​ដោយៈ មុនី​រ័ត្ន​/​ភ្នំពេញៈ លោក​រដ្ឋមន្ត្រី​ក្រសួងកសិកម្ម រុក្ខាប្រមាញ់ និង​នេសាទ លោក​វេ​ង សាខុន បាន​ណែនាំ​ឲ្យ​អគ្គនាយកដ្ឋាន​កសិកម្ម បង្កើន​ការយកចិត្តទុកដាក់​ការត្រួតពិនិត្យ​សមាសភាព​ផ្សំ​ជីគីមី និង​ថ្នាំ​សម្លាប់​សត្វល្អិត​ដែល​អាច​យកមក​លាយ​ផលិត​គ្រឿងញៀន ដោយ​ត្រូវ​សហការ​ជាមួយ​អាជ្ញាធរ​គ្រឿងញៀន​។​

រូបថតៈ លោក វេង សាខុន រដ្មមន្រ្តីក្រសួងកសិកម្ម(រូបថតក្រសួង)

​ការណែនាំ​របស់លោករ​ដ្ឋ​មន្ត្រី​ក្រសួងកសិកម្ម​រុក្ខាប្រមាញ់​និង​នេសាទ​បានធ្វើ​ឡើង​ក្នុង​ពិធី​បិទ​កិច្ចប្រជុំ​បូកសរុប​លទ្ធផល​ការងារ​ឆ្នាំ​២០២១ និង​លើក​ទិសដៅ​អនុវត្ត​បន្ត​ឆ្នាំ​២០២២ របស់​អគ្គនាយកដ្ឋាន​កសិកម្ម នៅ​ទីស្តីការ​ក្រសួងកសិកម្ម រុក្ខាប្រមាញ់ និង​នេសាទ កាលពី​ព្រឹក​ថ្ងៃទី​២៦ ខែមករា ឆ្នាំ​២០២២​។​

​ការណែនាំ​នេះ បាន​ធ្វើឡើង​មួយថ្ងៃ គឺ​បន្ទាប់ពី​សម្តេច​ក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រី​ក្រសួងមហាផ្ទៃ ថ្លែង​ក្នុង​ពិធី​ប្រគល់​រថយន្ត​ដល់​កងវរសេនាតូច​នគ​របាល​ព្រំដែន​ភូមិភាគ​ទី​១ ទី​២ និង​ទី​៣ កាលពី​ថ្ងៃទី​២៥ ខែមករា ឆ្នាំ​២០២២​ថា​“​សារធាតុ​ដែល​គេ​យកទៅ​ផ្សែផ្សំ​គ្រឿងញៀន​បាន​ចូលមក​កម្ពុជា​ដោយ​ស្របច្បាប់​មាន​រហូត​ទៅដល់​រាប់រយ​តោន ដែល​ថ្មីៗ​នេះ រកឃើញ​ជាង ១០០​តោន សួរថា អ្នកណា​ទទួលខុសត្រូវ ក្នុងការ​នាំសារ​ធាតុ​ញៀន​នឹង​មក ខ្ញុំ​គិតថា ត្រូវ​រក​ឲ្យ​ឃើញ​អ្នក​ដែល​ទទួលខុសត្រូវ​ព្រោះ​នាំគ្នា​ស៊ី​ញ៉េ​អនុញ្ញាត​ឲ្យ​គេ​យក​ចូលមក​…៕​សរន​