ដោយ​:​ដេប៉ូ​/​ក្រចេះ​:​រដ្ឋមន្ត្រីក្រសួង​ការងារ និង​បណ្តុះបណ្តាល​វិជ្ជាជីវៈ បាន​ជំរុញឱ្យមាន​ការអនុវត្ត​គោលនយោបាយ​ជាតិ​ស្តីពី​មុខរបរ និង​ការងារ​ប្រសើរ ដើម្បី​កាត់បន្ថយ​នូវ​ជម្លោះ​ការងារ​។ ការលើកឡើង​បែបនេះ​ដោយលោក អ៊ិត សំហេង រដ្ឋមន្ត្រីក្រសួង​ការងារ​កាលពី​រសៀល​ថ្ងៃទី​២៥ ខែមករា ឆ្នាំ​២០២២ ខណៈពេល​ដឹកនាំ​គណៈប្រតិភូ ចុះ​ទស្សនកិច្ច​ពី​ដំណើរការ​ខ្សែ​ច្រ​វាក់​ប្រមូល​ផល​, ចុះសួរសុខទុក្ខ​បងប្អូន​កម្មករ​នៅ​ក្រុមហ៊ុន​ថា​ហ្គ្រី​កូ (THAGRICO) ជា​ក្រុមហ៊ុន​កសិកម្ម​ដ៏​ធំ​មួយ ដែលមាន​ទីតាំង​ស្ថិតនៅក្នុង​ស្រុក​ស្នួល ខេត្តក្រចេះ​។

លោក អ៊ិត សំហេង រដ្ឋមន្ត្រីក្រសួង​ការងារ​កាលពី​រសៀល​ថ្ងៃទី​២៥ ខែមករា បាន​ដឹកនាំ​គណៈប្រតិភូ ចុះ​ទស្សនកិច្ច​ពី​ដំណើរការ​ខ្សែ​ច្រ​វាក់​ប្រមូល​ផល​, ចុះសួរសុខទុក្ខ​បងប្អូន​កម្មករ​នៅ​ក្រុមហ៊ុន​ថា​ហ្គ្រី​កូ (THAGRICO) ជា​ក្រុមហ៊ុន​កសិកម្ម​ដ៏​ធំ​មួយ ដែលមាន​ទីតាំង​ស្ថិតនៅក្នុង​ស្រុក​ស្នួល ខេត្តក្រចេះ​(រូបថតក្រសួង)

លោក​រដ្ឋមន្ត្រីក្រសួង​ការងារ​បាន​លើកទឹកចិត្ត​និង​វាយ​យ​តម្លៃ​ខ្ពស់​ចំពោះ​ការ វិនិយោគ​របស់​ក្រុមហ៊ុន នៅក្នុង​ប្រទេស​កម្ពុជា ជាពិសេស​ក្នុង​តំបន់​អភិវឌ្ឍន៍​ត្រីកោណ (​កម្ពុជា វៀតណាម ឡាវ​) ដែល​កាលពី​អតីតកាល តំបន់​នេះ​ជា​តំបន់​សង្គ្រាម​បង្ហូរឈាម​មួយ លុះ​មកដល់​បច្ចុប្បន្ននេះ​បាន​ប្រែក្លាយជា​តំបន់​សន្តិភាព និង​មានការ​អភិវឌ្ឍ​។

លោក អ៊ិ​ត សំហេង បាន​ឲ្យ​ក្រុមហ៊ុន​អនុវត្ត​ទៅតាម​លក្ខខណ្ឌ​ការងារ និង​ច្បាប់​ស្តីពី​ការងារ​របស់​ព្រះរាជាណាចក្រ​ឲ្យ​បានល្អ​ប្រសើរ ដើម្បី​កាត់បន្ថយ​បាន​នូវ​ជម្លោះ​ការងារ ឈានទៅរក​សុខដុម​នី​យក​ម្ម​ទំនាក់ទំនង​វិជ្ជាជីវៈ​រវាង​កម្មករ និង​ក្រុមហ៊ុន​។ ​ជាមួយគ្នានេះ​លោក រដ្ឋមន្ត្រី រីករាយ និង​ស្វាគមន៍​ចំពោះ​តម្រូវការ​កម្លាំង​ពលកម្ម​សម្រាប់​បម្រើការ​ងារ​នៅក្នុង​ក្រុមហ៊ុន ដោយ​លោក​រដ្ឋមន្ត្រី​បានផ្តល់​អនុសាសន៍​ដល់ មន្ទីរ​ការងារ និង​បណ្តុះបណ្តាល​វិជ្ជាជីវៈ​ខេត្តក្រចេះ និង​មន្ទីរ​ការងារ និង​បណ្តុះបណ្តាល​វិជ្ជាជីវៈ​មួយចំនួនទៀត​នៅក្បែរ​គ្នា ជួយ​ផ្សព្វផ្សាយ​ជ្រើសរើស​កម្លាំង​ពលកម្ម ឲ្យ​បាន​គ្រប់​តាម​តម្រូវការ​។​

