ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖​កាលពី​ថ្ងៃ​អង្គារ​ទី​៨​កុម្ភៈ​ក្រុម​ធុរកិច្ច​អាម៉េរិក​និង​កាណាដា​បានទាមទារ​ឱ្យ​អ្នក​ដឹក​ទំនិញ​ដែល​តវ៉ា​ប្រឆាំង​នឹង​ការ​រឹតបន្តឹង​ទប់ស្កាត់​កូវី​ដប​ញ្ចប់​ការ​​បិទផ្លូវ​ពាណិជ្ជកម្ម​ដ៏​សំខាន់​រវាង​ប្រទេស​ទាំង​ពីរ​។​

​ស្ពាន​ឯកអគ្គរដ្ឋទូត (Ambassador Bridge)​ដែល​ត​ភ្ជាប់​ខេត្ត​អុង​តា​រី​យ៉ូ (Ontario)​និង​រដ្ឋ​មី​ស៊ី​ហ្គែ​ន​របស់​សហរដ្ឋ​អាម៉េរិក​ត្រូវបាន​បិទ​មួយផ្នែក​ចំពោះ​ចរាចរណ៍​យានយន្ត​ចាប់​តាំង​​ពី​ថ្ងៃ​ចន្ទ​ដោយ​អ្នកគាំទ្រ​នៃ​ក្បួន​រថយន្ត​ដឹកទំនិញ ដែល​កាន់កាប់​ទីក្រុង​អូ​តា​វ៉ា​ដើម្បី​បដិសេធ​ការ​វ៉ាក់សាំង​ជា​ចាំបាច់​និង​ការ​រឹតបន្តឹង​សុខភាព​សាធារណៈ​ផ្សេងទៀត​។​

​ក្រុម​ធុរកិច្ច​ទាំងនេះ​បាន​និយាយ​នៅក្នុង​សេចក្តីថ្លែងការណ៍​មួយ​ថា​”​សមាគម​ធុរកិច្ច​នៅ​សង​ខាង​ព្រំដែន​កំពុង​អំពាវនាវ​ឱ្យ​បើក​វិញ​យ៉ាង​ឆាប់រហ័ស​និង​ជា​បន្ទាន់​នៃ​ការបិទ​ស្ពាន​ឯកអគ្គរដ្ឋទូត​​វីន​ស័រ​-​ដេ​ត្រយ (Windsor-Detroit Ambassador Bridge) និង​ការបើក​ដំណើរការ​ឡើងវិញ​ទាន់​ពេលវេលា​នៃ​ស្ពាន​នេះ​”​។​

​ស្ពាន​ខ្សែកាប​នេះ​គឺជា​ផ្លូវ​ឆ្លងកាត់​ពាណិជ្ជកម្ម​ដ៏​មមាញឹក​បំផុត​នៅ​អាម៉េរិក​ខាងជើង ដែល​ជា​ធម្មតា​មាន​អ្នកដំណើរ ភ្ញៀវទេសចរ និង​អ្នកបើកបរ​រថយន្ត​ដឹក​ទំនិញ​ជា​ង ៤០.០០០​នាក់​ដឹកទំនិញ​ដែល​​មានតម្លៃ ៣២៣ លាន​ដុល្លារ​អាម៉េរិក​ឆ្លងកាត់​ជា​រៀងរាល់ថ្ងៃ​។​

​ទំនាក់ទំនង​ពាណិជ្ជកម្ម​ដ៏​សំខាន់​មួយទៀត​រវាង​ទីក្រុង​ឃូត ខេត្ត​អាល់​បឺតា (Coutts, Alberta) និង​ទីក្រុង​ស្វ៊ី​ត​ហ្គ្រា​ស់ រដ្ឋ​ម៉ុង​តា​ណា (Sweet Grass, Montana)​ក៏​ត្រូវ​បាន​បិទ​ដោយ​​ក្រុមអ្នកតវ៉ា​អស់​ជាច្រើន​ថ្ងៃ​ផងដែរ​។

​ក្រុម​ធុរកិច្ច​ចំនួន ៦០ ដែល​រួម​មាន​សភាពាណិជ្ជកម្ម​ក្រុង​ដេ​ត្រ​យ (Detroit) និង​សភាពាណិជ្ជកម្ម​កាណាដា​បាន​និយាយថា “​ខណៈ​សេដ្ឋកិច្ច​របស់​យើង​កំពុង​ងើប​ចេញ​ពី​ផល​ប៉ះពាល់​នៃ​ជំងឺ​រាតត្បាត យើង​មិន​អាច​អនុញ្ញាត​ឱ្យ​ក្រុម​ណាមួយ​ធ្វើឱ្យ​ខូច​ដល់​ពាណិជ្ជកម្ម​ឆ្លង​ព្រំដែន​ដែល​គាំទ្រ​ដល់​គ្រួសារ​នៅ​សង​ខាង​ព្រំដែន​នោះទេ​”​។​

​មុននេះ រដ្ឋមន្ត្រី​ដឹកជញ្ជូន​កាណាដា លោក អូ​ម៉ា អាល់​ហ្គា​ប្រា (Omar Alghabra) បាន​ព្រមាន​ថា ការបិទ​ព្រំដែន ប្រសិនបើ​នៅ​តែ​បន្ត​”​នឹង​មាន​ផលប៉ះពាល់​យ៉ាងធ្ងន់ធ្ងរ​ដល់​សេដ្ឋកិច្ច​របស់​​យើង​លើ​សង្វាក់​ផ្គត់ផ្គង់​របស់​យើង​”​។​

​លោក​បាន​និយាយថា គាត់​បាន​ឮ​ពី​ក្រុមហ៊ុន​ផលិត​រថយន្ត​និង​ក្រុមហ៊ុន​ចែកចាយ​អាហារ​ដែល​កំពុង​រង​ផលប៉ះពាល់ ប្រាប់​អ្នកយកព័ត៌មាន​នៅ​ទីក្រុង​អូ​តា​វ៉ា​ថា​សង្ឃឹម​ក្រុមបាតុករ​នឹង​បញ្ឈប់​ការបិទ​ស្ពាន “​ព្រោះ​វា​កំពុង​មាន​ផលប៉ះពាល់​យ៉ាងធ្ងន់ធ្ងរ​ដល់​ជីវភាព​រស់នៅ​របស់​ប្រជាជន​”៕

​អ្នកគាំទ្រ​នៃ​ក្បួន​រថយន្ត​ដឹកទំនិញ​បដិសេធ​ការ​វ៉ាក់សាំង​ជា​ចាំបាច់​និង​ការ​រឹតបន្តឹង​សុខភាព​សាធារណៈ​ផ្សេងទៀត​នៅ​កាណាដា