​ដោយៈ​ប​.​ខុន​/​ភ្នំពេញៈ ក្រសួង​ធនធានទឹក និង​ឧតុនិយម​នៅ​ថ្ងៃទី​៨ ខែកុម្ភៈ ឆ្នាំ​២០២២ បាន​ជូនដំណឹង​ស្តីពី​ការ​ព្យាករ​ស្ថានភាព​អាកាសធាតុ​សម្រាប់​ពីថ្ងៃ​ទី​៩ ដល់​ថ្ងៃទី​១៥ ខែកុម្ភៈ​ថា ក្នុង​សប្តាហ៍​នេះ​ព្រះរាជាណាចក្រ​កម្ពុជា​នឹង​ទទួល​ឥទ្ធិពល​ពី​ជ្រលង​សម្ពាធ​ទាប​(​ឥណ្ឌូនេស៊ី​) ក្នុង​កម្រិត​ពី​ខ្សោយ​ទៅ​មធ្យម​។ ទន្ទឹមនឹងនោះ​ឥទ្ធិពល​នៃ​ទ្រនុង​សម្ពាធ​ខ្ពស់​ពី​ចិន​ប្រទេស ក៏​នៅតែមាន ដែល​អាច​បង្កើតបានជា​ការ​ប្រសព្វ​មុខ​គ្នា​រវាង​អាកាសធាតុ​ក្តៅ​-​ត្រជាក់ (Convection) បណ្តាល​ឲ្យ​មាន​ភ្លៀង​ក្នុង​តំបន់ (Local) ដោយ​អន្លើ​។​

​ស្ថានភាព​បែប​ខាងលើ​ធ្វើ​ឲ្យ​បណ្តា​ខេត្ត​នៅ​តំបន់​វាលទំនាប​កណ្តាល​មាន​សីតុណ្ហភាព​អប្បបរមា​ពី​២៣ ទៅ​២៦​អង្សា​សេ សីតុណ្ហភាព​អតិបរមា​មាន​ពី​៣៣​ទៅ​៣៦​អង្សា​សេ​។ អាចមាន​ភ្លៀង​ផ្គរ​ក្នុង​កម្រិត​ពី​ខ្សោយ​ទៅ​ច្រើន ជាពិសេស​បណ្តា​រាជធានី​-​ខេត្ត នៅ​ភាគ​ខាងក្រោម (​ត្បូង​) អាចមាន​បរិមាណ​ភ្លៀង​ច្រើន​។​

​សម្រាប់​បណ្តា​ខេត្ត​នៅជាប់​ជួរ​ភ្នំ​ដងរែក និង​ខ្ពង់រាប​ឦសាន​មាន​សីតុណ្ហភាព​អប្បបរមា​ពី​២៣ ទៅ​២៦​អ​អ្សា​សេ សីតុណ្ហភាព​អតិបរមា​មាន​ពី​៣៣ ទៅ​៣៦​អង្សា​សេ​។ អាចមាន​ភ្លៀង​ផ្គរ ក្នុង​កម្រិត​ពី​ខ្សោយ​ទៅ​មធ្យម​។​

​សម្រាប់​តំបន់​មាត់សមុទ្រ​មាន​សីតុណ្ហភាព​អប្បបរមា​ពី​២២ ទៅ​២៥​អង្សា​សេ សីតុណ្ហភាព​អតិបរមា​មាន​ពី​២៧ ទៅ​៣០​អង្សា​សេ​។ អាចមាន​ភ្លៀង​ផ្គរ ក្នុង​កម្រិត​ពី​មធ្យម​ទៅ​ច្រើន ៕​