​ប្រែ​សម្រួល : កញ្ញា​ដា​លី​ស (​ដេល្លី​ម៉េ​ល​) ៖ នាវាចម្បាំង​អូស្ត្រាលី ដែល​រុកគួន​ដោយ​មេរោគ​កូរ៉ូណា បាន​ចូល​ចត​នៅ​តុង​ហ្គា​កាលពី​ថ្ងៃ​ពុធ​ទី​២៦​មករា​ដោយ​ផ្តល់​ជំនួយ​ដែល​ត្រូវការ​យ៉ាង​ខ្លាំង​ដល់​ប្រទេស​​រងគ្រោះ​ដោយ​ភ្នំភ្លើង​និង​រលក​យក្ស​ស៊ូ​ណា​មី នៅក្រោម​ពិធីការ “​មិនមាន​ការប៉ះពាល់​គ្នា​” ដ៏​តឹងរ៉ឹង​។​

​រដ្ឋ​មន្ត្រី​សុខាភិបាល​តុង​ហ្កា លោក​សៃយ៉ា ភី​វ​កាឡា (Saia Piukala) បាន​និយាយថា នាវិក​នៃ​នាវាចម្បាំង HMAS Adelaide​នឹង​អនុវត្ត​តាម​ពិធីសារ​សុខភាព​ដ៏​តឹងរ៉ឹង​ដើម្បី​ធានា​ថា​ព្រះរាជា​​ណា​ចក្រ​ប៉ាស៊ីហ្វិក​ដាច់ស្រយាល​មួយ​នេះ​នៅតែ​ជា​កន្លែង​មួយ​ក្នុងចំណោម​កន្លែង​មួយ​ចំនួន​តូច​បំផុត​នៅលើ​ពិភពលោក​ដែល​មិន​ទាន់​មាន​ករណី​កូវី​ដ​១៩​។​

​លោក​បាន​ប្រាប់​អ្នកយកព័ត៌មាន​ថា “​នាវា​នឹង​ចូល​ចត ហើយ​គ្មាន​ប៉ះពាល់​គ្នា​ណាមួយ​ត្រូវបាន​ធ្វើឡើង​នោះទេ​។ អូស្ត្រាលី​នឹង​ដឹក​ទំនិញ​ចេញ​ពី​នាវា​របស់​ពួកគេ ហើយ​ធ្វើ​ដំណើរ​ចាក​ចេញពី​កំពង់ផែ​”​។​

​នាវា Adelaide ត្រូវបាន​បញ្ជូន​ជា​ផ្នែក​មួយ​នៃ​កិច្ចខិតខំ​ប្រឹងប្រែង​ផ្តល់​ជំនួយ​អន្តរជាតិ​បន្ទាប់​ពី​ការផ្ទុះ​ភ្នំភ្លើង​នៅ​ថ្ងៃទី ១៥​ខែ​មករា​បាន​បង្កើត​រលក​យក្ស​ស៊ូ​ណា​មី​ដ៏​ធំ​និង​គ្របដណ្តប់​ប្រទេស​កោះ​​នេះ​ជាមួយ​ផេះ​ពុល​។​

​នាវាចម្បាំង​នេះ​កំពុង​ដឹក​សម្ភារៈ​សង្គ្រោះ​ប្រមាណ ៨០ តោន រួម​ទាំង​ទឹក ឧបករណ៍​វេជ្ជសាស្ត្រ និង​ឧបករណ៍​វិស្វកម្ម​។​

​ទោះ​បី​ជា​សមាជិក​នាវិក​ទាំងអស់​បាន​ធ្វើតេស្តិ៍​អវិជ្ជ​មាន​មុនពេល​ចាកចេញ​ពី​ទី​ក្រុងប្រ៊ី​ស​ប៊ែន​ក៏ដោយ ក៏​ប៉ុន្តែ​មន្ត្រី​នៅ​ទីក្រុង​កង់​បេរ៉ា​កាលពី​ថ្ងៃ​អង្គារបា​ននិយាយថា ករណី​ឆ្លង​វីរុស​កូរ៉ូណា​ចំនួន ២៣ ត្រូវបាន​រកឃើញ​នៅលើ​នាវា​។​

​លោក​ភី​វ​កាឡា​បាន​និយាយថា ចំនួន​ករណី​កូវី​ដ​បាន​កើនឡើង​ដល់ ២៩ នៅ​ថ្ងៃ​ពុធ​នេះ​។​

​នាវិក ៦០០ ជាង​របស់​នាវា​គឺ​បាន​ចាក់​វ៉ាក់សាំង​ពេញលេញ​ហើយ​កងកម្លាំង​ការពារ​អូស្ត្រាលី​បាន​និយាយ​កាលពី​ថ្ងៃ​អង្គារ​ថា​អ្នកជំងឺ ២៣​នាក់​ដំបូង​មិន​មាន​រោគសញ្ញា​ទេ​ឬ​គ្រាន់តែ​មាន​អា​ការៈស្រាល​​តិចតួច​ប៉ុណ្ណោះ​។​

​កងកម្លាំង​ការពារ​អូស្ត្រាលី​និយាយថា​នាវា​នេះ​មាន​មន្ទីរពេទ្យ ៤០ គ្រែ​រួមទាំង​រោងកុន​និង​បន្ទប់​សង្គ្រោះ​បន្ទាន់​មួយ​ផងដែរ​៕

​អូស្ត្រាលី​នឹង​ដឹក​ទំនិញ​ចេញ​ពី​នាវា​របស់​ពួកគេ ហើយ​ធ្វើ​ដំណើរ​ចាក​ចេញពី​កំពង់ផែ​តុង​ហ្គា​វិញ ដោយ​គ្មាន​ការប៉ះពាល់​ជាមួយ​មន្ត្រី​តុង​ហ្គា​នោះឡើយ