​ប្រែ​សម្រួលៈ​បំណង​(​ដេល្លី​ម៉េល​)៖​ប្រធានាធិបតី​បារាំង​លោក អេ​ម៉ានុយ​អែល ម៉ា​ក្រុង បាន​និយាយ​កាលពី​ថ្ងៃ​អង្គារ​ថា ប្រធានាធិបតី​រុស្ស៊ី លោក​វ្ល៉ា​ឌី​មៀ ពូ​ទីន បាន​ប្រាប់​លោក​ថា រដ្ឋាភិបាល​ក្រុង​មូ​ស្គូ​​នឹង​មិន​បង្កើន​ភាព​តានតឹង​ថែមទៀត​ចំពោះ​វិបត្តិ​អ៊ុយ​ក្រែនទេ​។​

​លោក​ម៉ា​ក្រុង​ក៏​បាន​និយាយថា វា​នឹង​ត្រូវការ​ពេល​ដើម្បី​ស្វែងរក​ដំណោះស្រាយ​ការទូត​មួយ​ចំពោះ​ភាព​តានតឹង​ដែល​កំពុង​កើនឡើង ដែល​តំណាងអោយ​វិបត្តិ​សន្តិសុខ​ធំ​បំផុត​រវាង​រុស្ស៊ី​និង​លោកខាងលិច​​ចាប់តាំងពី​សង្គ្រាមត្រជាក់​។​

​ការលើកឡើង​ដូច្នេះ​ធ្វើឡើង​ក្នុងពេល​លោក​កំពុង​ធ្វើ​ទស្សនកិច្ច​ទីក្រុង​គៀវ​របស់​អ៊ុ​យក្រែន ខណៈ​រដ្ឋាភិបាល​វិមាន​ក្រឹម​ឡាំង​បដិសេធ​របាយការណ៍​ដែល​ថា​លោក​ម៉ា​ក្រុង​និង​ពូ​ទី​ន​បាន​ចុះហត្ថលេខា​​មួយ​ស្តីពី​ការបន្ថយ​ភាព​តានតឹង​ជុំវិញ​វិបត្តិ​នេះ​។​

​អ្នកនាំពាក្យ​វិមាន​ក្រឹម​ឡាំង លោក​ឌី​មី​ទ្រី ប៉េ​ស្កូវ បាន​និយាយថា «​ក្នុងស្ថានភាព​បច្ចុប្បន្ន រដ្ឋាភិបាល​ក្រុង​មូ​ស្គូ​និង​ប៉ារីស មិន​អាច​ឈាន​ដល់​ការព្រមព្រៀង​ណាមួយ​ទេ​»​។​

​លោក​ម៉ា​ក្រុង​បាន​ជួបពិភាក្សា​ជាមួយ​សម​ភាគី​អ៊ុ​យក្រែន លោក វ៉ូ​ឡូ​ឌី​មៀ ហ្សេ​ឡេន​ស្គី​(Volodymyr Zelensky)​ចំ​ពេល​មាន​ការបារម្ភ​កាន់តែ​ខ្លាំង​ឡើង​អំពី​ការចូល​ឈ្លានពាន​ពី​សំណាក់​កងកម្លាំង​​រុស្ស៊ី​ដែល​កំពុងផ្តុំ​ទាហាន​ជាង​១០០.០០០​នាក់​នៅ​ក្បែរ​ព្រំដែន​អ៊ុ​យក្រែន​។​

