ប្រែ​សម្រួល : កញ្ញា​ដា​លី​ស (​ស្ត្រេត​ថែមស៍​) ៖ យោងតាម​ការសិក្សា​មួយ​បានឱ្យដឹងថា មេរោគ​បំ​ប្លែងខ្លួន​អូ​មី​ក្រុង​អាច​រស់​បាន​រហូត​ដល់ ៨ ថ្ងៃ​នៅលើ​ប្លា​ស្ទិក និង ២១ ម៉ោង​នៅ​លើ​ស្បែក​ដែល​ជា​រយៈពេល​យូរ​​ជាង​មេរោគ​បំប្លែង​គួរឱ្យ​បារម្ភ​ផ្សេងទៀត​ដូចជា អាល់​ហ្វា​, បេតា​, ហ្គា​ម៉ា និង​ដែល​តា ក៏ដូចជា​មេរោគ​កូរ៉ូណា​ដើម​។

​ការសិក្សា​មុន​ការបោះពុម្ព ដែល​មិន​ទាន់​ត្រូវ​បាន​ពិនិត្យ​ដោយ​អ្នកស្រាវជ្រាវ​គ្នា​ឯង​នៅ​ឡើយ​នេះ បាន​ធ្វើការ​វិភាគ​លើ​ភាពខុស​គ្នា​នៃ​ស្ថិរភាព​បរិស្ថាន​របស់​មេរោគ គឺ​រវាង​មេរោគ Sars-CoV-2 ដែល​រកឃើញ​ដំបូង​នៅក្នុង​ទីក្រុង​អ៊ូ​ហាន​និង​មេរោគ​បំប្លែង​ខ្លួន​គួរ​ឱ្យ​ព្រួយបារម្ភ (VOCs)​។​

​លទ្ធផល​រកឃើញ​បានបង្ហាញ​ថា នៅលើ​ផ្ទៃ​ប្លា​ស្ទិក​និង​ស្បែក មេរោគ​បំប្លែង អាល់​ហ្វា​, បេតា​, ដែល​តា និង អូ​មី​ក្រុង​បង្ហាញ​រយៈពេល​រស់រាន​មាន​ជីវិត​បាន​យូរ​ជាង​ពីរដង​ធៀប​នឹង​មេរោគ​ដើម​​នៅ​ទីក្រុង​អ៊ូ​ហាន និង រក្សា​ការឆ្លង​បាន​លើស​ពី ១៦ ម៉ោង​លើ​ផ្ទៃ​ស្បែក​។​

​អូ​មី​ក្រុង​បាន​រស់រាន​មានជីវិត​រយៈពេល ២១,១ ម៉ោង​លើ​គំរូ​ស្បែក​ពី​សាកសព បន្ទាប់​មក​តាម​ពីក្រោយ​ដោយ​មេរោគ​កូរ៉ូណា​ដើម (៨,៦ ម៉ោង​) មេរោគ​ហ្គា​ម៉ា (១១ ម៉ោង​) និង​មេរោគ​ដែល​តា (១៦,៨ ម៉ោង​) ។​

​ការរស់រានមានជីវិត​របស់​មេរោគ​អាល់​ហ្វា (១៩,៦ ម៉ោង​) និង​បេតា (១៩,១ ម៉ោង​) ត្រូវបាន​រកឃើញ​ថា​ស្រដៀង​គ្នា​។​

​ក្រុម​អ្នកស្រាវជ្រាវ​មកពី​សាកលវិទ្យាល័យ​វេជ្ជសាស្ត្រ​ខេត្ត​ក្យូ​តូ​នៃ​ប្រទេស​ជប៉ុន​បាន​និយាយថា “​មេរោគ​អូ​មី​ក្រុងមាន​ស្ថិរភាព​បរិស្ថាន​ខ្ពស់​បំផុត​ក្នុងចំណោម VOCs”៕

​មេរោគ​បំ​ប្លែងខ្លួន​អូ​មី​ក្រុង​អាច​រស់​បាន​រហូត​ដល់ ៨ ថ្ងៃ​នៅលើ​ប្លា​ស្ទិក និង ២១ ម៉ោង​នៅ​លើ​ស្បែក