​ដោយ​: ភ្នំ​ខៀវ / បាត់ដំបង​: ប្រជា​នេសាទ រស់​នៅតាម​ដងស្ទឹង និង​ទន្លេ ងាក​ពី​ការប្រើ ទូក​ឈើ ជំនួស​មកវិញ ដោយ​ទូក​ធ្វើ អំពី​ស្មាច់​វិញ ព្រោះ​ទូក​ប្រភេទ​ថ្មី​នេះ ងាយស្រួល​ប្រើ និង​ផ្តល់​ប្រយោជន៍​បាន​ច្រើន​។​

​ប្រជាពលរដ្ឋ​ដែល​ប្រកប​របរ​នេសាទ​ត្រី រស់​នៅតាម​ដងស្ទឹង​សង្កែ ក៏ដូចជា តំបន់​បឹង ទន្លេសាប បច្ចុប្បន្ននេះ បាន​ផ្លាស់ប្តូរ ស្ទើរតែ​ទាំងស្រុង ពី​ការប្រើប្រាស់​ទូក​ឈើ ជំនួស ដោយ​ទូក​ធ្វើ អំពី​ប្រភេទ​ជ័រ​ស្មាច់​វិញ ដោយសារ​ទូក​ប្រភេទ​ថ្មី​នេះ ងាយស្រួល​ប្រើ​ចល័ត​ទី បាន​លឿន និង​ផ្តល់​ប្រយោជន៍ បាន​ច្រើន ទាន់​ចិត្ត​។​

​ប្រជា​នេសាទ​បែប​លក្ខណៈ​គ្រួសារ លោក រស់ រ៉ា​ន់ រស់នៅ​ភូមិ​កំពង់​សំបួរ ឃុំ​សំរោង​ក្នុង ស្រុក​សង្កែ ខេត្តបាត់ដំបង បានបញ្ជាក់​អោយដឹង នៅ​ថ្ងៃទី ២៥ ខែមករា ឆ្នាំ​២០២២​នេះ ថាៈ ចាប់តាំងពី​ទូក​ឈើ របស់លោក​ចាស់ និង​ធ្លុះធ្លាយ​មក លោក​បាន​ផ្លាស់ប្តូរ មកប្រើប្រាស់​ទូក ធ្វើ​អំពី​ជ័រ​ស្មាច់​វិញ មាន​រយៈពេល ៥ ឆ្នាំ​មកហើយ ក្នុងអំឡុង នៃ​ការប្រើប្រាស់​នេះ ទូក​ថ្មី​ធ្វើ​ពី​ស្មាច់ ផលិត​ក្នុងស្រុក ងាយស្រួល​ប្រើប្រាស់ ផ្តល់​ប្រយោជន៍ បាន​ច្រើនជាង​ទូក​ឈើ មិន​ពិបាក​ថែទាំ បិត​លាប​ជ័រ​ប្រចាំឆ្នាំ និង​ចំណេញ​ពេលវេលា បើកបរ​លឿន​ជាង​ទូក​ឈើ ប្រមាណ​ពី ៣ ទៅ ៤ ម៉ោង ហើយ​ស៊ីសាំង​តិច​ងាយស្រួល រក​ទិញ ម្យ៉ាងទៀត អាច​កុម្ម៉ង់​កម្រាស់​ទូក ក៏មាន​លក្ខណ​:​ពិសេស​មួយទៀត ប្រើប្រាស់ បាន​ទាំង​ក្នុងស្ថានភាព​ផ្លូវ ដែលមាន​ទឹក​រាក់ ក្រោម​ជង្គង់ ក៏​អាច​លូន​ទៅមុខ​បាន ខុសពី​ទូក​ឈើ លុះត្រា​ណា ស្ថានភាព​ទឹក មាន​កម្ពស់​ត្រឹម​ភ្លៅ ទើប​អាច​ឆ្លងកាត់​ទៅរួច ។​

