ប្រែ​សម្រួល : កញ្ញា​ដា​លី​ស (Express) ៖ រុស្ស៊ី ដឹកនាំ​ដោយ​លោក វ្ល៉ា​ឌី​មៀរ ពូ​ទីន កាន់តែ​មាន​ចរិត​ឈ្លានពាន​ចំពោះ​អ៊ុយ​ក្រែន​ខណៈ​ប្រទេស​នេះ​ប្រមូលផ្តុំ​ទាហាន​នៅ​តាម​ព្រំដែន​រួម​របស់​ខ្លួន​ជា​​មួយ​អ៊ុយ​ក្រែន​ដើម្បី​ឆ្លើយតប​ទៅ​នឹង​អ្វី​ដែល​ខ្លួន​មើលឃើញថា​ជាការ​រុល​មក​មុខ​ពី​សំណាក់​ណា​តូ​។ វេបសាយ Express.co.uk បានធ្វើការ​ប្រៀប​ទំហំ​កងកម្លាំង​នៃ​ភាគី​ទាំង​ពីរ​ខណៈ​អាជ្ញាធរ​​លើ​សកលលោក​ព្រួយបារម្ភ​អំពី​ការ​លុកលុយ​នាពេល​ឆាប់ៗ​។​

​ទំនាក់ទំនង​រុស្ស៊ី​ជាមួយ​អ៊ុយ​ក្រែន​បាន​វិវត្ត​ទៅ​ជា​ការតថ្លៃ​គ្នា​រវាង​រដ្ឋបាល​លោកពូ​ទីន​និង​គូប្រជែង​លោកខាងលិច​។ សហរដ្ឋ​អាម៉េរិក​ចក្រភព​អង់គ្លេស​និង​សម្ពន្ធមិត្ត​របស់​ពួកគេ​នៅក្នុង​អង្គការ​ណា​តូ​​បាន​ព្រមាន​ប្រធានាធិបតី​រុស្ស៊ី​កុំ​ឱ្យ​បន្ត​យុទ្ធសាស្ត្រ​ពង្រីក​វាទទី​ដូចគ្នា​ដែល​ធ្វើឱ្យ​តំបន់​នេះ​ខកចិត្ត​កាលពី​ឆ្នាំ ២០១៤​។ ប៉ុន្តែ​លោក​ពូ​ទីន​អះអាងថា​លោក​បាន​ឆ្លើយតប​ទៅ​នឹង​គោលបំណង​ស្រដៀង​​គ្នា​នេះ​ពី​សម្ពន្ធមិត្ត​យោធា​អន្តររដ្ឋាភិបាល (​ណា​តូ​) ខណៈ​ពួកគេ​រុល​ឆ្ពោះ​កាន់តែ​ជិត​ដល់​ទឹកដី​របស់​រុស្ស៊ី​។​

​តើ​កងទ័ព​រុស្ស៊ី​មាន​ទំហំ​ប៉ុនណា​?

​ព័ត៌មាន​ចារកម្ម​ចេញ​ផ្សាយ​ដោយ​នាយករដ្ឋមន្ត្រី​អង់គ្លេស​លោក បូរី​ស ច​ន​សុន បានបង្ហាញ​ថា ក្រុម​សមរភូមិ​រុស្ស៊ី​ចំនួន ៦០ បាន​បោះ​ទីតាំង​នៅ​តាម​បណ្តោយ​ព្រំដែន​រុស្ស៊ី​-​អ៊ុ​យក្រែន​។​

​លោក​បាន​ព្រមាន​ថា វត្តមាន​របស់​ពួកគេ​អាច​នឹង​បញ្ឆេះ “​សង្គ្រាម​លឿន​ដូច​រន្ទះ​” នៅក្នុង​តំបន់ ដោយ​លោក​ពូ​ទីន​ជា​អ្នកដឹកនាំ​ទាហាន​រាប់ពាន់នាក់​ចូល​ទៅក្នុង​ប្រទេស​អ៊ុ​យក្រែន​។​

