ដោយៈ ប​.​ខុន​/​ភ្នំពេញៈ អ្នកធ្វើអាជីវកម្ម​នេសាទ​ត្រី​តាម​គន្លង​ដាយ​ក្នុង​ដង​ទន្លេសាប​ទាំង​ក្នុងភូមិ​សាស្ត្រ​រាជធានី​ភ្នំពេញ​ក៏ដូចជា​ក្នុងភូមិ​សាស្ត្រ​ខេត្តកណ្តាល បាននាំគ្នា​ចាប់ផ្តើម​រុះរើ សាច់​ដាយ​ឡើង​ហើយ បន្ទាប់ពី​ចរន្តទឹក​ទន្លេសាប​ហូរ​ចេញ​ខ្សោយ និង​នៅពេល​ខ្លះ​ទឹកជោរ​ហូរ​ចូល​ទន្លេសាប (​តំបន់​ចតុមុខ​) វិញ ហើយ​ចាប់​ត្រី​លែង​បាន​រួចមក​។​

​លោក​ងិន ឌី នាយ​ខណ្ឌ​រដ្ឋបាល​ជល​ផលរាជ​ធានី​ភ្នំពេញ​បាន​ប្រាប់​ឱ្យ​រស្មី​កម្ពុជា​ដឹង​នៅ​ថ្ងៃទី​៨ ខែកុម្ភៈ ឆ្នាំ​២០២២​ថា ការធ្វើ​អាជីវកម្ម​នេសាទ​ត្រី​តាម​គន្លង​ដាយ​ក្នុង​ដង ទន្លេសាប តាម​ធម្មតា​ការធ្វើ​នេសាទ​តាម​គន្លង​ដាយ​ចប់​នៅក្នុង​ខែមីនា​រាល់​ឆ្នាំ​តែ​សម្រាប់​ឆ្នាំ​២០២២​នេះ អ្នកនេសាទ​បានចាប់ផ្តើម​នាំគ្នា​រុះរើ​សាច់​ដាយ​ឡើង​ហើយ​នៅ​ដើមខែ​កុម្ភៈ​នេះ​ទាំង​នៅ​ភ្នំពេញ និង​ខេត្តកណ្តាល ដោយសារ​ចាប់ ត្រី​លែង​បានមកពី​ទឹក​ហូរ​ខ្សោយ និង​ពេលខ្លះ​ទឹក​ហូរ​ចូល (​ទឹកជោរ​) ទៅ​បឹង​ទន្លេសាប​វិញ​។​

​នាយ​ខណ្ឌ​រដ្ឋបាល​ជល​ផល​ខាងលើ​និយាយ​ឱ្យដឹងទៀតថា នៅសល់​គន្លង​ដាយ​ពីរ​បី​មិនទាន់បាន​សារ​សាច់​ដាយ​ឡើង​ដោយសារ​គេ​នៅ​រង់​ចាំមើល​ក្រែង​មាន​ត្រី​ត្រូវ​ច្រើន​ម្តងទៀត​នៅក្នុង​ខ្នើត​ខែ​នេះ ។ នៅពេល​ចប់​រដូវ​នេសាទ​ឧបករណ៍​នេសាទ​នៅតាម​គន្លង​ដាយ​ត្រូវ​រុះរើ​ចេញពី​ក្នុង​ទន្លេ និង​ត្រូវ​អូស​ទៅ​ចត​នៅ​គោលដៅ​ដែល​រដ្ឋបាល​រាជធានី​ភ្នំ ពេញ​កំណត់​ជា​បណ្តោះអាសន្ន​នៅ​ព្រំប្រទល់​រាជធានី​ភ្នំពេញ និង​ខេត្តកណ្តាល ដោយ​មិន​អនុញ្ញាតឱ្យ​ចត​ផែ​នៅ​កណ្តាលទន្លេ ឬ​អែប​ច្រាំង​ដូច​មុន​ទៀតហើយ​។​

