ដោយៈ​គង់​ហេង​/​កំពង់ចាមៈ​ក្នុងឱកាស​បុណ្យចូលឆ្នាំ​ប្រពៃណី​ចិន​-​វៀតណាម​ចំនួន​បួន​ថ្ងៃ​បាន​កន្លងផុត​ទៅនេះ​មាន​ទេសចរ​ជិត​បួន​ពាន់​នាក់​បានមក​កម្សាន្ត​នៅ​រមណីយដ្ឋាន​ឆ្នេរ​ខ្សាច់​កោះ​ប៉ែន​ច្រើនជាងគេ​បើ​ធៀប​នឹង​បណ្តា​រមណីយដ្ឋាន​ផ្សេងទៀត​ក្នុង​ខេត្ត​ដែលមាន​ចំនួន​ប្រាំបី​កន្លែង​។​ទន្ទឹមនេះ​ដើម្បី​ជាការ​លើក​ទឹក​ថែមទៀត លោក អ៊ុន ចាន់​ដា អភិបាលខេត្ត​កំពង់ចាម ក៏បាន​ដឹកនាំ​សហការី​ជាច្រើនរូប​អញ្ជើញ​ទៅ​ទីនោះ​ដោយផ្ទាល់​ផងដែរ​កាលពី​ថ្ងៃទី​២​ខែកុម្ភៈ​។​

លោក អ៊ុន ចាន់​ដា អភិបាលខេត្ត​កំពង់ចាម ក៏បាន​ដឹកនាំ​សហការី​ជាច្រើនរូប​អញ្ជើញ​ទៅ​ទីនោះ​ដោយផ្ទាល់​ផងដែរ​កាលពី​ថ្ងៃទី​២​ខែកុម្ភៈ(រូបថត គង់ ហេង)

​លោក ស៊ាន សុ​គុន ប្រធាន​មន្ទីរ​ទេសចរណ៍​ខេត្តកំពង់ចាម​បាន​ប្រាប់ឱ្យដឹង​នៅ​ថ្ងៃទី ៤ ខែកុម្ភៈ​នេះ​ថា ក្នុងចំណោម រមណីយដ្ឋាន​ចំនួន​ប្រាំបី​កន្លែង​របស់​ខេត្តកំពង់ចាម​ដែល​ទាក់ទាញ​ភ្ញៀវ​ឱ្យទៅ​កម្សាន្ត​បាន​ជិត​បួន​ពាន់​នាក់​។ លោក​បន្តថា មានតែ​រមណីយដ្ឋាន​ឆ្នេរ​ខ្សាច់​កោះ​ប៉ែន​ទេ​ដែលមាន​ស្ពាន​ប្រដឹស​ឬ​ស្សី​ប្រវែង​ជិត​មួយ​គីឡូម៉ែត្រ​រួមជាមួយ​អាហារ​ដ្ឋា​ន​ជាច្រើន កន្លែង​។ មាន​ឆ្នេរ​ខ្សាច់​និង​ទឹកទន្លេ​រាក់​ល្មម​អាចឱ្យ​ភ្ញៀវ​ទាំងឡាយ​ចុះ​មុជ​លេង​យ៉ាង​រីករាយ​។​

​លោក​ប្រធាន​មន្ទីរ​ដដែល​ឱ្យដឹងទៀតថា ក្រៅពី​រមណីយដ្ឋាន​ឆ្នេរ​ខ្សាច់​កោះ​ប៉ែន ភ្ញៀវ​ក៏បាន​ទៅលេង​តាម​រមណីយដ្ឋាន ចំនួន​ប្រាំពីរ​កន្លែង​ផ្សេងទៀត ដែលមាន​ចំនួន ១៧.១៣៥ នាក់​។ លោក​បន្តថា ឆ្នាំនេះ​នៅតាម​បណ្តា​មូលដ្ឋាន​អាជីវកម្ម សេវាកម្ម និង​តាម​រមណីយដ្ឋាន​មាន​សន្តិសុខ សណ្តាប់ធ្នាប់​របៀបរៀបរយ​ល្អ​ហើយ​បាន​អនុវត្ត​វិធានការ​របស់​រាជរដ្ឋាភិបាល ក៏​ដូច​ការណែនាំ​របស់​ក្រសួងសុខាភិបាល​។​ចំណែក​ភ្ញៀវ​ក៏មាន​ការប្រុងប្រយ័ត្ន​ខ្ពស់​ដោយបាន​ពាក់​ម៉ាស​និង​ចូលរួម​អនុវត្ត​ការណែនាំ​របស់​រាជរដ្ឋាភិបាល​ដូចគ្នា​។​

​លោក​បន្ត​ដោយ​កត់សម្គាល់ថា បន្ទាប់ពី​បើក​ប្រទេស​ឡើងវិញ​ពិសេស​ក្នុងអំឡុង​បុណ្យចូលឆ្នាំ​ចិន​កន្លងទៅ​យើង​សង្កេត ឃើញថា ក្នុង​ដំណើរ​កម្សាន្ត​នៅ​រមណីយដ្ឋាន​ការចំណាយ​ជា​មធ្យម​របស់​ភ្ញៀវ​ក្នុង​ម្នាក់​ចាប់ពី ពីរម៉ឺន រៀល ដល់​ប្រាំមួយ​ម៉ឺន​រៀល​។​

​សូមបញ្ជាក់ថា​បច្ចុប្បន្ន​ខេត្តកំពង់ចាម​មាន​រម​ណី​យ​ដ្ឋា​ន​ចំនួន​ប្រាំបី​កន្លែង​គឺ​រមណីយដ្ឋាន​ទឹកឆា​,​រមណីយដ្ឋាន​ក​សិ​-​ថ្មដា​ទឹកឆា​,​រមណីយដ្ឋាន​ភ្នំ​ហាន់ជ័យ​,​រមណីយដ្ឋាន​បែ​ម​ប៊ូ​រី​សត​,​រមណីយដ្ឋាន​ភ្នំ​ប្រុស​ភ្នំ​ស្រី​,​រមណី​ដ្ឋា​នន​គរ​បា​ជ័យ​,​រមណីយដ្ឋាន​ភ្នំ​ជើងព្រៃ និង​រមណីយដ្ឋាន​ឆ្នេរ​ខ្សាច់​កោះ​ប៉ែន​៕​សរន​

រមណីយដ្ឋាន​ឆ្នេរ​ខ្សាច់​កោះ​ប៉ែន ទាក់ទាញ​ភ្ញៀវ​បាន​ច្រើនជាងគេ​ក្នុងឱកាស​បុណ្យចូលឆ្នាំ​ចិន​កន្លងទៅ​(រូបថត គង់ ហេង)