ដោយៈ សុវណ្ណ​កុម្ភៈ / ភ្នំពេញៈ វគ្គ​បណ្ដុះបណ្ដាល ចៅក្រម និង​អាជ្ញាកណ្តាល កីឡា​តេ​ក្វាន់​ដូ ITF(Intertnational Taekwondo Federation) កម្រិត “​ក​” ដែលមាន​សិក្ខាកាម ចូលរួម​ចំនួន ៣០ នាក់ មកពី ៩ រាជធានី​-​ខេត្ត និង​ក្រសួង ២ គឺ​ក្លិប​កីឡា​តេ​ក្វាន់​ដូ ITF ក្រសួងមហាផ្ទៃ ក្លិប​កីឡា​តេ​ក្វាន់​ដូ ITF ក្រសួង​សេដ្ឋកិច្ច និង​ហិរញ្ញវត្ថុ ក្លិប​កីឡា​តេ​ក្វាន់​ដូ ITF ខេត្តកណ្តាល ក្លិប​កីឡា​តេ​ក្វាន់​ដូ ITF ខេត្តកោះកុង ក្លិប​កីឡា​តេ​ក្វាន់​ដូ ITF ខេត្តកំពង់ស្ពឺ ក្លិប​កីឡា​តេ​ក្វាន់​ដូ ITF ខេត្ត​ត្បូងឃ្មុំ​ក្លិប កីឡា​តេ​ក្វាន់​ដូ ITF ខេត្តបាត់ដំបង ក្លិប​កីឡា​តេ​ក្វាន់​ដូ ITF ខេត្តបន្ទាយមានជ័យ និង​ក្លិប​កីឡា​តេ​ក្វាន់​ដូ ITF ភ្នំពេញ បានបញ្ចប់ នា​ល្ងាច ថ្ងៃទី​២៦ ខែមករា ឆ្នាំ​២០២២​។​

​វគ្គ​បណ្តុះបណ្តាល ដែលមាន​រយៈពេល ៦​ថ្ងៃនេះ ធ្វើឡើង​ក្នុង​គោលបំណង ពង្រឹង​សមត្ថ ភាព​បន្ថែមទៀត កាត់ក្តី​ដោយ​យុត្តិធម៌ លើ​ទីលាន​ប្រកួត និង​ត្រៀម SEA GAMES ឆ្នាំ​២០២៣ ដែល​កម្ពុជា​ធ្វើជា​ម្ចាស់ផ្ទះ​។​

​សូមបញ្ជាក់ថា នេះ​ជាវ​គ្គ​ដែល​បាន​ដំណើរការ ក្រោម​ការឧបត្ថម្ភ​ថវិកា របស់​ក្រ​សួង​អប់រំ យុវជន និង កីឡា ។​

​គ្រូឧទ្ទេស ២​រូប គឺ​លោក RI CHOl NAM គ្រូបង្វឹក​អន្តរជាតិ កម្រិត​ខ្សែក្រវាត់​ខ្មៅ ៨​ដាន់ និង​លោក ហ៊ឹម រី​ដា ខ្សែក្រវាត់​ខ្មៅ ៦​ដាន់ កម្រិត​អន្តរជាតិ​និង​ជា​គ្រូ​ជម្រើស ជាតិ កម្ពុជា​។​

​សហព័ន្ធ​កីឡា​តេ​ក្វាន់​ដូ ITF បាន​ខិតខំ​ប្រឹងប្រែង អភិឌ្ឍន៍​កីឡា កីឡា​តេ​ក្វាន់​ដូ ITF ទាំំ​ង​អាជ្ញាកណ្តាល និង​ចៅក្រម ព្រមទាំង​កីឡាករ​-​កីឡាការិនី​ឆ្នើម​ដណ្តើម មេដាយ លើ​ឆាក​អន្តរជាតិ ។​

​វគ្គ​បណ្តុះបណ្តាល​នេះ មាន​សារសំខាន់​ណាស់ សម្រាប់​ចៅក្រម និង​អាជ្ញា កណ្តាល ក្លាយ ជា​ចៅក្រម និង​អាជ្ញាកណ្តាល​អន្តរជាតិ​មុន​ព្រឹត្តិការណ៍​ការប្រកួត កីឡា SEA GAMES 2023 ដែល​កម្ពុជា​ធ្វើជា​ម្ចាស់ផ្ទះ​។

​បច្ចុប្បន្ន ប្រភេទ​កីឡា​តេ​ក្វាន់​ដូ មាន​អាជ្ញាកណ្តាល ចៅក្រម អន្តរជាតិ​ចំនួន ៣ នាក់​ហើយៗ សហព័ន្ធ គ្រោង​នឹង​ស្នើសុំ​ទៅ​សហព័ន្ធ​អន្តរជាតិ ដើម្បី​បញ្ជូន អាជ្ញាកណ្តាល ចៅក្រម​កម្ពុជា កម្រិត B ចំនួន ៦​នាក់​បន្ថែម ដើម្បីឱ្យ​សហព័ន្ធ តេ​ក្វាន់​ដូ ITF អន្តរជាតិ ទទួលស្គាល់ និង ប្រើប្រាស់​សម្រាប់ SEA GAMES 2023 ។ គម្រោង​សរុប ៩​នាក់ នៃ​អាជ្ញាកណ្តាល -​ចៅក្រម សម្រាប់​ស៊ី​ហ្គេម ឆ្នាំ​២០២៣ គឺ​គ្រប់គ្រាន់​ហើយ ដោយ​បណ្តា​ប្រទេស ក្នុង​អាស៊ីអាគ្នេយ៍ ដែល​គ្រោង​មក ៧ ប្រទេស ដោយ​បញ្ជូន​អាជ្ញាកណ្តាល​-​ចៅក្រម​ម្នាក់ ឬ ២ នាក់​បន្ថែមទៀត គឺអាច​ដំណើរការ ហ្គេម​នេះ​បាន​ហើយ​។​

​សូមបញ្ជាក់ថា លោក កែវ រ៉េមី ប្រធាន​សហព័ន្ធ​កីឡា​តេ​ក្វាន់​ដូ ITF កម្ពុជា និង​ជា ប្រធាន​សហព័ន្ធ​កីឡា​តេ​ក្វាន់​ដូ ITF អាស៊ីអាគ្នេយ៍ ផង​នោះ បានបង្ហាញ​នូវ មហិច្ឆតា​ថាៈ សម្រាប់​ស៊ី​ហ្គេម​ឆ្នាំ​២០២៣ តេ​ក្វាន់​ដូ ITF កម្ពុជា នឹង​ដណ្ដើមយក មេដាយមាស ឲ្យ​បាន ១៥ គ្រឿង ។ ទោះបីជា​យ៉ាងណា ក៏​លោក​ទទួលស្គាល់ថា នេះ​ពិតជា​បន្ទុក​មួយ​ដ៏​ធ្ងន់ធ្ងរ ៕/V​-PC