​ប្រែ​សម្រួលៈ​បំណង​/​សេ​អ៊ូ​ល​(​ដេល្លី​ម៉េល​)៖ កូរ៉េ​ខាងជើង​បាន​បាញ់​អ្វី​ទំនងជា​កាំជ្រួច​ផ្លោង​ចំនួន​២​ដើម​ចូល​ក្នុង​សមុទ្រ​នៅ​ឯនាយ​ឆ្នេរ​ខាងកើត​របស់ខ្លួន នេះ​បើ​តាម​ការបញ្ជាក់​ពី​យោធា​កូរ៉េខាងត្បូង​​កាលពី​ថ្ងៃ​ព្រហស្បតិ៍​។​

​នាយសេនាធិការ​ចំរុះ​កូរ៉េខាងត្បូង​បាន​និយាយថា ខ្លួន​ចាប់​បាន​ការបាញ់​បង្ហោះ​អ្វីដែល​ទំនង​ជា​កាំជ្រួច​ផ្លោង​២​ដើម​នៅ​ប្រមាណ​ជា​៨​ព្រឹក​ចេញពី​ម្តុំ​ទីប្រជុំជន​ហាំ​ហ៊ុង នៅ​ឆ្នេរ​ខាងកើត​កូរ៉េខាងជើង​។​

​ទីភ្នាក់ងារ​សារព័ត៌មាន​ក្យូ​ដូ​បាន​ស្រង់​ប្រភព​រដ្ឋាភិបាល​ជប៉ុន​ដែល​បាន​និយាយថា កាំជ្រួច​ទំនងជា​បាន​ធ្លាក់​នៅ​ក្រៅ​តំបន់​សេដ្ឋកិច្ច​ពិសេស​របស់​ជប៉ុន​។​

​កូរ៉េ​ខាងជើង​បាន​និយាយ​នៅ​ខែ​នេះ​ថា ខ្លួន​នឹង​ពង្រឹង​វិស័យ​យោធា​ទល់នឹង​អាម៉េរិក​និង​ពិចារណា​បន្តសកម្មភាព​ដែល​ត្រូវបាន​ផ្អាក​ចោល​ជា​បណ្តោះអាសន្ន​ទាំងអស់​ឡើងវិញ​ដែល​ទំនង​ចង់​សំដៅទៅ​​រក​ការសាកល្បង​សព្វាវុធ​នុយគ្លេអ៊ែរ​និង​កាំជ្រួច​ចម្ងាយ​ឆ្ងាយ​។​

​កាលពី​ថ្ងៃ​អង្គារ កូរ៉េ​ខាងជើង​បាន​បាញ់​កាំជ្រួច​បញ្ជា​ទិស​ចំនួន​២​ដើម​ចូល​ក្នុង​សមុទ្រ​នៅ​ឯនាយ​ឆ្នេរ​ខាងកើត​របស់ខ្លួន ចំ​ពេល​មាន​ភាព​តានតឹង​អំពី​ការបាញ់​សាកល្បង​កាំជ្រួច​កាលពី​ពេល​ថ្មីៗ​។​

​មុន​នេះ​ក្នុង​ខែ​មករា​ឆ្នាំ​២០២២​នេះ កូរ៉េ​ខាងជើង​ក៏​បាន​បាញ់​កាំជ្រួច​បញ្ជា​ទិស​កល​យុទ្ធ កាំជ្រួច​លឿន​ជាង​សម្លេង​និង​ប្រព័ន្ធ​កាំជ្រួច​ដាក់​លើ​រថភ្លើង​។​

​ការបាញ់​សាកល្បង​ជា​បន្តបន្ទាប់​ទាំង​នេះ​បាន​បង្ក​ការ​ថ្កោលទោស​ពី​រដ្ឋាភិបាល​អាម៉េរិក និង​ជប៉ុន​និង​នាំ​ដល់​ការបើក​កិច្ចប្រជុំ​របស់​ក្រុមប្រឹក្សាសន្តិសុខ​អង្គការសហប្រជាជាតិ​ដែល​បាន​ដាក់​ទណ្ឌកម្ម​​លើ​កូរ៉េខាងជើង​ដោយសារ​តែ​រំលោភ​សេចក្តីសំរេចចិត្ត​របស់​ខ្លួន​មួយ​ស្តីពី​ការហាម​សាកល្បង​កាំជ្រួច​ផ្លោង​។​

​រដ្ឋាភិបាល​អាម៉េរិក​បាន​ដាក់​ទណ្ឌកម្ម​លើ​បុគ្គល​កូរ៉េខាងត្បូង​និង​រុស្ស៊ី​រួមទាំង​អង្គភាព​ជាច្រើន​នៅ​ខែ​នេះ ដោយ​ចោទប្រកាន់​ពួកគេ​ថា​បាន​ជួយ​កម្មវិធី​កាំជ្រួច​របស់​កូរ៉េខាងជើង ។​

​កាលពី​ថ្ងៃ​ពុធ ឧបការី​រង​ក្រសួងការបរទេស​អាម៉េរិក​សំរាប់​កិច្ចការ​ជប៉ុន​និង​កូរ៉េ លោក​ម៉ាក ឡាំ​ប៊ឺត​(Mark Lambert)​បាន​និយាយថា រដ្ឋាភិបាល​ក្រុង​វ៉ាស៊ីនតោន​គ្មាន​មន្ទិល​ទេ​អំពី​ការពិភាក្សា​ជា​​មួយ​កូរ៉េ​ខាងជើង និង​មានបំណង​ជួប​នៅ​កន្លែង​ណាមួយ​និង​ពិភាក្សា​អំពី​អ្វី​មួយ​ក៏​បាន​។​

​លោក​ថា «​យើង​ចង់​ពិភាក្សា​អំពី​ការរំសាយ​នុយគ្លេអ៊ែរ​របស់​កូរ៉េខាងជើង ហើយ​បើ​កូរ៉េ​ខាងជើង​មាន​បំណង​ធ្វើ​ដូច្នេះ រឿង​ជោគជ័យ​គ្រប់​ប្រភេទ​ទាំងអស់​អាច​នឹង​កើតឡើង​បាន​»៕

​វា​ជា​ការបាញ់​សាកល្បង​កាំជ្រួច​លើក​ទី​៦​របស់​កូរ៉េ​ខាងជើង​នៅ​ខែ​នេះ​