ដោយៈ​សុផល​/​ភ្នំពេញ​:​ កំណាត់​ផ្លូវជាតិ​លេខ​៧ ប្រវែង​សរុប​៩៣,៥៦​គីឡូម៉ែត្រ ពី​រង្វង់​មូល​ខ្លា​ស្ទុះ ស្ថិតក្នុង​ភូមិ​កា​ប៉ូ សង្កាត់ អូរឫស្សី ក្រុង​ក្រចេះ (​គីឡូម៉ែត្រ​លេខ ៣៣១+១២៥) ទៅ​ភូមិ​រមាត ឃុំ​អូរ​គ្រៀង ស្រុក​សំបូរ ខេត្តក្រចេះ (​គីឡូម៉ែត្រ​លេខ ៤២៤+៦៩០) ត្រូវបាន​សម្ពោធ​បើក​ឱ្យប្រើ​ប្រាស់​ជា​ផ្លូវការ​កាលពី​ព្រឹក​ថ្ងៃទី​៧​ខែកុម្ភៈ ក្រោម​អធិបតីភាព​ដ៏​ខ្ពង់ខ្ពស់​សម្ដេច​អគ្គមហាសេនាបតី​តេ​ជោ ហ៊ុន សែន នាយករដ្ឋមន្ត្រី នៃ​ព្រះរាជាណាចក្រ​កម្ពុជា​។​

​ផ្លូវ​នេះ ផ្ដល់​ហិរញ្ញប្បទាន​សម្បទាន ជំនួយឥតសំណង​ជាង​៣៣​លាន​ដុល្លារ ដោយ​ប្រជាជន និង​រដ្ឋាភិបាល​នៃ​សាធារណរដ្ឋ​ប្រជាមានិត​ចិន ក្នុង​គោលបំណង​ដើម្បី​ចូល រួមចំណែក​ក្នុងការ​ស្ដារ និង​អភិវឌ្ឍ​ហេដ្ឋារចនាសម្ព័ន្ធ​ដឹកជញ្ជូន​នៅ​កម្ពុជា សំដៅ​ជំរុញ​កំណើនសេដ្ឋកិច្ច ជាតិ និង​កាត់បន្ថយ​ភាពក្រីក្រ​។

​លោក​ទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួង​សាធារណការ​និង​ដឹកជញ្ជូន បាន​មានប្រសាសន៍ថា​កំណាត់​ផ្លូវជាតិ​លេខ​៧ នេះ​មាន​សក្តានុពល​ដ៏​សំខាន់​។​វាត​ភ្ជាប់​ពី​រាជធានី ភ្នំពេញ ឆ្លងកាត់​ខេត្ត​សំខាន់ៗ ដូចជា​៖ ខេត្តកំពង់ចាម ត្បូងឃ្មុំ ក្រចេះ ស្ទឹងត្រែង និង​ឆ្ពោះទៅ​តំបន់​ប៉ូល​សេដ្ឋកិច្ច​ទី​៤ របស់​កម្ពុជា ស្ថិតនៅ​ភូមិភាគ​ឦសាន​នៃ​ប្រទេស ដែល​បម្រើឱ្យ​ចរាចរណ៍​សម្រាប់​សកម្ម​ភាព​ផ្លាស់ប្តូរ​សេដ្ឋកិច្ច ពាណិជ្ជកម្ម និង​ទេសចរណ៍​នៅក្នុង​ប្រទេស​។ ជាងនេះទៀត ខ្សែ​ផ្លូវ​នេះ គឺជា​ផ្នែក​មួយ​នៃ​ផ្លូវ​អាស៊ាន​ហាយវ៉េ​យ​លេខ​១១(AH11) ឬ​របៀង​កណ្តាល​របស់​មហា​អនុតំបន់​មេគង្គ​(GMS) ដែល​ត​ភ្ជាប់​ពី​ទីក្រុង​គុន​មីង​នៅ​ភាគខាងត្បូង​នៃ​ប្រទេស​ចិន ឆ្លងកាត់​ទីក្រុង​វៀង​ច័ន្ទ​នៃ​ប្រទេស​ឡាវ កាត់​រាជធានី​ភ្នំពេញ និង​ឆ្ពោះទៅ​កំពង់ផែ​ក្រុងព្រះសីហនុ​នៃ​ប្រទេស​កម្ពុជា ហើយ​កំណាត់​ផ្លូវ​នេះ​ក៏​ជា​ផ្លូវជាតិ​ដ៏​សំខាន់​ប្រទាក់ក្រឡា​ជាមួយនឹង​ផ្លូវជាតិ​មួយចំនួនទៀត សម្រាប់​ជួយ​ជំរុញ​ការអភិវឌ្ឍ​តំបន់ ត្រីកោណ​អភិវឌ្ឍន៍​កម្ពុជា​-​ឡាវ​-​វៀតណាម (CLV DTA) ដើម្បី​ប្រែក្លាយ​តំបន់​ដាច់ស្រយាល​របស់ ប្រទេស​ទាំង​៣ ជាពិសេស ខេត្ត​ត្បូងឃ្មុំ ក្រចេះ ស្ទឹងត្រែង រតនគិរី និង​មណ្ឌលគិរី​របស់​កម្ពុជា​យើង ទៅជា​តំបន់​ដែលមាន​ការអភិវឌ្ឍ​ផងដែរ​។​

