​ប្រែ​សម្រួលៈ​បំណង​/​មូ​ស្គូ​(​ដេល្លី​ម៉េល​,​អេ​ភី​)៖ រុស្ស៊ី​កាលពី​ថ្ងៃ​សៅរ៍​ទី​៥​កុម្ភៈ បាន​បញ្ជូន​យន្តហោះ​ទម្លាក់​គ្រាប់បែក​ចម្ងាយ​ឆ្ងាយ​ដែល​អាច​ផ្ទុក​គ្រាប់បែកនុយគ្លេអ៊ែរ​ទៅ​ហោះ​ពីលើ​ប្រទេស​បេឡា​រូស​ចំពេល​​មាន​ភាព​តានតឹង​កាន់តែ​រាលដាល​អំពី​បញ្ហា​អ៊ុ​យក្រែន​។​

​ក្រសួងការពារជាតិ​រុស្ស៊ី​បាន​និយាយថា យន្តហោះ​Tu-22M3​ចំនួន​ពីរ​គ្រឿង​បាន​ហោះ​សម្របសម្រួល​ជាមួយ​កងកម្លាំង​អាកាស​និង​ការពារ​ដែនអាកាស​បេឡា​រូស​ក្នុងអំឡុង​បេសកកម្ម​៤​ម៉ោង​។​ការហោះ​​នេះ​កើតឡើង​ក្រោយ​ការហោះ​ល្បាត​ស្រដៀង​គ្នា​លើ​បេឡា​រូស ដែល​ជាប់​នឹង​អ៊ុ​យក្រែន​។​

Tu-22M3​ចំនួន​ពីរ​គ្រឿង​បាន​ហោះ​លើ​បេឡា​រូស​កាលពី​ថ្ងៃ​សៅរ៍​នៅពេល​ទ័ពជើងគោក​បន្តធ្វើ​សមយុទ្ធ​ក្បែរ​ព្រំដែន​អ៊ុ​យក្រែន​

​វា​ក៏​កើតឡើង​ចំ​ពេល​រដ្ឋាភិបាល​វិមាន​ក្រឹម​ឡាំង​ចល័ត​ទ័ព​ពី​តំបន់​ស៊ីបេ​រីនិង​ចុង​បូ​ព៌ាទៅ​បេឡា​រូស​ដើម្បី​ធ្វើ​សមយុទ្ធ​រួមគ្នា​ដ៏​ធំ​បំផុត​។​ការ​ចល័ត​ទ័ព​នេះ​នាំ​អោយ​រុស្ស៊ី​កាន់តែ​បង្កើន​កម្លាំង​ទ័ព​នៅក្បែរ​ព្រំ​​ដែន​អ៊ុ​យក្រែន និង​នាំអោយ​លោកខាងលិច​បារម្ភ​កាន់តែ​ខ្លាំង​ក្រែង​រុស្ស៊ី​ចូល​ឈ្លានពាន​ប្រទេស​ក្បែរ​ខាង​ខ្លួន​។​

​រុស្ស៊ី​បាន​បដិសេធ​ម្តង​ហើត​ម្តងទៀត​ថា ខ្លួន​មិន​មាន​ផែនការ​វាយប្រហារ​ចូល​អ៊ុយ​ក្រែនទេ តែ​បាន​សុំ​អោយ​អាម៉េរិក​និង​សម្ពន្ធមិត្ត​ក្នុង​អង្គការ​ណា​តូ​សន្យាថា​ពួកគេ​នឹង​មិន​ទទួលយក​អ៊ុយ​ក្រែន​ជាសមា​​ជិក​អង្គកា​រណាតូ មិន​ដាក់ពង្រាយ​សព្វាវុធ​វាយប្រហារ​ហើយ​នឹង​មិន​ដាក់​កម្លាំង​ណា​តូ​នៅ​អឺរ៉ុប​ខាងកើត​។​ទោះជា​យ៉ាងណា ទាំង​អាម៉េរិក​និង​ណា​តូ​បាន​បដិសេធ​ការទាមទារ​បែបនេះ​។​

​ពួក​លោក​ខាងលិច​ឥឡូវ​ទាមទារ​អោយ​រុស្ស៊ី​ដក​ទាហាន​ប្រមាណ​១០០.០០០​នាក់​ចេញពី​តំបន់​ក្បែរ​អ៊ុ​យក្រែន តែ​រដ្ឋាភិបាល​វិមាន​ក្រឹម​ឡាំង​បាន​ឆ្លើយតប​ថា​ខ្លួន​ដាក់​ទាហាន​ត្រង់ណា​ក៏​បាន​អោយ​តែ​វា​ស្ថិត​​ក្នុង​ទឹកដី​របស់​ខ្លួន​។​នៅពេល​ភាព​តានតឹង​អំពី​អ៊ុយ​ក្រែន​កាន់តែឡើង​កំដៅ យោធា​រុស្ស៊ី​បាន​ធ្វើ​សមយុទ្ធ​បន្តបន្ទាប់​ទាំង​ក្នុងប្រទេស​និង​នៅ​បេឡា​រូស​ចាប់ពី​សមុទ្រ​អាកទិច​ដល់​សមុទ្រ​ខ្មៅ​។​

