ដោយៈ​មុនី​រ័ត្ន​/​ភ្នំពេញៈ​លោក Nasser BOURITA រដ្ឋមន្ត្រីការបរទេស​សហប្រតិបត្តិការ​អាហ្វ្រិក​និង​ជនអន្តោប្រវេសន៍ ម៉ា​រ៉ុ​ក​នៃ​ព្រះរាជាណាចក្រ​ម៉ា​រ៉ុ​កបាន​បញ្ជាក់ថា នឹង​ជួយ​ជំរុញ​ប្រទេស​ដទៃ​ឱ្យ​គាំទ្រ​កម្ពុជា​ចំពោះ​បេក្ខភាព​កម្ពុជា​ជា​សមាជិក សង្កេតការណ៍​របស់​អង្គការ​កិច្ចសហប្រតិបត្តិការ​អ៊ីស្លាម​(OIC)​និង​បាន​សម្ដែង​នូវ​ការប្ដេជ្ញាចិត្ត​យ៉ាង​ខ្លាំងក្លា​ក្នុងការ​គាំទ្រ​កម្ពុជា ធ្វើជា​ប្រធាន​អាស៊ាន​ក្នុងឆ្នាំនេះ និង​បញ្ជាក់​ច្បាស់​ពី​ការប្តេជ្ញាចិត្ត​របស់​ម៉ា​រ៉ុ​ក ក្នុងការ​ធ្វើជា​ស្ពាន​ត​ភា្ជ​ប់រ​វាង​កម្ពុជា និង​តំបន់​អាហ្វ្រិក និង​មជ្ឈិមបូព៌ា ដើម្បី​ជំរុញ​កិច្ចសហប្រតិបត្តិការ​ទ្វេភាគី​ជាមួយ​កម្ពុជា ក៏ដូចជា​ជាមួយ​បណ្តា​ប្រទេស អាស៊ាន​។​

លោក​ឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស​កម្ពុជាក្នុងជំនួបតាមប្រព័ន្ធវីដេអូ(រូបថតក្រសួងការបរទេស)

​ចំណុច​ទាំងឡាយ​នេះ​ត្រូវ​បានលើកឡើង​នៅក្នុង​ជំនួប​ពិភាក្សា​ការងារ​តាម​ប្រព័ន្ធ​វីដេអូ​ជាមួយ​លោក​ឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស​កម្ពុជា កាលពី​ថ្ងៃទី​២៥ ខែមករា ឆ្នាំ​២០២២ ។​

​ប្រភព​ក្រសួង​ការ​បរ​ទស​បានបញ្ជាក់​ថា​ចំពោះ​បេក្ខភាព​កម្ពុជា​ជា​សមាជិក​សង្កេតការណ៍​របស់​អង្គការ​កិច្ចសហប្រតិបត្តិការ​អ៊ីស្លាម (OIC) លោក BOURITA បាន​បញ្ជាក់ថា ម៉ា​រ៉ុ​ក​នឹង​ជួយ​ជំរុញ​ប្រទេស​ដទៃ​ឱ្យ​គាំទ្រ​កម្ពុជា​។ ជាងនេះទៅទៀត ក្នុងការ​បង្កើន​ទំនាក់​ទំនងជា​មិត្តភាព និង​កិច្ចសហប្រតិបត្តិការ​រ​វាង ប្រទេស​ទាំងពីរ លោក BOURITA បាន​អញ្ជើញ លោក​ឧបនាយករដ្ឋមន្ត្រី រដ្ឋមន្ត្រីការបរទេស​អញ្ជើញ​ទៅ​បំពេញ​ទស្សនកិច្ច ផ្លូវការ​នៅ​ប្រទេស​ម៉ា​រ៉ុ​ក​ក្នុងឆ្នាំនេះ​។​

