​ប្រែ​សម្រួល : កញ្ញា​ដា​លី​ស (​ស្ត្រេត​ថែមស៍​) ៖ ម្ចាស់​ក្សត្រិយ៍​អេ​លីហ្សា​បេ​តរបស់​ចក្រភព​អង់គ្លេស​បាន​មានបន្ទូល​កាលពី​ថ្ងៃ​សៅរ៍​ទី ៥ ខែ​កុម្ភៈ​ថា ទ្រង់​ចង់ឱ្យ​ព្រះ​នាង​ខា​មី​ល​ឡា (Camilla)​ជា​មហេសី​​របស់​ព្រះអង្គម្ចាស់​ឆាល​ក្លាយជា​ព្រះ​មហាក្សត្រិយានី នៅពេល​ព្រះអង្គម្ចាស់​ឡើង​សោយរាជ្យ ដោយ​ពង្រឹង​ឋានៈ​របស់​ទ្រង់​នៅក្នុង​បេះដូង​នៃ​គ្រួសារ​រាជវង្ស​បន្ទាប់ពី​ធ្លាប់​ត្រូវបាន​វិនិច្ឆ័យ​ថា​ជា​មនុស្ស​​មកពី​ក្រៅ​។​

​នៅក្នុង​ព្រះរាជសារ​មួយ​ដើម្បី​ប្រារព្ធ​ខួប​លើក​ទី ៧០ នៃ​ការឡើង​គ្រងរាជ្យ​របស់​ទ្រង់ ម្ចាស់​ក្សត្រិយ៍​អេ​លីហ្សា​បេ​ត​បាន​មានបន្ទូលថា​ឱកាស​នេះ​បាន​ផ្តល់​ឱ្យ​ទ្រង់​នូវពេល​សម្រាក​ខ្លះ​ដើម្បី​ឆ្លុះបញ្ចាំង​​ពី​ភាពស្មោះត្រង់​និង​សេចក្តីស្រឡាញ់​ដែល​បាន​បង្ហាញ​ដល់​ទ្រង់​ដោយ​សាធារណជន​អង់គ្លេស​។​

​ទ្រង់​បាន​មានបន្ទូលថា ទ្រង់​សង្ឃឹមថា​ព្រះអង្គម្ចាស់​ឆាល​និង​ព្រះ​នាង​ម្ចាស់​ខា​មី​ល​ឡា​នឹង​ទទួលបាន​ការគាំទ្រ​ដូចគ្នា​។​

​ម្ចាស់​ក្សត្រិយ៍​អេ​លីហ្សា​បេ​ត​បាន​បន្តថា “​វា​ជា​បំណងប្រាថ្នា​ដ៏​ស្មោះ​របស់ខ្ញុំ ដែល​នៅ​ពេល​នោះ​មក​ដល់ សង្ឃឹម​ថា​ខា​មី​ល​ឡា​នឹង​ត្រូវបាន​ទទួលស្គាល់​ជា​ម្ចាស់​ក្សត្រិយានី​ខណៈ​ទ្រង់​បន្ត​ការបម្រើ​ដ៏​ស្មោះ​​ត្រង់​របស់​ទ្រង់​”​។​

​ព្រះអង្គម្ចាស់​ឆាល​និង​ព្រះ​នាង​ម្ចាស់​ខា​មី​ល​ឡា ដែល​ជា​គូស្នេហ៍​យូរអង្វែង​នឹង​គ្នា បាន​រៀប​អភិសេក​នៅ​ឆ្នាំ ២០០៥ នៅក្នុង​ពិធី​សាមញ្ញ​មួយ​នៅ​ដំណាក់​វីន​ស័រ (Windsor)​។​អ្នកនាំពាក្យ​នៃ​រាជ​ដំណាក់​​ក្លា​រិន (Clarence) របស់​ទ្រង់​ទាំងពីរ បាន​និយាយ​កាលពី​ថ្ងៃ​សៅ​រ៍ថា ពួក​ទ្រង់ “​រំភើប​និង​គោរព​ចំពោះ​ពាក្យពេចន៍​របស់​ព្រះ​មហាក្សត្រិយ៍​”​។​

​ចំណាត់ការ​របស់​ព្រះ​មហាក្សត្រិយានី​គឺ​ឆ្លុះបញ្ចាំង​ពី​ការទទួលស្គាល់​កាន់តែ​ទូលំទូលាយ​នៃ​ឋានៈ​របស់​ព្រះ​នាង​ម្ចាស់​ខា​មី​ល​ឡា​ជា​ពូជពង្ស​ស្តេច​៕

ម្ចាស់​ក្សត្រិយ៍​អេ​លីហ្សា​បេ​ត (​ស្តាំ​) នៅ​ជាមួយ​ព្រះអង្គម្ចាស់​ឆាល​និង​ព្រះ​នាង​ម្ចាស់​ខា​មី​ល​ឡា​នៅក្នុង​ពិធី​មួយ​ដើម្បី​ប្រារព្ធ​ខួប​១០០​ឆ្នាំ​នៃ​ការបង្កើត​កងទ័ព​ជាតិ​អង់គ្លេស​