​អ្នកជំនាញ​ប្រើប្រាស់​ទូក បាន​បន្តថាៈ បច្ចុប្បន្ន ប្រជាពលរដ្ឋ អ្នក​ប្រក​បរបរ​នេសាទ​ត្រី ដែល​រស់​នៅតាម​បណ្តោយ ដងស្ទឹង​សង្កែ ក៏ដូចជា ប្រជា​នេសាទ នៅ​តំបន់​បឹង​ទន្លេសាប បាន​បោះបង់ ការប្រើប្រាស់​ទូក​ឈើ ហើយ​ងាក​មក​ប្រើ​ទូក ធ្វើ​ពី​ជ័រ​ស្មាច់ ស្ទើរតែ​ទាំងអស់ ប្រមាណ​ជា ៩០% ហើយ ទោះបីជា​ទូក​ធ្វើ​ពី​ឈើ ប្រើប្រាស់​បាន​រយៈពេល​យូរ​ជាង និង​មានតម្លៃ​ទាប​ជាង ទូក​ធ្វើ​ពី​ស្មាច់ បន្តិច​ក៏ដោយ​។​

​ប្រភព​ពលរដ្ឋ​មួយរូប​ផ្សេងទៀត បាន​អះអាង​ដែរ​ថាៈ ទូក​ស្មាច់ បច្ចុប្បន្ន មាន​ផលិត និង មាន​លក់​នៅ​ភ្នំ​ក្រោម ខេត្តសៀមរាប ឃុំ​កោះ​ជី​វាំង និង​នៅ​តំបន់​បាក់​ព្រា ខេត្តបាត់ដំបង ជាដើម​។ ទូក​ស្មាច់​ខ្នាតតូច​ល្មម ប្រវែង​ជាង ៧​ម៉ែត្រ មានតម្លៃ​ពី ២​លាន ៤០​ម៉ឺន ទៅ ២​លាន ៦០ ម៉ឺន​រៀល បើ​ធៀប​នឹង​ទូក​ឈើ មានតម្លៃ​ត្រឹមតែ ១​លាន ៧០ ម៉ឺន​រៀល តែប៉ុណ្ណោះ​។​

​ចំណែកឯ​ឈ្មួញ​ដែល​ឈរ​ចាំ​ទទួល​ទិញ​ផល​ត្រី នៅ​តំបន់​ព្រែក​ទាល់ បឹង​ទន្លេសាប ក្នុងស្រុក​ឯក​ភ្នំ ខេត្តបាត់ដំបង បានបង្ហាញ​ការចាប់អារម្មណ៍ ស្រដៀង​គ្នា​ថាៈ ការងា​កមក ប្រើប្រាស់​ទូក ធ្វើ​ពី​ស្មាច់​របស់​ប្រជា​នេសាទ​នេះ ពិតជា​ចំណេញ​បាន​ច្រើន ទាំង​វា​បើកបរ បាន​លឿន ងាយស្រួល​បត់បែន បំលាស់​ទី ទាំង​ទីជិត និង​ទី​ឆ្ងាយ​បាន​ប្រសើរ ប៉ុន្តែ​សម្រាប់ មុខរបរ​របស់គាត់​វិញ នៅ​មិនទាន់​អាច​ចោល​ទូក ឬ​កាណូត​ធ្វើ​ពី​ឈើ​បានឡើយ ព្រោះ ការដឹកជញ្ជូន​ត្រី​ច្រើនៗ ទៅកាន់​ទីផ្សារ ទាមទារ​ការប្រើប្រាស់ កាណូត​ឈើ ប្រភេទ​បា​ឡា ធំៗ ទើប​អាចទៅរួច ម្យ៉ាងទៀត ទូក​ធ្វើ​ពី​ស្មាច់ នៅ​មិនទាន់មាន​ប្រភេទ ផ្ទុក​ទម្ងន់​ធ្ងន់ និង រឹងមាំ​ដូច​ទូក កាណូត ឈើ​ឡើយ​៕/V​