ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ អង្គការ​កម្មវិធី​ស្បៀងអាហារ​ពិភពលោក (WFP)​បាន​និយាយ​កាលពី​ថ្ងៃ​អង្គារ​ទី​៨​កុម្ភៈ​ថា ប្រជាជន​ប្រមាណ​១៣​លាន​នាក់​នៅក្នុង​ប្រទេសកេន​យ៉ា សូ​ម៉ាលី និង​អេត្យូ​ពីកំពុង​ប្រឈមមុខនឹ​ង​ភាពអត់ឃ្លាន​យ៉ាងធ្ងន់ធ្ងរ ខណៈ​តំបន់​ស្នែង​អាហ្វ្រិក​ជួបប្រទះ​នឹង​គ្រោះរាំងស្ងួត​ដ៏​អាក្រក់​បំផុត​ក្នុង​រយៈពេល​ជាច្រើន​ទសវត្សរ៍​មក​នេះ​។​

​ទីភ្នាក់ងារ​របស់​អង្គការសហប្រជាជាតិ​មួយ​នេះ​បាន​និយាយថា រដូវវស្សា​ចំនួន​បី​ជាប់ៗ​គ្នា​មិន​បាន​កើតឡើង​នោះទេ ខណៈ​តំបន់​នេះ​បាន​កត់ត្រា​ស្ថានភាព​រាំងស្ងួត​ខ្លាំង​បំផុត​ចាប់តាំងពី​ឆ្នាំ ១៩៨១​។​

​គ្រោះរាំងស្ងួត​បាន​បំផ្លាញ​ដំណាំ​និង​ធ្វើ​ឱ្យ​ងាប់​សត្វពាហនៈ​ក្នុង​ចំនួន​ខ្ពស់ “​មិន​ធម្មតា​” ដោយ​បង្ខំ​ឱ្យ​គ្រួសារ​នៅ​ជនបទ​ដែល​ពឹងផ្អែក​លើ​ការ​ចិញ្ចឹមសត្វ​និង​ការ​ធ្វើ​ស្រែ​ចម្ការ​បោះបង់ចោល​ផ្ទះសម្បែង​​របស់​ពួកគេ​។​

​លោក ម៉ៃ​ឃើ​ល ដាន់​ហ្វ​ត (Michael Dunford) ជា​នាយក​ប្រចាំ​តំបន់​របស់​អង្គការ WFP នៅ​អាហ្វ្រិក​ខាងកើត បាន​និយាយថា ទឹក​និង​ដី​ដាំ​ដុះ​កំពុង​ខ្វះខាត​ហើយ​ការព្យាករណ៍​នៃ​ទឹកភ្លៀង​​ទាប​ជាង​មធ្យម​ក្នុង​ប៉ុន្មាន​ខែ​ខាងមុខ​នេះ​រឹតតែ​គំរាម​បង្ក​ទុក្ខព្រួយ​ខ្លាំង​ថែម​ទៀត​។​

​លោក​បាន​និយាយ​នៅក្នុង​សេចក្តីថ្លែងការណ៍​មួយ​ថា “​ការប្រមូល​ផល​ត្រូវបាន​បំផ្លាញ សត្វពាហនៈ​កំពុង​ងាប់ និង​ភាពអត់ឃ្លាន​កំពុង​កើនឡើង​ខណៈ​គ្រោះរាំងស្ងួត​ដែល​កើតឡើង​ម្តងទៀត​នេះ​​កំពុង​ប៉ះពាល់​ដល់​តំបន់​ស្នែង​អាហ្វ្រិក​”​។​

“​ស្ថានភាព​នេះ​ទាមទារ​ឱ្យមាន​សកម្មភាព​មនុស្ស​ធម៌​ជាបន្ទាន់​” ដើម្បី​បញ្ចៀស​ការកើតឡើង​ម្តង​ទៀត​នៃ​វិបត្តិ​ដូច​នៅ​ប្រទេស​សូ​ម៉ាលី​ក្នុង​ឆ្នាំ ២០១១ នៅពេលដែល​មនុស្ស ២៥០.០០០​នាក់​ស្លាប់​ដោយ​​សារភាព​អត់ឃ្លាន​ក្នុងអំឡុងពេល​គ្រោះរាំងស្ងួត​ដ៏​យូរ​។

