៉ៃលិន ខេត្ត​ប៉ៃលិន ។​

​បើតាម​បុគ្គលិក​ក្រុមហ៊ុន J&T បាន​ប្រាប់​សមត្ថកិច្ច​ថា នៅវេលា​ម៉ោង ៦:២០​នាទី​យប់ ថ្ងៃទី​២៥ ខែមករា ឆ្នាំ​២០២២ មាន​ជន​មិន​ស្គាល់​អត្តសញ្ញាណ បាន​ទូរស័ព្ទ​មក​ក្រុមហ៊ុន J&T តាមរយៈ​ទូរស័ព្ទ​លេខ ០១១ ២១៧ ០៤៤ ហើយ​ប្រាប់ថា ឱ្យទៅ​យក​ឥ​វ៉ាន់ នៅ​ចំណុច​តារាង​បាល់ ខាងកើត​រូបសំណាក​លោកយាយ​យ៉ា​ត ស្ថិតក្នុង​ភូមិ​អូរ​តា​ប្រា​ង សង្កាត់​ប៉ៃលិន ក្រុងប៉ៃលិន ខេត្ត​ប៉ៃលិន​។ លុះដល់​ម៉ោង ៦:៥៤​នាទី​យប់ បុគ្គលិក​ក្រុមហ៊ុន​បាន​ទៅយក​អីវ៉ាន់​ពី​ជន​មិន​ស្គាល់​អត្តសញ្ញាណ នៅ​ចំណុច​ខាងលើ ជន​នោះបាន​ប្រាប់​ទៅខាង​ក្រុមហ៊ុន​មិនឱ្យ​បើក​មើល​ឥ​វ៉ាន់​នោះទេ ក្រោយពេល​យកមក​ដល់​ក្រុមហ៊ុន ខាង​ក្រុមហ៊ុន​សង្ស័យ ដោយមាន​ការ​វិច​ខ្ចប់​មិន​ត្រឹមត្រូវ ក៏បាន​បើក​មើល ស្រាប់​តែមាន​អណ្តាតភ្លើង​ឆេះ​ឡើង ប៉ុន្តែ​ត្រូវបាន​បុគ្គលិក​យក​ទឹក​ចាក់​ពន្លត់​ទាន់ ។​

​ប្រភព​ដដែល​បាន​បញ្ជាក់ថា ឥ​វ៉ាន់​នេះ គឺមាន​គោលដៅ​ផ្ញើ​ទៅ​សង្កាត់​ចម្ការ​សំរោង ក្រុង​បាត់ដំបង ខេត្តបាត់ដំបង អ្នកទទួល​មាន​លេខ​ទូរ​សព្ទ ០៨៦ ២២៤ ៤៤០/ ០១២ ៤០៥ ៧១៦ ។​​ក្រោយ​កើតហេតុ​មន្ត្រី​ជំនាញ CMAC បាន​ចុះទៅ​ធ្វើការ​ត្រួតពិនិត្យ និង​បាន​បញ្ជាក់ថា ឥ​វ៉ាន់​នេះ ជា​ប្រភេទ​គ្រាប់បែក​កែច្នៃ ដែលមាន​កម្លាំង​ផ្ទុះ ស្មើនឹង​កម្លាំង​ផ្ទុះ​របស់​មីនតោន​ចំនួន​មួយ​គ្រាប់ ។​

​បច្ចុប្បន្ន កម្លាំង​ផែន​ការងារ​សន្តិសុខ កំពុងធ្វើការ​ស៊ើបអង្កេត​បន្ត​លើ​ករណីនេះ​៕​