​ប្រភព​ដដែល​បន្តថា ជាការ​ឆ្លើយតប​ឧបនាយករដ្ឋមន្ត្រី ប្រាក់ សុខុន បាន​ថ្លែងអំណរគុណ​ដល់​លោក​BOURITA ចំពោះ​កិច្ចខិតខំ​ប្រឹងប្រែង​រប​ស់​ឯកឧត្តម​ក្នុងការ​ស្វែងរក​ការគាំទ្រ​បេក្ខភាព​កម្ពុជា ជា​សមាជិក​សង្កេត ការណ៍​នៃ​អង្គការ OIC និង​បាន​ឯកភាព​អញ្ជើញ​ទៅ​បំពេញ​ទស្សនកិច្ច​នៅ​ប្រទេស​ម៉ា​រ៉ុ​កដោយ​ក្តី​រីករាយ​។​លោក នឹង​ពិនិត្យ​រក​ពេលវេលា​សមស្រប​ណាមួយ​ក្នុងពេល​វេលា​ដ៏​មមាញឹក​នៃ កិច្ចប្រជុំ​អាស៊ាន​។​

លោក​ឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស​កម្ពុជាក្នុងជំនួបតាមប្រព័ន្ធវីដេអូ(រូបថតក្រសួងការបរទេស)

​ចំពោះ​ការវិវត្ត​សភាពការណ៍​នៅ​ប្រទេស​មី​យ៉ាន់​ម៉ា លោក​ឧបនាយករដ្ឋមន្ត្រី ប្រាក់ សុខុន បាន​ជម្រាបជូន​លោក Nasser BOURITA អំពី​លទ្ធផល​នៃ​ដំណើរ​ទស្សនកិច្ច​របស់​សម្តេច​តេ​ជោ​នាយករដ្ឋមន្ត្រី ហ៊ុន សែន ទៅកាន់​ប្រទេស​មី​យ៉ាន់​ម៉ា សំដៅ​ជំរុញ​ការអនុវត្ត​កិច្ចព្រមព្រៀង​ជា ឯកច្ឆន្ទ​ប្រាំ​ចំណុច​របស់​អាស៊ាន និង​បាន​គូសបញ្ជាក់​អំពី​គោលបំណង​តែមួយគត់​របស់​កម្ពុជា គឺ​ជួយ​មី​យ៉ាន់​ម៉ា​ឱ្យ​វិល​ទៅរក​ប្រក្រតីភាព​ឡើងវិញ បញ្ចប់​អំពើហិង្សា និង​សម្រេចបាន​នូវ​សន្តិភាព និង ការបង្រួបបង្រួម​ជាតិ​យូរអង្វែង ហើយ​ដើម្បី​សម្រេច​គោលបំណង​នេះ​បាន ត្រូវមាន​ការចូលរួម​ពី​គ្រប់ ភាគី​ពាក់ព័ន្ធ​ទាំងអស់​នៅក្នុង​ដំណើរការ​នៃ​កិច្ចចរចា​។

​ចំពោះ​កិច្ចសហប្រតិបត្តិការ​ក្នុង​តំបន់​លោក​ឧបនាយករដ្ឋមន្ត្រី ប្រាក់ សុខុន បាន ជម្រាបជូន​សម​ភាគី​អំពី​អាទិភាព​របស់​កម្ពុជា​ក្នុងនាម​ជា​ប្រធាន​អាស៊ាន​ឆ្នាំ​២០២២ ក្នុងការ​ឆ្លើយ តប​ទៅនឹង​បញ្ហា​ប្រឈម​ជា​យុទ្ធសាស្ត្រ​ដែល​កំពុង​កើតឡើង​នៅក្នុង​តំបន់ រួមមាន​ការគ្រប់គ្រង ប្រកបដោយ​ប្រសិទ្ធភាព​នូវ​ជំងឺ​រាតត្បាត​កូ​វីដ​-១៩ និង​ដំណើរការ​ស្ដារឡើងវិញ​ប្រកបដោយ បរិ​យា​ប័ន្ន ការគ្រប់គ្រង​បញ្ហា​ដែលជា​ប្រពៃណី និង​មិន​ប្រពៃណី​ដែលមាន​ស្រាប់ និង​ការពង្រឹង ភាព​ស្អិតរ​មួ​ត ម​ជ្ឈ​ភាព និង​ភាព​ធន់​រឹងមាំ​របស់​អាស៊ាន​៕​សរន​

លោក​ឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស​កម្ពុជាក្នុងជំនួបតាមប្រព័ន្ធវីដេអូ(រូបថតក្រសួងការបរទេស)