​ប្រែ​សម្រួលៈ​បំណង​/​បាងកក​(ST,​បាងកក​ប៉ុស្តិ៍​)៖ រថយន្ត​ដឹកទំនិញ​ធុន​ធំ​រាប់រយ​ត្រូវបាន​ម្ចាស់​វា​បើក​មក​ឈប់​ជា​ជួរ​ក្នុង​បំណង​ធ្វើអោយ​កកស្ទះ​ចរាច​រណ៍​នៅក្នុង​ទីក្រុង​បាងកក​កាលពី​ថ្ងៃ​អង្គារ​ទី​៨​កុម្ភៈ​ នៅ​ពេល​ពួកគេ​ព្យាយាម​ដាក់​សម្ពាធ​លើ​រដ្ឋាភិបាល​អោយ​បញ្ចុះ​ថ្លៃ​ប្រេងម៉ាស៊ូត​។​

​ប៉ូលិស​បាន​ព្យាយាម​ប្រាប់​អោយ​រថយន្ត​ធំ​ទាំង​នោះ​រួម​ទាំង​រថយន្ត​តាក់ស៊ី​ចាកចេញ​ដោយ​តែ​មិនបាន​សំរេច​នៅ​ពេល​ពួក​អ្នកបើក​រថយន្ត​ឈប់​ជា​ជួរ​នៅតាម​ផ្លូវ​ហាយវ៉េ​ចេញពី​ទីក្រុង​បាងកក​មួយ ដោយ​​រថយន្ត​ខ្លះ​មាន​ដាក់​បដា​ទាមទារ​អោយ​រដ្ឋមន្ត្រី​ថាមពល​ចុះចេញ​ពី​តំណែង​ដោយសារតែ​ប្រេង​ឡើងថ្លៃ​។​

​លោក​អា​ពី​ឆាត ប្រាយ​រុងរឿង​(Apichart Prairungruang) ប្រធាន​សហព័ន្ធ​គមនាគមន៍​ជើងគោក​ថៃ​បាន​និយាយថា​« យើង​ស្នើ​សុំ​រដ្ឋាភិបាល​កំណត់​ថ្លៃ​ប្រេង​ជាច្រើនលើក តែ​រដ្ឋ​មិន​បាន​​ចាត់​វិធានការ​ទេ​។​រដ្ឋាភិបាល​មិន​បាន​ឆ្លើយតប​នឹង​សំណើ​របស់​យើង​…​ចាប់ពី​ឥឡូវ យើង​នឹង​ដាក់​សម្ពាធ​រដ្ឋាភិបាល​ជាមួយនឹង​ការជួបជុំ​ទាមទារ​ធំ​ឡើង​»​។​

​សហព័ន្ធ​នេះ​ចង់​អោយ​ប្រេងម៉ាស៊ូត​មាន​តំលៃ​ត្រឹម​២៥​បាត​(០,៧៦​ដុល្លារ​)​ក្នុង​មួយ​លីត្រ ទាប​ជាង​៣០​បាត​ក្នុង​មួយ​លីត្រ​ដែល​ក្រសួង​បាន​កំណត់​អោយ​លក់​ចាប់តាំងពី​ខែ​តុលា​មក​។​

​តែ​ក្រសួង​បាន​និយាយថា តំលៃ​ពិត​គឺ​ម៉ា​ស៊ូ​ត​មួយ​លីត្រ​៣៥​បាត ដែល​វា​ឆ្លុះបញ្ចាំង​អំពី​ការ​ឡើងថ្លៃ​ប្រេង​នៅ​ទូទាំង​ពិភពលោក​។​

​ក្នុងពេល​ជាមួយគ្នា អ្នកនាំពាក្យ​ក្រសួង​ថាមពល​បាន​និយាយថា ការទាមទារ​របស់​ពួក​អ្នកបើកបរ​រថយន្ត​ធំ នឹង​នាំ​អោយ​រដ្ឋ​ខាត​(​ធ្វើ​ការឧបត្ថម្ភ​)១៨​ពាន់​លាន​បាត​ក្នុង​មួយខែ ដែល​វា​មិន​អាច​ធ្វើ​ទៅ​​បាន​៕

​អ្នកបើករថយន្ត​ធំ​មកជួបជុំ​គ្នា​នៅតាម​ផ្លូវ​ធំ​មួយ​ចេញពី​ក្រុង​បាងកក​កាលពី​ថ្ងៃ​អង្គារ​ដើម្បី​ទាមទារ​អោយ​រដ្ឋ​បញ្ចុះ​ថ្លៃ​ប្រេង​