ប្រែ​សម្រួល : កញ្ញា​ដា​លី​ស (​ដេលី​មែ​ល​) ៖ សហរដ្ឋ​អាម៉េរិក​កាលពី​ថ្ងៃ​ពុធ​ទី​២៦​មករា​បាន​ច្រាន​ចោល​ការទាមទារ​ដ៏​សំខាន់​របស់​រុស្ស៊ី​ក្នុង​ការរារាំង​អ៊ុយ​ក្រែន​មិនអោយ​ក្លាយ​ជា​សមាជិក​អង្គកា​រណា​តូ​ហើយ​​បាន​និយាយថា​ខ្លួន​ជឿថា​ទីក្រុង​មូ​ស្គូ​បាន​ត្រៀម​ខ្លួន​រួច​ជា​ស្រេច​ដើម្បី​ឈ្លានពាន ប៉ុន្តែ​បាន​ផ្តល់​នូវ​អ្វី​ដែល​ខ្លួន​ហៅថា “​ផ្លូវ​ការទូត​” ថ្មី​មួយ​ចេញពី​វិបត្តិ​។​

​រដ្ឋមន្ត្រីការបរទេស​អាម៉េរិក​លោក អាន​ថូ​នី ប្លីង​កិន បាន​និយាយថា លោក​នឹង​និយាយ​ម្តងទៀត​នៅ​ប៉ុន្មាន​ថ្ងៃ​ខាងមុខនេះ​ទៅ​កាន់​រដ្ឋមន្ត្រី​ការបរទេស​រុស្ស៊ី​លោក សឺ​ហ្គេ ឡាវ​រ៉ូ​វដែល​លោក​បាន​ជួប​​កាលពី​ថ្ងៃ​សុក្រ​នៅ​ទីក្រុង​ហ្សឺ​ណែ​វ ខណៈ​គំនិត​ផ្តួចផ្តើម​ដាច់ដោយឡែក​មួយ​ដោយ​បារាំង​បាន​នាំមក​នូវ​ការសន្យា​ដោយ​ទីក្រុង​មូ​ស្គូ​យ៉ាងហោចណាស់​ត្រូវ​បន្ត​ចរចា​ជាមួយ​រដ្ឋាភិបាល​អ៊ុ​យក្រែន​។​

​មួយ​ខែ​បន្ទាប់​ពី​រុស្ស៊ី​បាន​ដាក់សំណើ​សន្តិសុខ​យ៉ាង​ទូលំទូលាយ ដោយ​បាន​បញ្ជូន​ទាហាន​រាប់​ម៉ឺន​នាក់​ទៅកាន់​ព្រំដែន​អ៊ុ​យក្រែន សហរដ្ឋ​អាម៉េរិក​បាន​ឆ្លើយតប​ដោយ​មាន​ការសម្របសម្រួល​ជាមួយ​សម្ពន្ធ​​មិត្ត​ណា​តូ ហើយ​បាន​និយាយថា ខ្លួន​បាន​ត្រៀម​រួចរាល់​សម្រាប់​រាល់​ឧបទ្ទវហេតុ​ទាំងឡាយ​។​

​រដ្ឋមន្ត្រីការបរទេស​អាម៉េរិក​លោក អាន​ថូ​នី ប្លីង​កិន

​លោក​ប្លីង​កិន​បានប្រាប់​អ្នកយក​ព័ត៌មាន​អំពី​ការឆ្លើយតប​របស់​សហ​រដ្ឋ​អាម៉េរិក ដែល​លោក​និយាយថា​នៅ​តែ​ជា​ការណ៍​សម្ងាត់​យ៉ាង​ដូច្នេះ​ថា “​វា​កំណត់​ផ្លូវ​ការទូត​ដ៏​គត់​មុត​មួយ​ឆ្ពោះ​ទៅមុខ​ប្រសិនបើ​​រុស្ស៊ី​ជ្រើសរើស​វា​”​។​

​លោក​បាន​បន្ត​ផ្តល់​ជូន​នូវ​វិធានការ “​ទៅវិញទៅមក​” ដើម្បី​ដោះស្រាយ​កង្វល់​សន្តិសុខ​ទៅវិញទៅមក រួមទាំង​ការកាត់បន្ថយ​មី​ស៊ី​ល​នៅ​អឺរ៉ុប​និង​តម្លាភាព​លើ​សមយុទ្ធ​យោធា​និង​ជំនួយ​របស់លោក​​ខាងលិច​ដល់​អ៊ុ​យក្រែន​។​

​ប៉ុន្តែ​លោក​បាន​បញ្ជាក់​យ៉ាងច្បាស់​ថា សហរដ្ឋ​អាម៉េរិក​នឹង​មិន​យល់ព្រម​ទទួលយក​ការទាមទារ​ស្នូល​របស់​រុស្ស៊ី ដែល​ថា​អ៊ុយ​ក្រែន​មិន​ត្រូវ​អនុញ្ញាត​ឱ្យ​ចូល​រួម​ជាមួយ​អង្គការ​ណា​តូ​ដែល​ជា​សម្ពន្ធមិត្ត​យោធា​​គាំទ្រ​ដោយ​សហរដ្ឋ​អាម៉េរិក​នោះទេ​។​

