ប្រែ​សម្រួលៈ​បំណង​(BLOOMBERG,ST)៖​ប្រធានាធិបតី​ចិន​លោក​ស៊ី ជីន​ភីង បាន​ជួបប្រជុំ​ជាមួយ​ប្រធាន​គណៈកម្មាធិការ​អូ​ឡាំ​ពិ​ច​អន្តរជាតិ​(IOC)​លោក ថូ​ម៉ាស បាច​(Thomas Bach)​ដោយ​​ផ្ទាល់​នៅ​ទីក្រុង​ប៉េកាំង​កាលពី​ថ្ងៃ​អង្គារ​ទី​២៥​មករា ដែល​វា​ទំនងជា​ជំនួប​ផ្ទាល់​លើកដំបូង​របស់​លោក​ជាមួយ​ឥស្សរជន​បរទេស​ចាប់​តាំងពី​ពេល​កើត​មានកូ​វីដ​១៩​មក​។​

​ជំនួប​ចុងក្រោយ​ដែល​គេ​ដឹង​របស់​លោក​ស៊ី​ជាមួយ​មេដឹកនាំ​បរទេស​ម្នាក់​បាន​កើតឡើង​កាលពី​ខែ​មីនា​ឆ្នាំ​២០២០ នៅ​ពេល​លោក​ទទួល​ជួប​ប្រធានាធិបតី​ប៉ា​គី​ស្ថាន អា​រី​ហ្វ អាល់​វី​(Arif Alvi )​នៅក្នុង​រដ្ឋធានី​ប៉េកាំង​ដើម្បី​ពិភាក្សា​អំពី​វិធានការ​ប្រយុទ្ធប្រឆាំង​នឹង​កូវី​ដ​១៩​។​

​ក្រៅពី​ជៀសវាង​ជំនួប​ទល់មុខ លោក​ស៊ី​ក៏​មិន​បាន​ធ្វើដំណើរ​ទៅ​ក្រៅប្រទេស គឺ​មិន​បាន​ចាកចេញ​ពី​ប្រទេស​ក្នុងពេល​ជាង​២​ឆ្នាំ​មកនេះ​។​

​ពេល​ចុង​ក្រោយ​ដែល​លោក​ស៊ី​បាន​វិល​មក​ពី​ដំណើរ​នៅ​បរទេស​គឺ​ថ្ងៃ​៨​មករា ឆ្នាំ​២០២០ ក្រោយពី​បាន​ទៅ​ទស្សនកិច្ច​ប្រទេស​ក្បែរ​ខាង​មី​យ៉ាន់​ម៉ា​។​វា​កើត​ឡើង​៥​ថ្ងៃមុន​រដ្ឋាភិបាល​បិទ​ខ្ទប់​ទីក្រុង​អ៊ូ​ហាន​ដើម្បី​​ទប់ស្កាត់​ការផ្ទុះ​ជំងឺ​កូវី​ដ​១៩​។​

​ជំនួប​កាលពី​ថ្ងៃ​អង្គារ កើត​ឡើង​នៅ​ពេល​តែ​មួយ​សប្តាហ៍​មុន​ការចាប់ផ្តើម​កីឡា​អូ​ឡាំ​ពិ​ច​រដូវរងារ​ក្រុង​ប៉េកាំង ។​ក្នុងជំនួប លោក​ស៊ី​និង​លោក​បាច​បាន​ពិភាក្សា​អំពី​អូ​ឡាំ​ពិ​ច ទាំង​វិធានការ​ប្រឆាំង​កូវី​ដ​១៩​និង​ប្រព័ន្ធ​គ្របគ្រង​ស្វ័យប្រវត្តិ​សំរាប់​កីឡា​រដូវរ​ងារ​នេះ​។​

​លោក​ស៊ី​បាន​ប្រាប់​លោក​បាច​ថា ចិន​នឹង​បំពេញ​ការសន្យា​របស់​ខ្លួន​ថា​នឹង​រៀបចំ​កីឡា​អូ​ឡាំ​ពិ​ច​រដូវរងារ​មួយ​សាមញ្ញ​និង​មាន​សុវត្ថិភាព និង​ថា​ចិន​មាន​ជំនឿ​ចិត្ត​ពេញលេញ​ថា​ខ្លួន​នឹង​អាច​ការពា​រសុខ​​ភាព​និង​សុវត្ថិភាព​របស់​ប្រជាជន​ខ្លួន ព្រមទាំង​អ្នកចូលរួម​ក្នុង​កីឡា​នេះ​៕

​ប្រធានាធិបតី​ចិន ស៊ី ជីន​ភីង ទទួល​ជួប​ប្រធាន​គណៈកម្មាធិការ​អូ​ឡាំ​ពិ​ច​អន្តរជាតិ ថូ​ម៉ាស បាច នៅ​វិមាន​ទទួលភ្ញៀវ​ក្នុង​ក្រុង​ប៉េកាំង​កាលពី​ថ្ងៃ​២៥​មករា​