​ទោះ​ជា​អះអាង​ថា​ខ្លួន​មិន​មាន​ផែនការ​ចូល​ឈ្លានពាន​ប្រទេស​ក្បែរ​ខាង ក៏​រដ្ឋាភិបាល​ក្រុង​មូ​ស្គូ​នៅ​តែ​ទាមទារ​អោយ​អាម៉េរិ​ក​និង​អង្គការ​ណា​តូ​ធានាថា​នឹង​មិន​ទទួលយក​អ៊ុយ​ក្រែ​ន​និង​អតីត​រដ្ឋសមា​ជិក​​សហភាពសូវៀត​ជាច្រើន​ទៀត​ជា​សមាជិក​ថ្មី​របស់​អង្គការ​ណា​តូ បញ្ឈប់​ការ​ដាក់​តាំង​សព្វាវុធ​នៅ​អឺរ៉ុប​ខាងកើត​និង​ដក​កងកម្លាំង​ចេញពី​ទីនោះ​។​ទោះជា​យ៉ាងណា អាម៉េរិក​និង​ណា​តូ បាន​ច្រានចោល​សំ​​ណើ​ទាំងនេះ​។​

​ក្នុង​សន្និសីទកាសែត​មួយ​ជាមួយ​លោក ហ្សេ​ឡេន​ស្គី លោក​ម៉ា​ក្រុង​បាន​និយាយថា លោកពូ​ទីន​បាន​ប្រាប់​លោក​ក្នុងជំនួប​ប្រាំ​ម៉ោង​កាលពី​ថ្ងៃ​ចន្ទ​ថា​«​លោក​នឹង​មិន​ផ្តួចផ្តើម​អោយមាន​ភាព​តានតឹង​​បន្ថែម​ទេ​។​ខ្ញុំ​គិតថា​វា​សំខាន់​ណាស់​»​។​

​ប្រធានាធិបតី ម៉ា​ក្រុង (ឆ្វេង)និង​សម​ភាគី​អ៊ុ​យក្រែន ក្នុងជំនួប​នៅ​ទីក្រុង​គៀវ​កាលពី​ថ្ងៃ​អង្គារ​

​កិច្ចខិតខំ​ការទូត​ដើម្បី​បន្ថយ​ភាព​តានតឹង​ជុំវិញ​បញ្ហា​អ៊ុយ​ក្រែន​ត្រូវ​បាន​បន្ត​កាលពី​ថ្ងៃ​អង្គារ ដោយ​ប្រធានាធិបតី​បារាំង​បាន​ទៅដល់​ទីក្រុង​គៀវ នៅ​មួយ​ថ្ងៃក្រោយ​ជួបពិភាក្សា​ជាមួយ​ប្រធានាធិបតី​​រុស្ស៊ី​អស់​ពេល​រាប់​ម៉ោង តែ​ទំនងជា​មិន​បាន​ទម្លុះទម្លាយ​ភាពទាល់ច្រក​ឬ​បង្កើត​បាន​កិច្ចព្រមព្រៀង​ណាមួយ​ទេ​។​

​យោង​តាម​ប្រធានាធិបតី​បារាំង លោកពូ​ទីន ក៏​បាន​និយាយថា​នឹង​មិន​ចាំបាច់​មាន​មូលដ្ឋាន​យោធា​អចិន្ត្រៃយ៍​របស់​រុស្ស៊ី​ណាមួយ ឬ​ក៏​បញ្ជូន​ទាហាន​ទៅ​ឈរជើង​នៅ​បេឡា​រូស​ទេ ទោះជា​បច្ចុប្បន្ន​រុស្សី​បាន​​ចល័ត​ទ័ព​ប្រមាណ​៣០.០០០​នាក់​ទៅ​ចូលរួម​សមយុទ្ធ​ជាមួយ​កងកម្លាំង​បេឡា​រូ​សក្តី​។​

​អ្នកនាំពាក្យ​វិមាន​ក្រឹម​ឡាំង លោក​ឌី​មី​ទ្រី ប៉េ​ស្កូវ បាន​និយាយថា រុស្ស៊ី​នឹង​ដក​ទាហាន​ចេញពី​បេឡា​រូស​ក្រោយ​សមយុទ្ធ​យោធា​រួមគ្នា​ដែល​ត្រូវបាន​រៀបចំ​ទុកជាមុន​យូរ​មក​ហើយ​៕