លោករដ្ឋមន្ត្រីបានស្នើ​ទៅខាង​ក្រុមហ៊ុន​វិញ​ជួយ​បណ្តុះបណ្តាល​សមត្ថភាព​បន្ថែម​ដល់ក​ម្មករ តាមរយៈ​ធ្វើការ​បណ្តើរ និង​រៀន​បណ្តើរ​។​សម្រាប់​កម្លាំង​ពលកម្ម​ជំនាញ​បរទេស​ដែលមាន​កូតា​លើសពី​១០​ភាគរយ ក្រុមហ៊ុន ត្រូវដាក់​សំណើសុំ​មក​ក្រសួង ដោយ​បញ្ជាក់​ឱ្យបាន​លម្អិត​នូវ ជំនាញ ឯកទេស វិជ្ជាជីវៈ​ជនបរទេស​ដែលមាន​តម្រូវការ និង​មូល​ហេតុដែល​បណ្ដាលឱ្យមាន​តម្រូវការ​ប្រើប្រាស់​ហត្ថពល​កម្ម​បរទេស​លើ​ចំនួន ១០​ភាគរយ​នេះ​។​

គួរ​បញ្ជាក់ថា​ក្នុង​ពិធី​នេះ​លោក​រដ្ឋមន្ត្រី និង​គណៈប្រតិភូ បាន ទស្សនកិច្ច​ពី​ដំណើរ​ខ្សែ​ច្រ​វ៉ា​ក់​ផលិតកម្ម​នីមួយៗ និង​ហេដ្ឋារចនាសម្ព័ន្ធ​មួយចំនួន​របស់​ក្រុមហ៊ុន និង​ជួប​សំណេះសំណាល​ផ្ទាល់​ជាមួយ​កម្មករ ដោយបាន​ណែនាំ​ឲ្យ​ប្រកាន់​ភ្ជាប់​នូវ​វិធានការ​របស់​ក្រសួងសុខាភិបាល​ពី​ការការពារ​នៃ​ជំងឺ​កូ​វីដ​-១៩ និង​ទៅ​ចាក់​វ៉ាក់សាំង​ដូ​ស​ជំរុញ​តាម​ពេលវេលា​កំណត់ ដើម្បី​រក្សា​សុខភាព និង​ការងារ​។​

បើតាម​ការ​ឲ្យ​ដឹង​ពី​តំណាង​របស់​ក្រុមហ៊ុន ថា​ហ្គ្រី​កូ ឲ្យ​ដឹងថា ក្រុមហ៊ុន​ចាប់ផ្ដើម​ដំណើរការ​នៅក្នុង​ឆ្នាំ ២០១៩​។ ផលិតផល​កសិកម្មរ​បស់​ក្រុមហ៊ុន​រួមមាន ចេក ស្វាយ ខ្នុរ ។ ផលិតផល​ទាំងនេះ​ត្រូវបាន​នាំចេញ​ទៅកាន់​ទីផ្សារ​ប្រទេស​ចិន​ជា​ចម្បង​។ នៅ​ឆ្នាំ ២០២១ ក្រុមហ៊ុន Thagrico បាន​នាំចេញ​ផ្លែឈើ​គ្រប់​ប្រភេទ​ចំនួន ២០៨,០០០ តោន និង​នាំចេញ​ចំនួន ១០,០០០ កុងតឺន័រ​។ ចំពោះ​ប្រាក់ចំណូល​របស់​កម្មក​រ​វិញ​ទទួលបាន​ចាប់ពី ២៤០ ដុល្លារ​ដល់ ៣០០ ដុល្លារ​ក្នុង​មួយខែ​៕សរន
លោក អ៊ិត សំហេង រដ្ឋមន្ត្រីក្រសួង​ការងារ​កាលពី​រសៀល​ថ្ងៃទី​២៥ ខែមករា បាន​ដឹកនាំ​គណៈប្រតិភូ ចុះ​ទស្សនកិច្ច​ពី​ដំណើរការ​ខ្សែ​ច្រ​វាក់​ប្រមូល​ផល​, ចុះសួរសុខទុក្ខ​បងប្អូន​កម្មករ​នៅ​ក្រុមហ៊ុន​ថា​ហ្គ្រី​កូ (THAGRICO) ជា​ក្រុមហ៊ុន​កសិកម្ម​ដ៏​ធំ​មួយ ដែលមាន​ទីតាំង​ស្ថិតនៅក្នុង​ស្រុក​ស្នួល ខេត្តក្រចេះ​(រូបថតក្រសួង)