​ប្រែ​សម្រួល : កញ្ញា​ដា​លី​ស (​ដេលី​មែ​ល​) ៖ អាជ្ញាធរ​បាន​និយាយថា ភ្លៀង​ធ្លាក់​ខ្លាំង​បាន​បង្ក​ឱ្យ​មាន​ការ​រអិល​បាក់​ដី​ដែល​សង្កត់​លើ​តំបន់​លំនៅដ្ឋាន​មួយ​ក្នុង​ទីក្រុង​មួយ​នៅ​ភាគ​ខាងលិច​ប្រទេស​កូឡុំប៊ី​​កាលពី​ព្រឹក​ថ្ងៃ​អង្គារ​ទី​៨​កុម្ភៈ ដោយ​សម្លាប់​មនុស្ស​យ៉ាងហោចណាស់ ១៤ នាក់ និង​៣៥ នាក់​ផ្សេង​ទៀត​រងរបួស​។​

​ក្រុមមន្ត្រី​បាន​និយាយថា មនុស្ស​ម្នាក់​ត្រូវបាន​រាយការណ៍​ថា​បាត់​ខ្លួន បន្ទាប់​ពី​ការ​រអិល​បាក់​ដី​នៅ​សង្កាត់​រី​សា​រ៉ាល់​ដា (Risaralda)​ក្នុង​ទីក្រុង​ប៉េរីរ៉ា (Pereira)​។​

​អភិបាលក្រុង​ប៉េរីរ៉ា លោក កា​ឡូ​ស ម៉ា​យ៉ា (Carlos Maya)​ដែល​បាន​បញ្ជាក់​ពី​ចំនួន​អ្នកស្លាប់ បាន​ព្រមាន​ថា ហានិភ័យ​នៃ​ការ​រអិល​បាក់​ដី​នៅ​តែ​បន្ត​កើតមាន​នៅក្នុង​តំបន់​នេះ​ហើយ​ជំរុញ​ឱ្យ​ប្រ​​ជា​ជន​ចាក​ចេញ​ដើម្បី​ចៀសវាង​ការស្លាប់​និង​របួស​បន្ថែមទៀត​។​

​ផ្ទះ​ជា​ច្រើន​នៅក្នុង​សង្កាត់​ដែល​រង​ការវាយប្រហារ​គឺ​ធ្វើ​ពី​ឈើ ហើយ​មនុស្ស​នៅក្នុង​ផ្ទះ​ជាង ៦០ ត្រូវបាន​ជម្លៀសចេញ ខណៈ​ក្រុម​សង្គ្រោះ​កំពុង​វាយតម្លៃ​ការខូចខាត​និង​ហានិភ័យ​។​

​ប្រធានាធិបតី​កូឡុំប៊ី លោក អ៊ី​វ៉ាន់ ឌូ​កេ (Ivan Duque) បាន​ផ្ញើ​សារ​រំលែក​ទុក្ខ​ដល់​ក្រុមគ្រួសារ​សព​៕

​ទិដ្ឋភាព​ក្រោយ​ហេតុការណ៍​រអិល​បាក់​ដី​នៅ​សង្កាត់​រី​សា​រ៉ាល់ដា​ក្នុង​ទីក្រុង​ប៉េរីរ៉ា​កាលពី​ថ្ងៃ​អង្គារ