ដោយៈ​សុផល​/​ភ្នំពេញ​៖​ក្រសួង​វប្បធម៌ និង​វិចិត្រសិល្បៈ បាន​បន្ត​រៀបចំ​និង​សហការ​រៀបចំ​ឯកសារ​ដើម្បី​ស្នើសុំ​ចុះ “​ប្រាសាទ​កោះ​កេរ​” “​នំ​បញ្ចុក​” “​ក្បាច់គុន​ល្បុក្កតោ​” និង “​ទីក្រុង​បាត់ដំបង​” ទៅក្នុង​បញ្ជី​បេតិកភណ្ឌ​ពិភពលោក​, បញ្ជី​បេតិកភណ្ឌ វប្បធម៌​អរូបី​នៃ​មនុស្សជាតិ​ និង​បណ្តាញ​ទីក្រុង​ដែលមាន​ភាព​ច្នៃប្រឌិត (Creative Cities Network) របស់​អង្គការ​យូណេស្កូ​។​

​លោកស្រី​បណ្ឌិត​សភាចា​រ្យ ភឿង ស​កុ​ណា រដ្ឋមន្ត្រីក្រសួង​វប្បធម៌ និង​វិចិត្រសិល្បៈ បាន​ថ្លែង​ដូច្នេះ​ក្នុង​ពិធី​បើក​អង្គសន្និបាត​បូកសរុប​លទ្ធផល​ការងារ​ឆ្នាំ​២០២១ និង​លើក​ទិសដៅ​ការងារ​ឆ្នាំ​២០២២ របស់​ក្រសួង​វប្បធម៌ និង​វិចិត្រសិល្ប​:​នា​ព្រឹក​ថ្ងៃទី​៩​ខែកុម្ភៈ ឆ្នាំ​២០២២​សាលសន្និសីទ​ចតុម្មុខ​។​

​លោកស្រីរដ្ឋមន្ត្រី បានឱ្យដឹង​ទៀតថា​​ក្រសួង​ក៏បាន​បន្ត​រៀបចំ​បញ្ជី​ត្រៀម​ដើម្បី​គ្រោង​ស្នើសុំ​ចុះ​សម្បត្តិ​វប្បធម៌​ដែលមាន សក្តានុពល​ផ្សេងទៀត ទៅក្នុង​បញ្ជី​បេតិកភណ្ឌ​របស់​អង្គការ​យូណេស្កូ រួមមាន ក្រុម​ប្រាសាទបន្ទាយឆ្មារ​, រមណីយដ្ឋាន​អង្គរបុរី​និង​ភ្នំ​ដា​, រមណីយដ្ឋាន​គូលែន​, ក្រុម​ប្រាសាទបេង​មាលា​, ក្រុម​ប្រាសាទព្រះខ័ន កំពង់ស្វាយ​, រមណីយដ្ឋាន​ឧដុង្គ​, “​សារមន្ទីរ​ឧក្រិដ្ឋកម្ម​ប្រល័យពូជសាសន៍​ទួលស្លែង​, មជ្ឈមណ្ឌល​ប្រល័យពូជសាសន៍​ជើងឯក​, អតីត​មន្ទីរឃុំឃាំង ម​-១៣”​និង​ព្រះ​រាជពិធី​បុណ្យអុំទូក​៕សរន