​ប្រែ​សម្រួល : កញ្ញា​ដា​លី​ស (VNExpress) ៖ អង្គការ​ការពារ​សត្វ​ព្រៃ WWF បាន​និយាយ​កាលពី​ថ្ងៃ​អង្គារ​ទី​៨​កុម្ភៈ​ថា ប្លា​ស្ទិក​បាន​ជ្រៀតចូល​គ្រប់​ផ្នែក​ទាំងអស់នៃម​ហា​សមុទ្រ​ហើយ​ឥឡូវនេះ​​ត្រូវបាន​រកឃើញ “​នៅក្នុង​អតិសុខុមប្រាណ​តូច​បំផុត​រហូតដល់​ត្រី​បា​ឡែនធំៗ ដោយ​អំពាវនាវ​ឱ្យមាន​ការខិតខំ​ប្រឹងប្រែង​ជា​បន្ទាន់​ដើម្បី​បង្កើត​សន្ធិសញ្ញា​អន្តរជាតិ​ស្តី​ពី​ប្លា​ស្ទិក​។​

​បំណែក​តូចៗ​នៃ​ប្លា​ស្ទិក​បាន​ទៅ​ដល់​សូម្បី​តំបន់​ដាច់ស្រយាល​បំផុត​និង​មើលទៅ​ហាក់បីដូចជា​មាន​ភាព​បរិសុទ្ធ​បំផុត​នៃ​ភពផែនដី​។ សំរាម​ប្លា​ស្ទិក​បានបង្ហាញ​វត្តមាន​នៅ​តំបន់​ទឹក​កក​នៃ​សមុទ្រ​អា​ក់ទិក ហើយ​ត្រូវបាន​គេ​ប្រទះឃើញ​នៅក្នុង​ត្រី​នៅ​តំបន់​ជ្រៅ​បំផុត​នៃ​មហាសមុទ្រ គឺ តំបន់​ម៉ា​រី​យ៉ាណា ត្រិន​ឆ៍​( Mariana Trench)​។​

​មិន​មាន​កិច្ចព្រមព្រៀង​អន្តរជាតិ​ណាមួយ​ដើម្បី​ដោះស្រាយ​បញ្ហា​នេះ​ទេ​ទោះបីជា​គណៈប្រតិភូ​នានា​ដែល​ប្រជុំ​នៅ​ទីក្រុង​ណៃ​រ៉ូ​ប៊ី​សម្រាប់​កិច្ចប្រជុំ​បរិស្ថាន​របស់​អង្គការសហប្រជាជាតិ​ក្នុង​ខែ​នេះ​រំពឹង​​ចាប់ផ្តើម​កិច្ចពិភាក្សា​ស្តី​ពី​សន្ធិសញ្ញា​ប្លា​ស្ទិក​ទូទាំង​ពិភពលោ​កក៏ដោ​យ​។​

​អង្គការ WWF​បាន​ស្វែងរក​ការជំរុញ​ករណីនេះ​សម្រាប់​សកម្មភាព​នៅក្នុង​របាយការណ៍​ចុងក្រោយ​របស់​ខ្លួន ដែល​សំយោគ​ការសិក្សា​វិទ្យាសាស្ត្រ​ជាង ២.០០០​ដាច់ដោយឡែក​ពីគ្នា​អំពី​ផលប៉ះពាល់​នៃ​​ការបំពុល​ប្លា​ស្ទិក​លើ​មហាសមុទ្រ ជីវចម្រុះ និង​ប្រព័ន្ធ​អេកូឡូស៊ី​សមុទ្រ​។​

​របាយការណ៍​នេះ​បាន​ទទួល​ស្គាល់​ថា​បច្ចុប្បន្ន​មាន​ភស្តុតាង​មិន​គ្រប់គ្រាន់​ទេ​ដើម្បី​ប៉ាន់ស្មាន​ផលប៉ះពាល់​ដែល​អាច​កើតមាន​លើ​មនុស្ស​។​ប៉ុន្តែ​វា​បាន​រកឃើញ​ថា​សារធាតុ​ដែល​បានមកពី​ឥន្ធនៈហ្វូស៊ីល​នេះ​ “​បាន​ទៅ​ដល់​គ្រប់​ផ្នែក​នៃ​មហាសមុទ្រ រាប់​ចាប់ពី​ផ្ទៃសមុទ្រ​ដល់​បាតសមុទ្រ​ជ្រៅ ពី​តំបន់​ប៉ូល​រហូតដល់​ឆ្នេរសមុទ្រ​នៃ​កោះ​ដាច់ស្រយាល​បំផុត​ហើយ​ត្រូវបាន​រកឃើញ​នៅក្នុង​អតិសុខុមប្រាណ​តូច​បំផុត​​រហូត​ដល់​សត្វ​ធំ​បំផុត​គឺ​ត្រី​បា​ឡែន​”៕

​រូបថត​ខែមិថុនា​ឆ្នាំ​២០២០ បង្ហាញ​សំរាម​ប្លា​ស្ទិក​រាយប៉ាយ​ពេញ​ឆ្នេរ​នៅ​ទីក្រុង​ប៉ា​ណា​ម៉ា