​មេដឹកនាំ​លោក​ខាងលិច​បាន​អះអាងថា​លោក​ពូ​ទីន​មានបំណង​កសាង​ប្រទេស​រុស្ស៊ី​ឡើង​វិញ​ឱ្យ​មាន​ភាពរុងរឿង​ដូច​ក្រោម​សម័យ​សហភាពសូវៀត​តាមរយៈ​ការ​កាត់​យក​តំបន់​អឺរ៉ុប​ខាងកើត​បន្ថែម​​ទៀត​។​

​ប្រធានាធិបតី​ពូ​ទី​ន​បាន​បដិសេធ​ផែនការ​ឈ្លានពាន​អ៊ុ​យក្រែន ដោយ​អះអាង​ផ្ទុយ​មក​វិញ​ថា​កំពុង​ប្រឆាំងនឹង​ការ​វាទទី​របស់​ណា​តូ​មក​អឺរ៉ុប​ភាគ​ខាងកើត​។​

​លោកពូ​ទីន​កំពុង​ពង្រឹង​វត្តមាន​យោធា​ជា​លំដាប់​នៅក្នុង​តំបន់​ដែល​បច្ចុប្បន្ន​មាន​ទាហាន​រុស្ស៊ី ១០០.០០០ នាក់ ដែល​គាំទ្រ​ដោយ​ឧបករណ៍​យោធា​។​

​ទន្ទឹមនឹងនេះ​ដែរ លោកពូ​ទីន​កំពុង​បំពាក់​ប្រព័ន្ធ​មី​ស៊ី​ល​ដល់​សម្ពន្ធមិត្ត​បេឡា​រូស​របស់ខ្លួន​និង​ចល័ត​នាវា​ចូលទៅ​សមុទ្រ​ខ្មៅ នេះ​បើ​យោង​តាម​កាសែត Wall Street Journal ។​

​កងទ័ព​និង​យានយន្ត​យោធា​ដែល​កំពុង​ដាក់​សម្ពាធ​លើ​អ៊ុយ​ក្រែន​គឺ​គ្រាន់តែ​ជា​ផ្នែក​តូច​មួយ​នៃ​កងកម្លាំង​ដែល​មាន​សម្រាប់​លោកពូ​ទីន​ប៉ុណ្ណោះ​។​

​ទិន្នន័យ​បង្ហាញថា នៅពេល​ប្រៀបធៀប​ជាមួយ​សមាជិក​ណា​តូ រុស្ស៊ី​មាន​ចំនួន​កងទ័ព​ទី​ពីរ​បន្ទាប់​ពី​សហរដ្ឋ​អាម៉េរិក​។​

​តួលេខ​ពី​វេបសាយ armedforces.eu បានបង្ហាញ​ថា ប្រទេស​នេះ​មាន​ទាហាន​សកម្ម​ប្រហែល ១.១៥៤.០០០ នាក់​។​

​ហើយ​កងទ័ព​រុស្ស៊ី​មាន​ទាហាន​បម្រុង​ប្រហែល ២៥០.០០០ នាក់​បន្ថែមទៀត​។​

​ក្នុងពេល​ជាមួយគ្នា​នេះ រុស្ស៊ី​មាន​អាវុធ​នុយក្លេអ៊ែរ​យ៉ាង​ទូលំទូលាយ​បំផុត​លើ​ពិភពលោក ជាមួយ​នឹង​ការផ្គត់ផ្គង់​ក្បាល​គ្រាប់​ប្រមាណ ៦.៤០០ ក្បាល​។​

​តើ​ណា​តូ​មាន​ឥទ្ធិពល​ខ្លាំង​ប៉ុនណា​?

