ដោយៈ​ប​.​ខុន​/​ភ្នំពេញៈការធ្លាក់​ភ្លៀង​ខុស​ប្រក្រតី​នឹង​ចាប់ផ្តើម​កើតមាន​ពីថ្ងៃ​ទី​៨​ខែកុម្ភៈ​បន្ទាប់ពី​ខ្យល់មូសុង​ឦសាន​ថយចុះ​ឥទ្ធិពល​ហើយ​ការធ្លាក់​ភ្លៀង​រាល់ថ្ងៃ​មិន​ធ្លាប់មាន​នៅក្នុង​ខែកុម្ភៈ ពីមុន​មកនេះ​មាន​បរិមាណ​ច្រើនឡើង​ក្នុង ក្របខណ្ឌ ទូទាំងប្រទេស​នៅ​អំឡុង​ពាក់កណ្តាល​ខែកុម្ភៈ​ហើយ​នៅពេលនេះ​ភ្លៀង​ក៏មាន​ធ្លាក់​ដែរ​តែមាន​កម្រិត​តិចតួច​និង​មាន​នៅតែ តំបន់​មាត់សមុទ្រ​និង​ទំនាប កណ្តាល​ភាគ​ពាយព្យ​។​

​លោក ចាន់ យុ​ត្ថា អ្នកនាំពាក្យ​និង​ជា​រដ្ឋលេខាធិការ​ក្រសួង​ធនធានទឹក និង​ឧតុនិយម​បាន​ប្រាប់​ឱ្យ​រស្មី​កម្ពុជា​ដឹង​នៅ​ថ្ងៃទី​៤​ខែកុម្ភៈ​ឆ្នាំ​២០២២​ថា ចាប់ពី​ថ្ងៃទី​៧​ខែកុម្ភៈ ខ្យល់មូសុង​ឦសាន​ចាប់ផ្តើម​ថយឥទ្ធិពល​តែ​មិន ទាន់​អស់ទាំង​ស្រុង​ទេ​និង​ចាប់ពី​ថ្ងៃទី​៨ ខែកុម្ភៈ​ទៅ​ការធ្លាក់​ភ្លៀង​រាយប៉ាយ បានចាប់ផ្តើម​តែ​មិនទាន់​ខ្លាំង​ទេ​រហូតដល់​ពាក់កណ្តាល​ខែ កុម្ភៈ​ទើប​មាន ភ្លៀង​ច្រើន​មិន​ធ្លាប់មាន​ពីមុនមក ដោយសារ​បាតុភូត​មាន​ឥទ្ធិពល​ខ្លាំង រុញ​មកពី​សមុទ្រ​ចិន​ខាងត្បូង​។​
អ្នកនាំពាក្យ​ក្រសួង​ជំនាញ​ខាងលើ​និយាយ​ឱ្យដឹងទៀតថា​សម្រាប់​ពេលនេះ​(​ថ្ងៃទី​៤​ខែកុម្ភៈ​) ការធ្លាក់​ភ្លៀង​មាននៅ​តែ​តំបន់​មាត់សមុទ្រ និង ទំនាប​កណ្តាល​ភាគ ពាយព្យ​ដោយសារ​សម្ពាធ​ទាប​រុញ​មកពី​ភាគ​អ​គ្នេ​យ៍ តែ​ការ​ធ្លាក់ភ្លៀង​នៅ មិនទាន់​ច្រើន​រួច​ដោយសារ​សម្ពាធ​ខ្ពស់​បាន​រុញ​ចុះមក​ខ្លាំង​។ ប៉ុន្តែ​ចាប់ពី ថ្ងៃទី​៨​ខែកុម្ភៈ​ទៅជា​ពិសេស​នៅ​អំឡុង ពាក់កណ្តាល​ខែកុម្ភៈ គឺមាន​ភ្លៀង​ធ្លាក់ ច្រើន​រាល់ថ្ងៃ​ក្នុង​ក្របខណ្ឌ​ទូទាំងប្រទេស​។​
ចំណែក​បរិមាណ​ទឹកភ្លៀង​ដែល​បាន​ធ្លាក់​រយៈពេល​២៤​ម៉ោង​ត្រឹម​ព្រឹក​ថ្ងៃទី​៤​ខែកុម្ភៈ​នៅ​ខេត្ត​ប៉ៃលិន​មាន​ភ្លៀង​កម្រិត​ខ្សោយ​, បាត់ដំបង​មាន​កម្រិត​ពី​តិច​ដល់ ៤១​មី​លី​ម៉ែត្រ​,​សៀមរាប​ពី​តិច​ដល់​១៣​មី​លី​ម៉ែត្រ​,​កោះកុង​មាន​កម្រិត​ពី​១​ដល់​៥​មី​លី​ម៉ែត្រ​,​ពោធិសាត់​មាន​កម្រិត​ពី​១​ដល់​១៣​មី​លី​ម៉ែត្រ​,​កណ្តាល​ពី​តិច​ដល់​២២​មី​លី​ម៉ែត្រ​,​ស្វាយរៀង ពី​តិច​ដល់​៣៣​មី​លី​ម៉ែត្រ​,​ឧ​ត្ត​រ​មានជ័យ​ពី​តិច​ដល់​១៦ មី​លី​ម៉ែត្រ​,​កំពង់ស្ពឺ​មាន​ភ្លៀង​កម្រិត​ខ្សែ​ង​ក្រូច​,​ព្រៃវែង​មាន​កម្រិត​ពី​តិច​ដល់​១១​មី​លី​ម៉ែត្រ​,​តាកែវ​មាន​កម្រិត​ពី​១​ដល់​៨​មី​លី ម៉ែត្រ​,​និង​ខេត្ត​ត្បូងឃ្មុំ​មាន ភ្លៀង​កម្រិត​តិចតួច​។​