​លោក​ប្លីង​កិន​បាន​និយាយថា “​តាម​ទស្សនៈ​របស់​យើង ខ្ញុំ​គ្មាន​អី​ច្បាស់លាស់​ជាង​នេះ​ទៀត​ទេ គឺ​ទ្វារ​របស់​អង្គការ​ណា​តូ​នៅតែ​បើកចំហ​ជានិច្ច ហើយ​នោះ​គឺជា​ការប្តេជ្ញា​ចិត្ត​របស់​យើង​”​។​

​រុស្ស៊ី ដែល​មាន​ទំនាក់ទំនង​ជា​ប្រវត្តិសាស្ត្រ​ដ៏​ស្មុគស្មាញ​ជាមួយ​អ៊ុ​យក្រែន បាន​បញ្ឆេះ​ឱ្យ​មាន​ការបះបោរ​នៅ​ភាគ​ខាងកើត​នៃ​អតីត​សាធារណរដ្ឋ​សូ​វៀត​មួយ​នេះ​(​អ៊ុ​យក្រែន​) ដែល​បាន​សម្លាប់​មនុស្ស​ជាង ១៣.០០០ នាក់​ចាប់​តាំងពី​ឆ្នាំ ២០១៤​។​រុស្សី​នៅ​ឆ្នាំ​នោះ​ដដែល​ក៏​បាន​ដណ្តើម​យក​តំបន់​គ្រីមេ​ផងដែរ បន្ទាប់​ពី​ការផ្តួលរំលំ​រដ្ឋាភិបាល​ក្នុង​ទីក្រុង​គៀវ ដែល​ចចេស​ងាក​ទៅរក​អឺរ៉ុប​។​

​សហរដ្ឋ​អាម៉េរិក​បាន​ព្រមាន​អំពី​ផលវិបាក​ធ្ងន់ធ្ងរ​និង​ឆាប់រហ័ស ប្រសិនបើ​រុស្ស៊ី​ឈ្លានពាន រួម​ទាំង​លទ្ធភាព​ដាក់ទណ្ឌកម្ម​ផ្ទាល់ខ្លួន​លើ​ប្រធានាធិបតី វ្ល៉ា​ឌី​មៀរ ពូ​ទីន​ហើយ​អង្គការ​ណា​តូ​បាន​ដាក់​ទាហាន​​ចំនួន ៨.៥០០ ឱ្យ​ប្រុង​ជើង​ការ​។​

​អគ្គលេខាធិការ​អង្គការ​ណា​តូ លោក ជែន ស្តូល​ធិន​បឺក (Jens Stoltenberg) បាន​និយាយថា “​ខណៈ​យើង​កំពុង​សង្ឃឹម​និង​ធ្វើការ​សម្រាប់​ដំណោះស្រាយ​ដ៏​ល្អ​ដើម្បី​កាត់បន្ថយ​ភាព​តានតឹង យើង​ក៏​បាន​ត្រៀម​ខ្លួន​សម្រាប់​រឿង​អាក្រក់​បំផុត​ផងដែរ​”​។​

​អនុរដ្ឋមន្ត្រី​របស់​លោក​ប្លីង​កិន លោកស្រី វេន​ឌី សឺ​មែន (Wendy Sherman) ដែល​បាន​ដឹកនាំ​កិច្ចចរចា​ពីមុន​ជា​មួយ​រុស្ស៊ី បាន​និយាយថា លោកពូ​ទីន​ហាក់​ត្រៀមខ្លួន​រួច​ជា​ស្រេច​ក្នុង​ការឈ្លានពាន បើទោះបីជា​មាន​ការព្រមាន​ពី​សហរដ្ឋ​អាម៉េរិក​ក៏ដោយ​។​

​លោកស្រី​សឺ​មែន​បាន​ប្រាប់​វេទិកា​មួយ​ថា “​ខ្ញុំ​មិនដឹងថា​តើ​គាត់​បាន​ធ្វើ​ការសម្រេចចិត្ត​ចុងក្រោយ​ហើយ​ឬ​អត់​នោះ​ទេ​ប៉ុន្តែ​យើង​ពិតជា​មើលឃើញ​រាល់​ការ​ចង្អុលបង្ហាញ​ថា​គាត់​នឹង​ប្រើប្រាស់​កម្លាំងយោធា​​ជួនកាល (​រវាង​) ឥឡូវនេះ និង​ពាក់កណ្តាល​ខែ​កុម្ភៈ​”​។​

​លោកស្រី​បាន​និយាយថា ពូ​ទីន​ប្រហែល​ជា​កំពុង​រង់ចាំ​ដើម្បី​កុំឱ្យ​មាន​ការរាំងស្ទះ​ដល់​ការចាប់ផ្តើម​នៃ​ព្រឹត្តិការណ៍​កីឡា​អូឡាំពិក​រដូវរងា​នៅ​ទីក្រុង​ប៉េកាំង​នៅ​ថ្ងៃទី ៤ ខែ​កុម្ភៈ ដែល​មេដឹកនាំ​រុស្ស៊ី​នឹងចូលរួម ចំពេល​មាន​ការ​ធ្វើ​ពហិកា​រការ​ទូត​ដោយ​សហរដ្ឋ​អាម៉េរិក និង​សម្ពន្ធមិត្ត​មួយចំនួន​៕