​អាម៉េរិក​មាន​កម្លាំង​ប្រយុទ្ធ​ដែល​មាន​ទំហំ​ធំ​ជាង​រុស្ស៊ី​បន្តិចបន្តួច​ប៉ុណ្ណោះ​។​

​អ្នកគាំទ្រ​របស់​អង្គការ​ណា​តូ (​អាម៉េរិក​) មាន​ទាហាន​ប្រមាណ ១.៣៤៦.៤០០ នាក់​។​

​ទាហាន​អាម៉េរិក​ប្រហែល ១៦៥.០០០ នាក់​កំពុង​ត្រូវបាន​ដាក់ពង្រាយ ដោយ​ទាហាន​បម្រុង ៧៩៩.៥០០ កំពុង​រង់ចាំ​។​

​ទោះយ៉ាងណា អង្គការ​ណា​តូ​គឺជា​ការប្រមូលផ្តុំ​ជា​សមូហភាព​នៃ​ប្រជាជាតិ​ជាច្រើន ដែល​មានន័យថា យោធា​របស់​ខ្លួន​អាច​មក​ពី​សមាជិក​សកម្ម​នីមួយៗ​។​

​គិត​ត្រឹម​ឆ្នាំ ២០២២ ពួកគេ​រួម​មាន​សមាជិក​ដូចជា ៖

​អាល់​បា​នី (២០០៩)
​បែលហ្ស៊ិក (១៩៤៩)
​ប៊ុលហ្គារី (២០០៤)
​កាណាដា (១៩៤៩)
​ក្រូ​អាស៊ី (២០០៩)
​សាធារណរដ្ឋ​ឆែក (១៩៩៩)
​ដា​ណឺ​ម៉ាក (១៩៤៩)
​អេ​ស្តូ​នី (២០០៤)
​បារាំង (១៩៤៩)
​អាល្លឺម៉ង់ (១៩៥៥)
​ក្រិក (១៩៥២)
​ហុងគ្រី (១៩៩៩)
​អ៊ី​ស្លង់ (១៩៤៩)
​អ៊ីតាលី (១៩៤៩)
​ឡេតូ​នី (២០០៤)
​លី​ទុយ​អា​នី (២០០៤)
​លុច​សំបួរ (១៩៤៩)
​ម៉ុង​តេ​ណេ​ហ្គ្រោ (២០១៧)
​ហូ​ឡង់ (១៩៤៩)
​ម៉ា​សេ​ដូនី​ខាងជើង (២០២០)
​ន័​រវែ​ស (១៩៤៩)
​ប៉ូឡូញ (១៩៩៩)
​ព័រ​ទុយ​ហ្គាល់ (១៩៤៩)
​រូ​ម៉ា​នី (២០០៤)
​ស្លូ​វ៉ាគី (២០០៤)
​ស្លូ​វេនី (២០០៤)
​អេ​ស្ប៉ាញ (១៩៨២)
​តួ​ក​គី (១៩៥២)
​ចក្រភព​អង់គ្លេស (១៩៤៩)
​សហរដ្ឋ​អាម៉េរិក (១៩៤៩)

​បន្ទាប់​ពី​សហរដ្ឋ​អាម៉េរិក តួ​ក​គី បារាំង និង​អាល្លឺម៉ង់ គឺជា​សមាជិក​ដែល​មាន​ឧបករណ៍​យោធា​ល្អ​ជាងគេ​។​

​ពួកគេ​មាន​ទាហាន​ប្រហែល ៤៤៥.០០០​នាក់​, ២០៨.០០០​នាក់ និង ១៨៩.១០០​នាក់​។​

​ប្រទេស​នីមួយៗ​សន្យា​ផ្តល់​ជូន​ទាហាន​រៀងៗ​ខ្លួន អាស្រ័យ​លើ “​ទម្ងន់​យុទ្ធសាស្ត្រ​និង​ឥទ្ធិពល​ផ្សេងៗ​គ្នា​”​។​

​សរុប​មក​ណា​តូ​និយាយថា ខ្លួន​មាន “​សមត្ថភាព​ដើម្បី​ពឹងផ្អែក​លើ​បុគ្គលិក ទាហាន និង​ជន​ស៊ីវិល​ជិត ៣,៥ លាន​នាក់​រួម​បញ្ចូល​គ្នា​”៕