​ប្រែ​សម្រួលៈ​បំណង​/​មូ​ស្គូ​(​ដេល្លី​ម៉េល​)៖ រុស្ស៊ី​និង​ចិន​កាលពី​ថ្ងៃ​សុក្រ​ទី​៤​កុម្ភៈ បាន​អំពាវនាវ​អោយ​អង្គការ​ណា​តូ​ឈប់​ពង្រីក​មាឌ​តាមរយៈ​បង្កើន​សមាជិក​របស់​ខ្លួន​ថែម​នៅពេល​រដ្ឋាភិបាល​ក្រុង​មូ​ស្គូ​​បាន​និយាយថា ខ្លួន​គាំទ្រ​ទាំងស្រុង​គោលជំហរ​របស់​រដ្ឋាភិបាល​ចិន​អំពី​បញ្ហា​តៃវ៉ាន់​និង ប្រឆាំង​ឯករាជ្យភាព​របស់​កោះ​នេះ​ក្នុង​ទំរង់​ណាមួយ​ក៏ដោយ​។​

​សេចក្តីថ្លែងការណ៍​រួម​មួយ​បាន​និយាយថា «​កម្លាំង​ខ្លះ​តំណាង​អោយ​សម្លេង​ភាគ​តិច​មួយ​នៅ​លើ​ឆាក​អន្តរជាតិ​តែ​បន្ត​ជំរុញ​មធ្យោបាយ​ឯ​តោ​ភាគី​ដើម្បី​ដោះស្រាយ​បញ្ហា​អន្តរជាតិ និង​ព្យាយាម​អនុវត្ត​​គោល​នយោបាយ​យោធា​។​ភាគី​ទាំងពីរ ចិន​និង​រុស្ស៊ី​ប្រឆាំង​ការពង្រីក​អង្គការ​ណា​តូ​បន្ថែម ហើយ​អំពាវនាវ​អោយ​សម្ពន្ធភាព​អា​ត្លង់​ទិច​ខាងជើង​(​ណា​តូ​)​បោះបង់​ចោល​មនោគមវិជ្ជា​សង្គ្រាមត្រជាក់​»​។​

​សេចក្តីថ្លែងការណ៍​ក៏បាន​និយាយថា រុស្ស៊ី​បញ្ជាក់​អះអាង​ឡើងវិញ​ថា តៃវ៉ាន់​ជា​ផ្នែក​មួយ​នៃ​ទឹកដី​ចិន និង​ប្រឆាំង​ឯករាជ្យភាព​តៃវ៉ាន់​ទោះ​ក្នុង​រូបភាព​ណាក៏ដោយ​។​

​ប្រធានាធិបតី​ចិន ស៊ី ជីន​ភីង និង​សម​ភាគី​រុស្សី ថត​រួមគ្នា​មុន​ជួបប្រជុំ​នៅ​ក្រុង​ប៉េកាំង​កាលពី​ថ្ងៃ​៤​កុម្ភៈ​

​សេចក្តីថ្លែងការណ៍​រួម​គ្នា​នេះ​ចេញ​ក្នុងអំឡុងពេល​ប្រធានាធិបតី​រុស្ស៊ី​បាន​ទៅដល់​ចិន​ដើម្បី​ចូលរួម​ការបើក​កីឡា​អូ​ឡាំ​ពិ​ច​រដូវរងា​និង​ជួបប្រជុំ​ផ្ទាល់​ជាមួយ​សម​ភាគី​ចិន ។​វា​ក៏​បាន​កើតឡើង បន្ទាប់​​ពី​រដ្ឋមន្ត្រី​ការបរទេស​នៃ​ប្រទេស​ទាំង​ពីរ​ជួបប្រជុំ​គ្នា​នៅ​ក្រុង​ប៉េកាំង​ដើម្បី​ត្រៀម​សំរាប់​ជំនួប​កំពូល​នៅ​ថ្ងៃ​សុក្រ​នេះ​រវាង​លោក​ប្រធានាធិបតី​ស៊ី ជីន​ភីង និង​លោក​វ្ល៉ា​ឌី​មៀ ពូ​ទីន​។​

​រដ្ឋមន្ត្រីការបរទេស​ចិន​លោក​វ៉ាង យី បាន​និយាយ​កាលពី​ថ្ងៃ​ព្រហស្បតិ៍​ថា ភារកិច្ច​ចម្បង​នៃ​ជំនួប​របស់លោក​ជាមួយ​សម​ភាគី​រុស្ស៊ី សឺ​ជេ ឡាវ​រ៉ូវ គឺ​ដើម្បី​បង្កើត​ការត្រៀម​កិច្ចការ​នយោបាយ​ចុងក្រោយ​​សំរាប​ជំនួប​ទល់មុខ​ផ្ទាល់​រវាង​ប្រមុខ​រដ្ឋ​នៃ​ប្រទេស​ទាំង​ពីរ​។​

