ប្រែ​សម្រួល : កញ្ញា​ដា​លី​ស (​ដេលី​មែ​ល​) ៖ រដ្ឋបាលបៃដិ​ន​បាន​យល់ព្រម​លើ​កិច្ចសន្យា​គាំទ្រ​តម្លៃ ១០០ លាន​ដុល្លារ​ជាមួយ​តៃវ៉ាន់ ក្នុង​គោលបំណង​ជំរុញ​ប្រព័ន្ធ​ការពារ​មី​ស៊ី​ល​របស់​កោះ​នេះ​ខណៈ​តៃវ៉ាន់​ប្រឈម​​នឹង​សម្ពាធ​ខ្លាំង​ឡើង​ពី​ប្រទេស​ចិន​។​

​ក្រសួងការបរទេស​អាម៉េរិ​ក​បាន​ប្រកាស​ពី​កិច្ចព្រមព្រៀ​ង​ផ្នែក​វិស្វកម្ម​និង​ថែទាំ​កាលពី​ថ្ងៃ​ចន្ទ​ទី​៧​កុម្ភៈ ខណៈ​ប្រទេស​ចិន​ធ្វើជា​ម្ចាស់ផ្ទះ​នៃ​ព្រឹត្តិការណ៍​កីឡា​អូឡាំពិក​រដូវរងា​ឆ្នាំ ២០២២​ជា​ព្រឹត្តិការណ៍​​មួយ​ដែល​ពោរពេញ​ទៅដោយ​ភាព​តានតឹង​ជាតិនិយម ដែល​អ្នកខ្លះ​បារម្ភ​អាច​កើនឡើង​បន្ទាប់​ពី​អូឡាំពិក​រហូត​ឈាន​ដល់​ការប៉ុនប៉ង​ដណ្តើម​យក​តៃវ៉ាន់​ដោយ​កម្លាំង​។​

​ទីក្រុង​ប៉េកាំង​បានចាត់ទុក​កោះ​តៃវ៉ាន់​ជា​ខេត្ត​ផ្តាច់ខ្លួន និង​មិន​បាន​ច្រាន​ចោល​ការប្រើ​កម្លាំង​ដើម្បី​បង្រួបបង្រួម​កោះ​នេះ​ជាមួយ​ដីគោក​ឡើយ​ហើយ​ក្នុង​រយៈពេល​ប៉ុន្មាន​ខែ​ថ្មីៗ​នេះ​បាន​បង្កើន​ការ​​ហោះហើរ​យន្តហោះ​ចម្បាំង​ចូល​ក្នុង​អ្វីដែល​ទាំង​តៃវ៉ាន់​និង​ចិន​អះអាងថា​ជា​ដែនអាកាស​របស់ខ្លួន​។​

​កិច្ចព្រមព្រៀង​គាំទ្រ​នេះ​គឺ​សំដៅ​ជួយ​តៃវ៉ាន់​ថែទាំ​មី​ស៊ី​ល​ការពារ​ដែនអាកាស​ដែល​មាន​ស្រាប់​របស់ខ្លួន​និង​មី​ស៊ី​ល Patriot​ដ៏​ទំនើប​ដែល​ផលិត​ដោយ​សហរដ្ឋ​អាម៉េរិក ដែល​តៃវ៉ាន់​កំពុង​ទិញ​។​

​ក្រសួង​យោធា​តៃវ៉ាន់​បាន​បង្ហោះ​សារ​លើ Twitter អរគុណ​ដល់​សហរដ្ឋ​អាម៉េរិក​សម្រាប់​ការយល់ព្រម​លើ​កិច្ចព្រមព្រៀង​នេះ​៕

កិច្ចព្រមព្រៀង​គាំទ្រ​នេះ​គឺ​សំដៅ​ជួយ​តៃវ៉ាន់​ថែទាំ​មី​ស៊ី​ល​ការពារ​ដែនអាកាស​ដែល​មាន​ស្រាប់​របស់ខ្លួន និង​មី​ស៊ី​ល Patriot