​ដោយ​:​ដេប៉ូ​/​ភ្នំពេញ​: រដ្ឋមន្ត្រី​ក្រសួងបរិស្ថាន លោក សាយ សំ​អាល់ បាន​ថ្លែងថា មន្ត្រីរាជការ​ត្រូវ​ប្រកាន់​ភ្ជាប់​ការគោរព​ឋានានុក្រម​ការងារ និង​អនុវត្ត​នូវ​ការរៀបចំ​និង​ប្រព្រឹត្តទៅ​របស់​អង្គភាព​ខ្លួន ជាពិសេស​ត្រូវ​ចាត់ទុក​ខ្លួន​ថា​ជា​កូនចៅ​របស់​ប្រជាជន ដែល​រស់នៅ​ជាមួយ​ប្រជាជន ដើម្បី​ចូលរួម​លើកកម្ពស់​ជីវភាព​ប្រជាជន និង​ការអភិវឌ្ឍ​សហគមន៍​មូលដ្ឋាន​។

​ការ​ថ្លែង​របស់ លោក រដ្ឋមន្ត្រី ក្រសួងបរិស្ថាន​បែបនេះ​ធ្វើឡើង​នាឱកាស​ចុះ​ជួប​សំណេះសំណាល និង​ពិសារ​អាហារ​សាមគ្គី​ជាមួយ​មន្ត្រី​ឧ​ទ្យា​នុ​រក្ស និង​មន្ត្រីរាជការ​នៃ​មន្ទីរ​បរិស្ថាន​ក្រចេះ​កាលពី​ថ្ងៃទី​០៦ ខែកុម្ភៈ ឆ្នាំ​២០២២​។​

​លោក សាយ សំ​អាល់ បាន​គូសបញ្ជាក់ថា ដើម្បី​ជាការ​លើកស្ទួយ​ជីវភាព​ប្រជា​សហគមន៍​បន្ថែម យើង​អាច​ធ្វើបាន តាមរយៈ​ការលើកទឹកចិត្ត​ឱ្យ​ពួកគាត់​ដាំ​ដំណាំ​រួមផ្សំ​បន្ថែម ឬ​បន្លែបង្ការ​ប្រចាំថ្ងៃ ការជំរុញ​ឱ្យមាន​កិច្ចសហការ​ជាមួយ​ដៃគូ​អភិវឌ្ឍន៍ ដើម្បី​គាំទ្រ ផ្សព្វផ្សាយ និង​អភិវឌ្ឍ​តំបន់​ទេសចរណ៍ធម្មជាតិ​។

​ជាមួយគ្នានេះ លោក រដ្ឋមន្ត្រី បាន​លើកទឹកចិត្ត​ឱ្យមាន​គំនិត​ផ្តួចផ្តើម​បន្ថែម​លើ​យន្តការ​អនុវត្ត​គោលនយោបាយ​ភូមិ ឃុំ សង្កាត់​មាន​សុវត្ថិភាព ដែល​សំដៅលើ​ការពង្រឹង​ការគ្រប់គ្រង​សំណល់​រឹង​សំរាម និង​ចលនា​សាលា​មេត្រី​បរិស្ថាន ក៏ដូចជា​អារាម​បរិស្ថាន​៕