​ក្រសួង​ធនធានទឹក​និង​ឧតុនិយម​កាលពី​ថ្ងៃទី​៣​ខែកុម្ភៈ​នេះ​បាន​ជូនដំណឹង​ពី​ការ​ព្យាករ​អាកាសធាតុ​លើក​ទី​១​សម្រាប់​រដូវប្រាំង​និង​ដើមរដូវ​វស្សា​ឆ្នាំ​២០២២​ថា ដោយ យោងតាម​ការវិវត្ត​អាកាសធាតុ​ជាស​កល​នៅក្នុង​តំបន់ ក៏ដូចជា​នៅ ក្នុងប្រទេស​ឃើញថា​សីតុណ្ហភាព​អប្បបរមា​ក្នុង​ខែកុម្ភៈ​ស្ថិតនៅក្នុង​រង្វង់​ពី​១៨​ទៅ​២១​អង្សា​សេ នៅ​តំបន់​មាត់សមុទ្រ​ស្ថិតក្នុង​រង្វង់​ពី​២០​ទៅ​២៣​អង្សា​សេ នៅក្នុង ខែមេសា​និង​ឧសភា​សីតុណ្ហភាព​អតិបរមា​មាន​ជា​មធ្យម​ពី​៣៥​ទៅ​៣៩​អង្សា​ស អាចមាន​ភ្លៀង​កក់ខែ​ធ្លាក់​ពី​មធ្យម​ទៅ​ច្រើន​ហើយ​រដូវវស្សា​និង​ចូលមក​ដល់​នៅ​ដើមខែ​ឧសភា​។

​ក្នុង​សេចក្តីជូនដំណឹង​ដែល​ចុះហត្ថលេខា​ដោយ​លោក លឹម គានហោ រដ្ឋមន្ត្រី ក្រសួង​ធនធានទឹក​និង​ឧតុនិយម​នេះ​បាន​សរសេរ​លម្អិត​ថា​ផ្អែក​តាម​ការជូនដំណឹង​ជា សកល ស្តីពី​ស្ថានភាព​សីតុណ្ហភាព​លើ​ផ្ទៃ​មហាសមុទ្រ​ប៉ាស៊ីហ្វិក​បាន បង្ហាញ​ឲ្យ​ឃើញថា​ចាប់ពី​ខែកុម្ភៈ​ដល់​ខែឧសភា​ឆ្នាំ​២០២២ ព្រះរាជា​ណា ចក្រ​កម្ពុជា​នៅ​បន្ត​ទទួលរង​នូវ​ឥទ្ធិពល​ពី​បាតុភូត​ឡា​នី​ណា (La Nina) ប្រមាណ​ជា​៨៥​ភាគរយ​និង​ថយចុះ​សន្សឹមៗ​ឆ្ពោះទៅរក​បាតុភូត​Neutral ដែលជា​បាតុភូត​នៅ​ចន្លោះ​រវាង​អែល​នី​ណូ El Nino(​ក្តៅ​) និង​ឡា​នី​ណា La Nina(​ត្រជាក់​)​ប្រមាណ​ជា​៧០​ភាគរយ​វិញ ព្រម​ពេល​ជាមួយគ្នា​នឹង​បាតុភូត El Nino កើន​បាន​ប្រមាណ​ជា​១០​ភាគរយ​។

