​ប្រែ​សម្រួល : កញ្ញា​ដា​លី​ស (​ដេលី​មែ​ល​) ៖ ភាគហ៊ុន​របស់ Facebook បានបញ្ចប់​ការលក់​ចេញ​យ៉ាង​គំហុក​របស់ខ្លួន បន្ទាប់​ពី​នាយក​ប្រតិបត្តិ​លោក ម៉ាក ហ្សាក់​ឃើ​បឺ​កបានបាត់បង់​ទ្រព្យស​ម្ប​ត្តិ​​សរុប​ចំនួន ៣០ ពាន់​លាន​ដុល្លារ ខណៈ​ដែល​លោក ជេ​ហ្វ បេ​ហ្សូ​ស (Jeff Bezos) បាន​កើន​ទ្រព្យសម្បត្តិ ២០ ពាន់​លាន​ដុល្លារ ខណៈ​ដែល​ភាគហ៊ុន​របស់​ក្រុមហ៊ុន Amazon បាន​កើនឡើង​។​

​ភាគហ៊ុន Meta របស់ Facebook បាន​បញ្ចប់​វគ្គ​ជួញដូរ​កាលពី​ថ្ងៃ​សុក្រ​ទី​៤​កុម្ភៈ​នៅ​តម្លៃ ២៣៧,០៩ ដុល្លារ ប៉ុន្តែ​បាន​ធ្លាក់ចុះ ២១​ភាគរយ​តាំងពីដើម​សប្តាហ៍​បន្ទាប់ពី​ចេញផ្សាយ​របាយការណ៍​​ប្រាក់ចំណូល​ដ៏​មហន្តរាយ​និង​វគ្គ​ជួញដូរ​ដ៏​អាក្រក់​បំផុត​របស់​ក្រុមហ៊ុន​កាលពី​ថ្ងៃ​ព្រហស្បតិ៍​។​

​ភាគហ៊ុន Meta បាន​ធ្លាក់ចុះ ២៦ ភាគរយ​កាលពី​ថ្ងៃ​ព្រហស្បតិ៍​បន្ទាប់ពី​ក្រុមហ៊ុន​បាន​រាយការណ៍​ពី​ការធ្លាក់​ចុះ​ចំនួន​អ្នកប្រើប្រាស់​សកម្ម​ប្រចាំ​ថ្ងៃ​ជា​លើកដំបូង​មិន​ធ្លាប់​មាន ដោយ​នាំ​ឱ្យ​ខាតបង់ ២៣៧ ពាន់​លាន​ដុល្លារ​ពី​មូលធន​នីយកម្ម​ទីផ្សារ​របស់​ខ្លួន ក្នុង​ការខាតបង់​ដ៏​ធំ​បំផុត​មិន​ធ្លាប់​មាន​ក្នុង​មួយ​ថ្ងៃ​របស់​ក្រុមហ៊ុន​។​

​ទ្រព្យសម្បត្តិ​សុទ្ធ​របស់​លោក​ហ្សាក់​ឃើ​បឺ​កបានធ្លាក់ចុះ​ប្រហែល ៣០ ពាន់​លាន​ដុល្លារ​ចាប់តាំងពី​របាយការណ៍​ប្រចាំត្រីមាស​របស់ Facebook បាន​ចេញផ្សាយ​កាលពី​ថ្ងៃ​ពុធ​ដោយ​រុញ​គាត់​ចេញ​ពី​បញ្ជី​​មហាសេដ្ឋី​កំពូល​ទាំង ១០ របស់​ទស្សនា​វ​ដ្តី Forbes ដែល​ដាក់​គាត់​នៅ​លេខ ១២ ជាមួយនឹង​ទ្រព្យសម្បត្តិ ៨៥ ពាន់​លាន​ដុល្លារ បន្ទាប់​ពី​កណ្តឹង​រោទិ៍​បិទ​បញ្ចប់​កាលពី​ថ្ងៃ​សុក្រ​។​

​កាលពីដើម​សប្តាហ៍​នេះ មុនពេល​ចេញ​ផ្សាយ​របា​យ​ការណ៍​ប្រាក់ចំណូល​កាលពី​ថ្ងៃ​ពុធ លោក​ហ្សាក់​ឃើ​បឺ​ក​បាន​ជាប់​ចំណាត់ថ្នាក់​ជា​អ្នក​មាន​បំផុត​ទី​ប្រាំបី​នៅលើ​ពិភពលោក​៕

​លោក​ហ្សាក់​ឃើ​បឺក​ឥឡូវ​ធ្លាក់​មក​លេខ​១២​ក្នុង​បញ្ជី​មហាសេដ្ឋី​កំពូល​របស់​ទស្សនា​វ​ដ្តី Forbes