​ជំនួយ​ស្បៀងអាហារ​កំពុង​ត្រូវ​បាន​ចែកចាយ​នៅ​ទូទាំង​តំបន់​រាំងស្ងួត​នៃ​ប្រទេសកេន​យ៉ា អេត្យូ​ពី និង​សូ​ម៉ាលី កន្លែង​ដែល​អត្រា​កង្វះ​អាហារូបត្ថម្ភ​មាន​ខ្ពស់​និង​មនុស្ស​ប្រហែល ១៣​លាន​នាក់​ប្រឈម​​នឹង​ហានិភ័យ​នៃ​ភាពអត់ឃ្លាន​ធ្ងន់ធ្ងរ​នៅ​ត្រីមាស​ទី​មួយ​នៃ​ឆ្នាំ​នេះ​។​

​មនុស្ស​ប្រហែល ៥,៧ លាន​នាក់​ត្រូវការ​ជំនួយ​ស្បៀងអាហារ​នៅ​ភាគ​ខាងត្បូង​និង​ភាគ​អាគ្នេយ៍​នៃ​ប្រទេស​អេត្យូ​ពី រួម​ទាំង​កុមារ និង​ម្តាយ​ដែល​ខ្វះ​អាហារូបត្ថម្ភ​កន្លះ​លាន​នាក់​។​

​នៅក្នុង​ប្រទេស​សូ​ម៉ាលី ចំនួន​ប្រជាជន​ដែល​ត្រូវបាន​ចាត់ថ្នាក់​ថា​អត់ឃ្លាន​យ៉ាង​ធ្ងន់ធ្ងរ​ត្រូវ​គេ​រំពឹងថា​នឹង​កើនឡើង​ពី ៣,៥ លាន​នាក់​ទៅ ៤,៦ លាន​នាក់​នៅ​ខែ​ឧសភា​លុះត្រាតែ​មាន​អន្តរាគមន៍​​ជាបន្ទាន់​។​

​មនុស្ស ២,៨ លាន​នាក់​ផ្សេង​ទៀត​ត្រូវការ​ជំនួយ​នៅ​ភាគ​អាគ្នេយ៍​និង​ភាគ​ខាងជើង​ប្រទេសកេន​យ៉ា ជា​កន្លែង​ដែល​ភាពអាសន្ន​គ្រោះរាំងស្ងួត​ត្រូវបាន​ប្រកាស​នៅ​ខែ​កញ្ញា​។​

​អង្គការ WFP បាន​និយាយថា ទឹកប្រាក់​ចំនួន ៣២៧ លាន​ដុល្លារ​គឺ​ត្រូវការ​ចាំបាច់​ដើម្បី​ឆ្លើយតប​ទៅនឹង​តម្រូវការ​ភ្លាមៗ​ក្នុង​រយៈពេល​ប្រាំ​មួយខែ​ខាងមុខ​និង​គាំទ្រ​សហគមន៍​ចិញ្ចឹមសត្វ​ឱ្យ​កាន់តែ​មាន​​ភាព​ធន់​នឹង​ការប៉ះទង្គិច​ពី​អាកាសធាតុ​រាំងស្ងួត​ដែល​កើត​ឡើង​វិញ​នេះ​៕

​គ្រោះរាំងស្ងួត​បាន​បំផ្លាញ​ដំណាំ​និង​ធ្វើ​ឱ្យ​ងាប់​សត្វពាហនៈ​ក្នុង​ចំនួន​ខ្ពស់ “​មិន​ធម្មតា​”ក្រោយរដូវវស្សាបីជាប់គ្នាមិនមានទឹកភ្លៀងនៅតំបន់ស្នែងអាហ្រ្វិក