ឡាន​ហោះ​របស់​ស្លូ​វ៉ាគី​ទទួលបាន​វិញ្ញាបនប័ត្រ​ទទួល​ស្គាល់​ជា​ផ្លូវការ​(វីដេអូ)

ប្រែ​សម្រួល : កញ្ញា​ដា​លី​ស (​ស្ត្រេត​ថែមស៍​) ៖ អាជ្ញាធរ​ដឹកជញ្ជូនរ​បស់​ស្លូ​វ៉ាគី​កាលពី​ថ្ងៃ​អង្គារ​ទី​២៥ មករា​បាន​និយាយថា ខ្លួន​បាន​ចេញ​វិញ្ញាបនបត្រ​នៃ​ភាព​ស័ក្តិសម​សម្រាប់​ការហោះហើរ​ដល់​ឡាន​ហោះ​ម៉ាក AirCar ដែល​ជា​ជំហាន​ដំបូង​ឆ្ពោះទៅរក​ការផលិត​ឡាន​ហោះ​នេះ​សម្រាប់​លក់​លើ​ទីផ្សារ​។​

​លោក ស្តេ​ហ្វាន ក្លេន (Stefan Klein)​ជា​ស្ថាបនិក​និង​ជា​នាយក​ប្រតិបត្តិ​នៃ​ក្រុមហ៊ុន KleinVision ដែលជា​ក្រុមហ៊ុន​រចនា​និង​ផលិត​គំរូ​នៃ​រថយន្ត​ប្រើ​យន្តហោះ​ម៉ាស៊ីន​ភ្លោះ បាន​និយាយថា “​ការចេញ​វិញ្ញាបនប័ត្រ​ដល់​ឡាន​ហោះ AirCar បាន​បើកទ្វារ​សម្រាប់​ការផលិត​ទ្រង់ទ្រាយ​ធំ​នូវ​ឡាន​ហោះ​ដែល​មាន​ប្រសិទ្ធភាព​ខ្លាំង​មួយ​នេះ​”​។​

​លោក​ក្លេន​បាន​និយាយ​នៅក្នុង​សេចក្តីប្រកាស​ព័ត៌មាន​មួយ​ថា “​វា​គឺជា​ការបញ្ជាក់​ជា​ផ្លូវការ និង​ចុងក្រោយ​នៃ​សមត្ថភាព​របស់​យើង​ក្នុង​ការផ្លាស់ប្តូរ​ការធ្វើ​ដំណើរ​ចម្ងាយ​មធ្យម​ជា​រៀងរហូត​”​។​

​ឡាន​ហោះ AirCar បានបញ្ចប់​ការហោះហើរ​ឆ្លង​ទីក្រុង​លើកដំបូង​របស់​ខ្លួន​នៅ​ខែមិថុនា ឆ្នាំ ២០២១​។​

​រថយន្ត​នេះ​ត្រូវបាន​បំពាក់​ដោយ​ម៉ាស៊ីន BMW ចំណុះ ១,៦ លីត្រ ហើយ​ត្រូវការ​ផ្លូវ​រត់​ត្រឹមតែ ៣០០ ម៉ែត្រ​ប៉ុណ្ណោះ​ដើម្បី​ហោះ​ឡើង​។​

​វា​មាន​ល្បឿន​ហោះហើរ​រហូតដល់ ១៧០ គីឡូម៉ែត្រ​ក្នុង​មួយ​ម៉ោង​និង​អាច​ហោះ​បាន​ចម្ងាយ ១.០០០ គីឡូម៉ែត្រ​។​

​ដំណើរការ​ប្រែកាយ​ពី​ឡាន​ទៅ​ជា​យន្តហោះ​គឺ​ប្រើ​ពេល​មិន​ដល់​៣​នាទី​នោះ​ឡើយ​។ អ្វីៗ​គឺ​ស្វ័យប្រវត្តិ​ទាំងអស់ ដូច្នេះ​គ្រាន់តែ​ចុច​ប៊ូ​តុង​តែមួយ​វា​នឹង​ធ្វើ​អ្វីៗ​ដោយ​ខ្លួនឯង​៕

​ឡាន​ហោះ AirCar បានបញ្ចប់​ការហោះហើរ​ឆ្លង​ទីក្រុង​លើកដំបូង​របស់​ខ្លួន​នៅ​ខែមិថុនា ឆ្នាំ ២០២១