​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ តម្លៃ​ប្រេង​បាន​កើនឡើង​នៅ​ថ្ងៃ​សុក្រ​ទី​៤​កុម្ភៈ​នេះ ដោយ​ពង្រីក​ការ​ឡើងថ្លៃ​យ៉ាងខ្លាំង​នៅក្នុង​វគ្គ​ជួញដូរ​ប្រេង​មុន​នេះ​ដែល​បង្កឡើង​ដោយ​ការ​ព្រួយ​​បារម្ភ​អំពី​ការផ្គត់ផ្គង់​មិន​ជាប់លាប់ និង​ខណៈ​អាកាសធាតុ​ត្រជាក់​នៅ​ទូទាំង​សហរដ្ឋ​អាម៉េរិក​គំរាម​រំខាន​ដល់​ការផ្គត់ផ្គង់​ប្រេង​ដ៏​ផុយ​ស្រួយ​ថែម​ទៀត​។​

​ប្រេង​ឆៅ​នៅ​ទីផ្សារ Brent​បាន​កើនឡើង ១៦ សេន ឬ ០,២ ភាគរយ​ស្មើនឹង ៩១,២៧ ដុល្លារ​ក្នុង​មួយ​បារ៉ែល​គិត​ត្រឹម​ម៉ោង ០១៖០២ ម៉ោង​សកល បន្ទាប់ពី​បាន​ឡើងថ្លៃ ១,១៦ ដុល្លារ​កាលពី​ថ្ងៃ​ព្រហស្បតិ៍​។​

​ប្រេង​ឆៅ​នៅ​ទីផ្សារ WTI របស់​អាម៉េរិក​បាន​កើនឡើង ២៨ សេន ឬ ០,៣​ភាគរយ​ស្មើនឹង ៩០,៥៥ ដុល្លារ​ក្នុង​មួយ​បារ៉ែល ក្រោយ​បាន​ឡើងថ្លៃ ២,០១ ដុល្លារ​កាលពី​ថ្ងៃ​ព្រហស្បតិ៍ ពោលគឺ​ឡើងថ្លៃ​លើសពី ៩០ ដុល្លារ​ជា​លើកដំបូង​ចាប់តាំងពី​ថ្ងៃទី ៦ ខែតុលា ឆ្នាំ ២០១៤​។​

​តម្លៃ​គោល​ទាំង​ពីរ​កំពុង​ឆ្ពោះទៅ​រក​ការ​ឡើងថ្លៃ​ប្រចាំ​សប្តាហ៍​ទី​ប្រាំពីរ​ជាប់ៗ​គ្នា​។​

​លោក អេ​ដវ៉ា​ដ ម៉ូ​យ៉ា (Edward Moya) ជា​អ្នកវិភាគ​ទីផ្សារ​ជាន់ខ្ពស់​នៅ​ក្រុមហ៊ុន OANDA បាន​និយាយថា “​ប្រេង​ឆៅ​នៅ​ទីផ្សារ WTI បាន​កើនឡើង​លើស​ពី​កម្រិត ៩០​ដុល្លារ​បន្ទាប់​ពី​ការផ្ទុះ​​មួយ​នៅ​តំបន់​អាក់​ទិក​បាន​បង្អាក់ដំណើរ​ដឹកជញ្ជូន​ទៅ​កាន់​រដ្ឋ​តិច​សាស់​និង​រំខាន​ដល់​ការផលិត​ប្រេង​មួយ​ចំនួន​នៅ​អាង​ប្រេង​ភើ​មែន (Permian)”៕