​លោក​វ៉ាង​បាន​និយាយថា​«​ដឹកនាំ​ដោយ​ការមូល​មតិ​រវាង​ប្រមុខ​រដ្ឋ​ទាំង​ពីរ ចិន​ត្រៀម​ខ្លួន​ធ្វើការ​ជាមួយ​រុស្ស៊ី​ដើម្បី​ពង្រឹង​មិត្តភាព​និង​ការសម្របសម្រួល​ជា​យុទ្ធសាស្ត្រ​ពិស្តារ​រវាង​ប្រទេស​ទាំង​ពីរ ដោយ​​ប្រកាន់ខ្ជាប់​ភាពត្រឹមត្រូវ​និង​យុត្តិធម៌​អន្តរជាតិ ព្រមទាំង​នាំ​មក​ផលប្រយោជន៍​ដល់​ប្រជាជន​នៃ​ប្រទេស​ទាំង​ពីរ​និង​ពិភពលោក​ទាំងមូល​»​។​

​លោក​ក៏​បាន​អំពាវនាវ​អោយ​ភាគី​ទាំង​ពីរ​បង្កើត​កុងសង់ស៊ីស​(​ការមូល​មតិ​គ្នា​)​នៅក្នុង​ការប្រយុទ្ធ​នឹង​ជំងឺឆ្លង​រាតត្បាត ជំរុញ​ការជឿទុកចិត្ត​និង​យោគយល់​គ្នា ពង្រឹង​វិធានការ​ទប់ស្កាត់​ការឆ្លង​រាលដាល​​កូវី​ដ​១៩​កាត់​ព្រំដែន ធានា​ការដោះដូរ​ទស្សនកិច្ចរ​បស់​មន្ត្រី​និង​ពាណិជ្ជកម្ម ហើយ​នឹង​ជំរុញ​ការ​អភិ​វ​ឌ្ឈ​រយៈពេល​វែង​និង​ដោយ​ចីរភាព​ចេញពី​កិច្ចសហប្រតិបត្តិការ​ទ្វេភាគី​។​

​សំរាប់​ភាគី​រុស្ស៊ី លោក​ឡាវ​រ៉ូវ បាន​និយាយថា រុស្ស៊ី​វាយ​តំលៃ​ខ្ពស់​កិច្ចខិតខំ​របស់​ចិន​ដើម្បី​ពង្រឹង​កិច្ច​សហការ​ទ្វេភាគី ហើយ​រុស្ស៊ី​ត្រៀម​ធ្វើការ​ជាមួយ​ចិន​ដើម្បី​កិច្ចសហការ​ធំ​ឡើង​រវាង​សហភាព​សេដ្ឋកិច្ច​អឺ​រ៉ា​​ស៊ីយ៉ា​(Eurasia)​និង​គំនិត​ផ្តួចផ្តើម​អំពី​ខ្សែក្រវាត់​និង​ផ្លូវ​ដើម្បី​ពង្រីក​ផលប្រយោជន៍​រួម​។​

​ភាគី​ទាំងពីរ​ក៏​បាន​ព្រមព្រៀង​គ្នា​ថា​នឹង​ជ្រោង​ស្មារតី​អូឡាំពិក រួម​គ្នា​ច្រាន​ចោល​ការយក​កីឡា​ធ្វើជា​រឿង​នយោបាយ និង​គាំទ្រ​ព្រឹត្តិការណ៍​អូ​ឡាំ​ពិ​ច​រដូវរងារ​ក្រុង​ប៉េកាំង​។​មន្ត្រីការទូត​កំពូល​នៃ​ប្រទេស​ទាំង​​ពីរ​បាន​បង្ហាញ​ជំហរ​រួម​ក្នុង​ការការពារ​សន្តិភាព​និង​ស្ថិរភាព​នៅក្នុង​តំបន់​អាស៊ី​ប៉ាស៊ីហ្វិក​និង​ប្រឆាំង​ការប៉ុនប៉ង​ណាមួយ​ដើម្បី​បង្កើត​ប្លុក​ប្រឈមមុខ​៕

​គណៈប្រតិភូ​ការបរទេស​ចិន​និង​រុស្ស៊ី​ជួបប្រជុំ​កាលពី​ថ្ងៃ​ព្រហស្បតិ៍​ដើម្បី​ត្រៀម​កិច្ចការ​នយោបាយ​ចុងក្រោយ​សំរាប់​ជំនួប​កំពូល​នៅ​ថ្ងៃ​សុក្រ​រវាង​ប្រមុខ​រដ្ឋ​ចិន​-​រុស្ស៊ី​