​ប្រែ​សម្រួល : កញ្ញា​ដា​លី​ស (​ដេល្លីម៉េល​) ៖ របាយការណ៍​មួយ​បានបង្ហាញ​ថា ទូរស័ព្ទ iPhone SE 3 របស់​ក្រុមហ៊ុន Apple អាច​នឹង​ចេញ​នៅ​ដើម​ខែ​ក្រោយ ដោយ​ស្មា​ត​ហ្វូន​លំដាប់​ថវិកា​ថ្មី​នេះ​គ្រោង​នឹង​បំពាក់​មក​ជាមួយនឹង​សមត្ថភាព 5G​។​

​គេ​បានដឹង​មក​ថា ទូរស័ព្ទ ដែល​ធ្វើ​បច្ចុប្បន្នភាព​ចុងក្រោយ​កាលពី​ពីរ​ឆ្នាំ​មុន​នៅ​ពេល​ដែល​ក្រុមហ៊ុន​បច្ចេកវិជ្ជា​យក្ស​នេះ​ចេញ​កំណែ​ថ្មី​ដែល​គេ​រង់ចាំ​យ៉ាងយូរ​ចំពោះ SE ដើម​របស់​ខ្លួន​នោះ នឹង​មាន​ប្រព័ន្ធ​ដំណើរការ​លឿន​ជាង​មុន​និង​កាមេរ៉ា​ប្រសើរ​ជាង​មុន​។​

​ប៉ុន្តែ​វា​ទំនងជា​មិន​មាន​ការ​រចនា​ម៉ូត​ថ្មី​ទាំងស្រុង​នោះ​ទេ ដូច្នេះ​មានន័យថា​ប៊ូ​តុង Home​របស់ iPhone បែប​បុរាណ នឹង​មិន​ត្រូវ​បាន​លុបចោល​ទាំងស្រុង​នោះ​ទេ​។​

iPhone SE បច្ចុប្បន្ន​ប្រើ​ប៊ូ​តុង Home ស្រដៀង​នឹង iPhone 8 ឆ្នាំ ២០១៧ ដែរ​។​

​យោង​តាម​លោក​ម៉ាក ហ្គួ​មែន (Mark Gurman) មក​ពី​វេបសាយ Bloomberg បានឱ្យដឹងថា ក្រុមហ៊ុន Apple អាច​នឹង​បង្ហាញ​ម៉ូ​ដែល iPhone SE ថ្មី​ក្នុង​ព្រឹត្តិការណ៍​និទាឃ​រដូវ ដែល​លេចឮ​រហិចរហៀង​ថា​អាច​នឹង​ធ្វើឡើង​នៅ​ថ្ងៃទី ៨ ខែ​មីនា​។​

​មិនទាន់​មាន​ការបញ្ជាក់​លម្អិត​អំពី​តម្លៃ​នៅឡើយ​ទេ ហើយក៏​មិនទាន់​មាន​ការលើកឡើង​អំពី​របៀប​ដែល Apple អាច​ដោះស្រាយ​ជាមួយនឹង​ការ​ស្រក​ចុះ​ថាមពល​ថ្ម​ដែល​ទាក់ទង​នឹង​ប្រព័ន្ធ 5G ដោយហេតុ​ថា SE មាន​ថ្ម​តូច​ជាង​ថ្ម​ស្តង់ដារ​នាពេល​បច្ចុប្បន្ន​។

​លោក​ហ្គួ​មែនបាន​ដកស្រង់​ប្រភព​ដែល​ដឹង​ពី​ផែនការ​របស់ Apple និង​លើកឡើង​ថា ការប្រកាស​សំខាន់ៗ​ចំនួន​បួន​រំពឹង​ធ្វើឡើង​នៅក្នុង​ព្រឹត្តិការណ៍​នេះ​។​

​ពាក្យ​ចចាមអារ៉ាម​មួយ​គឺថា iPad Air នឹង​ទទួលបាន​ការធ្វើ​បច្ចុប្បន្នភាព ជាមួយនឹង​ប្រព័ន្ធ​ដំណើរការ​លឿន​ជាង​មុន និង​សមត្ថភាព 5G ៕

ទូរស័ព្ទ iPhone SE 3 អាច​នឹង​ប្រកាស​នៅ​ថ្ងៃទី ៨ មីនា​