​ការ​ចល័ត​ទ័ព​ទៅកាន់​បេឡា​រូស​នាំអោយ​មាន​ការព្រួយបារម្ភ​ថា រុស្ស៊ី​អាច​ធ្វើ​ការវាយប្រហារ​អ៊ុយ​ក្រែន​ចេញពី​ទិស​ខាងជើង ដោយសារ​ពី​ព្រំដែន​បេឡា​រូស​ទៅ​ទីក្រុង​គៀវ​របស់​អ៊ុ​យក្រែន ជិត​ជាង​ពី​ព្រំដែន​​រុស្ស៊ី​ទៅ​ទីក្រុង​គៀវ​។​

​នៅ​ប៉ុន្មាន​ខែ​ថ្មីៗ​នេះ រុស្ស៊ី​បានធ្វើ​សមយុទ្ធ​រួមជាមួយ​បេឡា​រូស​ជា​បន្តបន្ទាប់ និង​បាន​បញ្ជូន​យន្តហោះ​ទម្លាក់​គ្រាប់​ដែល​អាច​ផ្ទុក​គ្រាប់បែកនុយគ្លេអ៊ែរ​ទៅ​ល្បាត​លើ​បេឡា​រូស​ដែល​នៅ​ជាប់​សមាជិក​អង្គការ​​ណា​តូ​គឺ​ប៉ូឡូញ ,​លី​យ​ទុយ​អា​នី​និង​ឡា​ត​វី ។​

​អាជ្ញាធរ​បេឡា​រូស​របស់​ប្រធានាធិបតី អា​ឡិច​សង់ឌ័​រ លូ​កា​សេន​កូ បាន​អំពាវនាវ​អោយ​មាន​ទំនាក់ទំនង​ជិតស្និទ្ធ​ឡើង​ជាមួយ​រដ្ឋាភិបាល​ក្រុង​មូ​ស្គូ និង​កាលពីពេល​ថ្មីៗ​សុំ​អោយ​រុស្ស៊ី​ដាក់តាំង​សព្វាវុធ​នុយ​​គ្លេ​អ៊ែរ ថែម​ទៀត​។​

​កាលពី​ថ្ងៃ​សៅរ៍ កាសែត​អាឡឺម៉ង់​ប៊ីល​(Bild)​បាន​ចេញផ្សាយ​របាយការណ៍​មួយ​ដោយ​ចោទប្រកាន់ថា រុស្ស៊ី​ប្រុង​វាយប្រហារ​អ៊ុយ​ក្រែន​ពី​ច្រើន​ទិសដោយ​ចាប់​យក​ទីក្រុ​ង​ធំៗ​និង​លើក​បន្តុប​រដ្ឋាភិបាល​​អាយ៉ង​មួយ​។ ទោះជា​យ៉ាងណា អ្នកនាំពាក្យ​ក្រសួងការបរទេស​រុស្ស៊ី បាន​ច្រានចោល​ការចោទប្រកាន់​នេះ​។​

ប្រជាជនក្នុងក្រុងខាគីវ និងទាហានអ៊ុយក្រែននៅក្រុងគៀវហ្វឹកហាត់ត្រៀមដើម្បីទទួលការឈ្លានពាន

​នៅពេល​មាន​ភ័យខ្លាច​អំពី​ការផ្ទុះ​សង្គ្រាម​កាន់តែ​កើនឡើង អាជ្ញាធរ​អ៊ុយ​ក្រែន​បាន​កេណ្ឌ​ប្រជាជនមក​ហ្វឹកហាត់​សំរាប់​ការពារ​ភូមិ​ស្រុក​។​នៅ​ទីក្រុង​ខា​គី​វ​(Kharkiv)​ចម្ងាយ​២៥​គីឡូម៉ែត្រ​ខាងត្បូង​​ព្រំ់ដែន​រុស្ស៊ី មនុស្ស​រាប់ពាន់​នាក់​បាន​នាំគ្នា​ចេញ​មក​តាម​ដង​ផ្លូវកា​លពី​ថ្ងៃ​សៅរ៍ ដោយ​កាន់​បដា​ពណ៌​លឿង​ខៀវ​ដ៏​ធំ ដែល​ជា​ពណ៌​ទង់ជាតិ​អ៊ុ​យក្រែន ក្នុង​ការបង្ហាញ​កាត​ប្តេជ្ញាចិត្ត​ការពារ​ទីក្រុង​នេះ​ពី​​ការឈ្លានពាន​របស់​កម្លាំង​បរទេស​៕