ដោយៈ​សុផល​/ភ្នំពេញ​:​ចលនា​នៃ​ភ្ញៀវទេសចរ​មានការ​កម្រើក​ឡើងវិញ​ទាំង​ការមកដល់​នៃ​ភ្ញៀវ​អន្តរជាតិ​និង​ការធ្វើដំណើរ​របស់​ភ្ញៀវ​ក្នុងស្រុក​ក្នុងនោះ​ចាប់ផ្ដើម​មាន​ការតភ្ជាប់​ជើងហោះហើរ​ឡើងវិញ​រួមជាមួយ​នឹង​កំណើន​ភ្ញៀវទេសចរ​អន្តរជាតិ​មក​តាម​ផ្លូវអាកាស ព្រមទាំង​កំណើន​ភ្ញៀវទេសចរ​មក​តាមផ្លូវ​គោក​ផងដែរ​។​នេះ​ជាការ​លើកឡើង​របស់លោក ថោង ខុន រដ្ឋមន្ត្រី​ក្រសួងទេសចរណ៍​។​

​នៅក្នុង​ជំនួប​ជាមួយ​លោក ហ៊ុន ម៉ា​នី ប្រធាន​គណៈកម្មការ​អប់រំ យុវជន កីឡា ធម្មការ កិច្ចការ​សាសនា វប្បធម៌ និង​ទេសចរណ៍ នៃ​រដ្ឋសភា ដើម្បី​ពិនិត្យ​តាមដាន​វឌ្ឍនភាព​ការងារ​លើ​ការអនុវត្ត​ផែនទី​ចង្អុល​ផ្លូវ ស្តីពី ផែនការ​ស្ដារ និង​លើកស្ទួយ​វិស័យ​ទេសចរណ៍​កម្ពុជាក្នុង និង​ក្រោយ​វិបត្តិ​ជំងឺ​កូ​វីដ​-១៩(Roadmap)​កាលពី​ថ្ងៃទី​៨​កុម្ភៈ លោក​បណ្ឌិត ថោង ខុន មានប្រសាសន៍ថា​៖​ការ​រើប​ឡើងវិញ​នៃ​ភ្ញៀវទេសចរ​នេះ ដោយសារ​រាជរដ្ឋាភិបាល​បាន​ចាក់​ស្រោច​វ៉ាក់សាំង​ជូន​ប្រជាពលរដ្ឋ និង​ការគ្រប់គ្រង​សភាពការណ៍​នៃ​ការចម្លង​ឱ្យមាន​ការថយចុះ​មក​នៅ​កម្រិត​ទាប​និង​បាន​ឈានទៅ​បើក​ប្រទេស​ឡើងវិញ​លើ​គ្រប់​វិស័យសេដ្ឋកិច្ច​-​សង្គម រួមទាំង​វិស័យ​ទេសចរណ៍​ផងដែរ​។​

​លោក​រដ្ឋមន្ត្រី បាន​បន្តថា​ ​ចំពោះ​ចលនា​ទេសចរណ៍​ក្នុងស្រុក ចរន្ត​ភ្ញៀវទេសចរ​ផ្ទៃក្នុង​ចាប់ផ្ដើម​មាន​សន្ទុះ​ល្អប្រសើរ​នៅ​រៀងរាល់ថ្ងៃ​ឈប់សម្រាក​ចុង​សប្ដាហ៍ និង​ថ្ងៃ​បុណ្យទាន​សំខាន់ៗ ដែល​បងប្អូន​ប្រជាពលរដ្ឋ​បានធ្វើ​ដំណើរ​កម្សាន្ត​នៅ​ទូទាំងប្រទេស​។ ទន្ទឹមនឹងនេះ យើង​នឹង​បន្ត​ខិតខំ​ប្រឹងប្រែង​បន្តទៀត​ជាមួយ​គ្រប់ភាគី​ពាក់ព័ន្ធ​នៅក្នុង​ការជំរុញ​ការអនុវត្ត SOP និង​វិធាន​សុវត្ថិភាព សំដៅ​ធានា​ឱ្យ​ដំណើរ​កម្សាន្ត និង​ការ​ទស្សនា​របស់​ភ្ញៀវទេសចរ​ជាតិ និង​អន្តរជាតិ​អាច​ប្រព្រឹត្តទៅបាន​តាម​គន្លង​ប្រក្រតីភាព​ថ្មី​។