​នៅក្នុង​សេចក្តីជូនដំណឹង​បានបង្ហាញ​ឱ្យឃើញ​ទៀតថា​ក្នុង​រដូវប្រាំង​នេះ​សីតុណ្ហភាព​អាច​ស្ថិត​ទាប​ជាង​មធ្យម​ភាគច្រើន​ឆ្នាំ​។​នៅក្នុង​ខែកុម្ភៈ​បណ្តា​ខេត្ត​នៅ​តំបន់​ទំនាប​កណ្តាល សីតុណ្ហភាព​អប្បបរមា​ស្ថិតនៅក្នុង​រង្វង់​ពី​២១​ទៅ​២៤​អង្សា​សេ​។ នៅ​តំបន់​ខ្ពង់រាប​និង​តំបន់​ជួរ​ភ្នំ សីតុណ្ហភាព​អប្បបរមា​អាច​ស្ថិតនៅក្នុង​រង្វង់ ពី​១៨​ទៅ​២១​អង្សា​សេ​និង​តំបន់​មាត់សមុទ្រ​សីតុណ្ហភាព​អប្បបរមា​អាច​ស្ថិតក្នុង​រង្វង់​ពី​២០​ទៅ​២៣​អង្សា​សេ​។ ចាប់ពី​ខែមេសា​ដល់​ខែឧសភា​សីតុណ្ហភាព​នឹង​កើន ឡើងជា​បន្តបន្ទាប់​ក្នុងនោះ​បណ្តា​ខេត្ត​នៅ​តំបន់​ទំនាប​កណ្តាល សីតុណ្ហភាព មធ្យម​អតិបរមា​អាចមាន​ពី​៣៥​ទៅ​៣៨​អង្សា​សេ​។​នៅ​តំបន់​ខ្ពង់រាប​និង​តំបន់​ជួរ​ភ្នំ សីតុណ្ហភាព​មធ្យម​អតិបរមា​អាចមាន​ពី​៣៤​ទៅ​៣៧​អង្សា​សេ​សម្រាប់​តំបន់​មាត់សមុទ្រ សីតុណ្ហភាព​មធ្យម​អតិបរមា​អាច​នឹងមាន​ពី​៣២​ទៅ​៣៥​អង្សា​សេ​។ នៅក្នុង​ខែមេសា​និង​ខែឧសភា​សីតុណ្ហភាព​អតិបរមា​អាច​នឹង​កើន​ដល់​ក្នុង​រង្វង់​ពី​៣៧​ទៅ​៣៩​អង្សា​សេ ។

​នៅក្នុង​សេចក្តីជូនដំណឹង​សរសរ​ទៀតថា​ស្ថានភាព​ទឹកភ្លៀង​អាច​នឹងមាន​កម្រិត​ខ្ពស់ជាង​មធ្យមភាគ​ច្រើន​ឆ្នាំ​និង​ច្រើនជាង​ឆ្នាំ​២០២១​។​ចាប់ពី​ខែកុម្ភៈ​រហូតដល់​ដើមខែ​ឧសភា​អាចមាន​ភ្លៀង​កក់ខែ​ពី​មធ្យម​ទៅ​ច្រើន​។ ទន្ទឹម​នោះ​ក៏មាន​បាតុភូត​ផ្គរ រន្ទះ​និង​ខ្យល់​កន្ត្រាក់​ច្រើន​ផងដែរ ។

​លោក លឹម គានហោ បានបញ្ជាក់​នៅក្នុង​សេចក្តីជូនដំណឹង​របស់​ខ្លួន​ថា​សម្រាប់ ដើមរដូវ​វស្សា​ឆ្នាំ​២០២២​នៅ​តំបន់​វាលទំនាប​និង​តំបន់​មាត់សមុទ្រ​អាច​នឹង​ចាប់ផ្តើម​នៅ​សប្តាហ៍​ទី​១ នៃ​ខែឧសភា និង​តំបន់​ខ្ពង់រាប អាច​នឹង​ចាប់ផ្តើម​នៅ​សប្តាហ៍ ទី​២​នៃ​ខែឧសភា​។​ទោះបី​នៅក្នុង​រដូវប្រាំង​និង​ដើមរដូវ​វស្សា​អាច​នឹងមាន​ភ្លៀង​កក់ខែ​ច្រើន តែ​បរិ មាណទឹក​ភ្លៀង​ដែល​ធ្លា​ក់មក មិនទាន់​សមល្មម​ក្នុងការ​ប្រើប្រាស់ ឆ្លើយតប​តាម​តម្រូវការ​ភ្លាមៗ​នោះទេ​។​អាស្រ័យហេតុនេះ​សូម​បងប្អូន​បន្ត​រក្សា​និង​ប្រើប្រាស់​ទឹក​ដោយ​សន្សំសំចៃ ជាពិសេស​បណ្តា​តំបន់​ជនបទ​ដាច់ស្រយាល ដែល​នៅ​ឆ្ងាយ​ពី​ប្រភពទឹក​៕​/PC