​លោក​ទេសរដ្ឋមន្ត្រី បាន​បន្ថែមថា សមិទ្ធផល​ថ្មី​នេះ​គឺជា​ចំណងដៃ​ដ៏​ថ្លៃថ្លា​មិនអាច​កាត់ថ្លៃ​បាន ដែល​កើតចេញពី​ចំណងមិត្តភាព​ដែកថែប និង​កិច្ចសហប្រតិបត្តិការ​រ​វាង រាជរដ្ឋាភិបាល​កម្ពុជា និង​រដ្ឋាភិបាល​នៃ​សាធារណរដ្ឋ​ប្រជាមានិត​ចិន ជូន​ដល់​បងប្អូន​ប្រជាពលរដ្ឋ​ខេត្តក្រចេះ ព្រមទាំង​ប្រជាពលរដ្ឋ​នៅ​ទូទាំងប្រទេស​ផងដែរ ដើម្បី​ប្រើប្រាស់​ជា​ប្រយោជន៍​ទូទៅ និង​យូរអង្វែង​។​

​លោក​ទេសរដ្ឋមន្ត្រី បាន​គូសបញ្ជាក់​ពី​សារសំខាន់​នៃ​កត្តា​សុខសន្តិភាព និង​ស្ថិរភាព​នយោបាយ ក្រោម​ការដឹកនាំ​ដ៏​ឈ្លាសវៃ និង​ប៉ិនប្រសព្វ​របស់ សម្តេច​តេ​ជោ​នាយករដ្ឋមន្ត្រី ដែល​ផ្តល់ ឱកាស​ឱ្យ​កម្ពុជា​សម្រេចបាន​នូវ​ការអភិវឌ្ឍ និង​ការតភ្ជាប់​ហេដ្ឋារចនាសម្ព័ន្ធ​ពាសពេញ​ផ្ទៃ​ប្រទេស​។​

​លោក​បាន​បញ្ជាក់ថា កម្ពុជា​ពីមុន​ជា​ប្រទេស​ដែល​បរទេស​តែងតែ​យល់ថា​ជា​តំបន់​វាលពិឃាត ជា​តំបន់​អសន្តិសុខ ជា​ចម្ការមីន​គួរឱ្យ​ខ្លាចរអារ ប៉ុន្តែ​បច្ចុប្បន្ននេះ​កម្ពុជា​ត្រូវបាន​ប្រែក្លាយជា​ប្រទេសមួយ​មាន​សុខសន្តិភាព​ពេញលេញ មានការ​អភិវឌ្ឍ និង​ជា​គោលដៅ​ទេសចរណ៍​ដ៏​មាន​ប្រជាប្រិយភាព​មួយ​នៅក្នុង​តំបន់​អាស៊ីអាគ្នេយ៍​ផងដែរ​៕​សរន​-PC