​លោក​រដ្ឋមន្ត្រី ក៏បាន​ថ្លែងអំណរគុណ​ដល់​គណៈកម្មកា​រ​ទី​៧​នៃ​រដ្ឋសភា ជាពិសេស ឯកឧត្តម​ប្រធាន​គណៈកម្មការ​ផ្ទាល់ ដែលជា​និច្ចកាល​តែង​យកចិត្តទុកដាក់ និង​បាន​ផ្ដល់នូវ​អនុសាសន៍ ជា​ធាតុ​ចូល​សំខាន់ៗ​នៅក្នុង​ដំណាក់កាល​វិបត្តិ ដែលជា​មូលដ្ឋាន​សម្រាប់​ការរៀបចំ​ផែនការ​យុទ្ធសាស្ត្រ និង​វិធានការ​គោលនយោបាយ​ចំពោះមុខ​នានា ដើម្បី​គ្រប់គ្រង និង​កាត់បន្ថយ​ឥទ្ធិពល​ពី​វិបត្តិ​នៃ​ជំងឺ​កូ​វីដ​-១៩ រួមជាមួយ​នឹង​ទិសដៅ​នៃ​ការអនុវត្ត​ទៅមុខ​បន្តទៀត​។​

​គួរ​រម្លឹក​ដែរ​ថា កាលពី​ថ្ងៃទី​១៣ ខែសីហា ឆ្នាំ​២០២០កន្លងទៅ គណៈកម្មការ​ទី​៧ នៃ​រដ្ឋសភា បាន​ជួបប្រជុំ​ផ្លូវការ​ជាមួយ​គណៈប្រតិភូ​ក្រសួងទេសចរណ៍ ដឹកនាំ​ដោយ​លោក​បណ្ឌិត ថោង ខុន រដ្ឋមន្ត្រី​ក្រសួងទេសចរណ៍ ដើម្បី​ពិភាក្សា​អំពី «​វិធានការ​ជា​ដំណោះស្រាយ​ចំពោះ​វិស័យ​ទេសចរណ៍ ក្នុង និង​ក្រោយ​វិបត្តិ​កូ​វីដ​-១៩» និង​បាន​ឯកភាព​វាយតម្លៃថា​វិបត្តិ​កូ​វីដ​-១៩ ពិតជា​បាន​ជះឥទ្ធិពល​អវិជ្ជមាន​យ៉ាងធ្ងន់ធ្ងរ​មកលើ​វិស័យ​ទេសចរណ៍​កម្ពុជា ហើយ​ការ​ស្តារឡើងវិញ​នៃ​វិស័យនេះ​ទាមទារ​ឱ្យមាន​ការគិតគូរ និង​តម្រង់ទិស​គោលនយោបាយ​ច្បាស់លាស់ និង​គ្រប់​ជ្រុងជ្រោយ​និង​ត្រូវការ​ការចូលរួម​ពី​ភាគី​ពាក់ព័ន្ធ​ដោយ​ត្រូវ​ប្រែក្លាយ​ការគំរាមកំហែង​ពី​វិបត្តិ​ជំងឺ​កូ​វីដ​១៩​ទៅជា​កាលានុវត្តភាព​ស​ម្រា​ប់​ការកែទម្រង់​ក្នុង​វិស័យ​ទេសចរណ៍​កម្ពុជា​ឱ្យក្លាយ​ជា​គោលដៅ​ទេសចរណ៍ ប្រកបដោយ​គុណភាព សុវត្ថិភាព និង​និរន្តរភាព​៕សរន​