​លោក​ម៉ូត ហូ​សាន់ អ្នកធ្វើអាជីវកម្ម​នេសាទ​ត្រី​តាម​គន្លង​ដាយ​ជួល​ពី​រដ្ឋបាល​ជលផល​បាន​ប្រាប់​ឱ្យ​រស្មី​កម្ពុជា​ដឹង​នៅ​ថ្ងៃទី​៨ ខែកុម្ភៈ​ថា មកដល់​ថ្ងៃទី​៧​កើត ខែមាឃ ត្រូវ​នឹង​ថ្ងៃទី​៨ ខែកុម្ភៈ​ទៅហើយ អ្នកនេសាទ​នៅ​ខេត្ត​កំពង់​ឆ្នាំ​ក៏ដូចជា​នៅ​ខេត្តកណ្តាល​នៅតែ​មិនទាន់​ឃើញ​ចាប់បាន​ត្រី​ចេញពី​បឹង​ទន្លេសាប​ម្តងទៀត ព្រម​ជាមួយនឹង​ចរន្តទឹក​សឹងតែ​លែង​ហូរ​ទៅហើយ និង​នៅ ពេល​ទឹកជោរ​រុញ​ចូល​ទន្លេសាប​វិញ​រួចមក អ្នកនេសាទ​ទាំងអស់​បានសម្រេច​នាំគ្នា​រុះរើ​សាច់​ដាយ​ឡើង​ពី​ទឹក​ព្រោះ​ដាក់​បន្តទៀត​ក៏​ចាប់​ត្រី​មិនបាន​។ តាម​ធម្មតា​ការនេសាទ​ត្រី​ធ្វើ ប្រហុក​ផ្អក​នៅ​ចាប់បាន​មួយ​ខ្នើត​ខែមាឃ​នេះ​ទៀត តែដោយសារ​ទឹកតូច គឺ​ចប់​ត្រឹមនេះ​។​
អ្នកធ្វើអាជីវកម្ម​នេសាទ​ត្រី​ខាងលើ​និយាយ​ឱ្យដឹងទៀតថា​ការរុះរើ​សាច់​ដាយ​នេះ​ត្រូវ​ចំណាយពេល​ពី​១០​ទៅ​១៥​ថ្ងៃ​ទើប​រួច ព្រោះ​ត្រូវ​លាង​សម្អាត​ស្លែ និង​ហាលថ្ងៃ ឱ្យ​ស្ងួត​មុននឹង​យកទៅ​ទុកដាក់​។ ឯ​ក្បូន និង​ផែ​ដែលមាន​បោះ​យុថ្កា​នៅ​បាទទន្លេ​មិនទាន់​រុះរើ​បានទេ​ព្រោះ​ទឹក​នៅ​ហូរ​។ រាល់​ឆ្នាំ​ពេល​ចប់​ការនេសាទ​នៅក្នុង​ខែមីនា ផែ និង​ក្បូន​ត្រូវបាន​អូស​ចូល ទៅ​អែប​ច្រាំង តែ​ឆ្នាំនេះ​អាជ្ញាធរ​មិន​អនុញ្ញាតឱ្យ​ចត​នៅតាម​ច្រាំង​ដូន​មុន​ទេ គឺ​ត្រូវ​អូស​ទៅ​ចត​នៅ​ព្រំប្រទល់​ខេត្តកណ្តាល ពេលនេះ​អូស​មិន​រួច​នៅឡើយ​ទេ​ដោយសារ​ទឹក​នៅ ហូរ​ចេញពី​បឹង​ទន្លេសាប​នៅឡើយ​។​

​លោក​ម៉ៅ ហាក់​អនុប្រធាន​អាជ្ញាធរ​ទន្លេសាប​បាន​ប្រាប់​ឱ្យ​រស្មី​កម្ពុជា​ដឹង​នៅ​ថ្ងៃទី​៨ ខែកុម្ភៈ​ឆ្នាំ​២០២២​ដែរ​ថា ទឹក​បឹង​ទន្លេសាប​នៅ​ក្រគរ​កំពង់​លួង ថ្ងៃទី​៨ ខែកុម្ភៈ​នេះ នៅសល់​កម្ពស់​១,៨៦​ម៉ែត្រ ខ្ពស់ជាង​ទឹក​ឆ្នាំ​២០២១ ប្រមាណ​ជា​០,១៧​ម៉ែត្រ និង​ទាប​ជាង​កម្ពស់​ទឹក​មធ្យម​ច្រើន​ឆ្នាំ​០,៨៣​ម៉ែត្រ​។ នៅ​ចតុមុខ​មុខទឹក​មាន​កម្ពស់​២,៤២​ម៉ែត្រ ទាប​ជាង កម្ពស់​ទឹក​ឆ្នាំ​២០២១ ប្រមាណ​ជា​០,១៤​ម៉ែត្រ និង​ទាប​ជាង​កម្ពស់​ទឹក​មធ្យម​ច្រើន​ឆ្នាំ ០,៣៤​ម៉ែត្រ​។​ចរន្តទឹក​ហូរ​ចេញពី​បឹង​ទន្លេសាប​ពេលនេះ​ខ្សោយ​ណាស់ ហើយ បើ​នៅ​ចតុមុខ​ទឹក​រុញ​ទៅ​រុញ​មកហើយ​៕​