​ប្រែ​សម្រួលៈ​បំណង​(ST,​បាងកក​ប៉ុស្តិ៍​)៖ នាយករដ្ឋមន្ត្រី​ប្រា​យុទ្ធ ចាន់ អូ​ចា កាលពី​ថ្ងៃ​អង្គារ​ទី​៨​កុម្ភៈ​ត្រូវបាន​រដ្ឋមន្ត្រី​ប្រាំពីរ​រូប​បំបាក់មុខ​ដោយសារតែ​ពួកគេ​ធ្វើ​ពហិការ​មិន​ចូលរួម​កិច្ចប្រជុំ​គណៈរដ្ឋមន្ត្រី​​ដែល​វា​ជា​សញ្ញា​មួយទៀត​បង្ហាញ​ការមិនចុះសម្រុង​កាន់តែខ្លាំង​ឡើង​នៅក្នុង​ក្រុមចំរុះ​១៨​គណបក្ស​ដឹកនាំ​ដោយ​អតីត​មេទ័ព​រូបនេះ​។​

​អវត្តមាន​របស់​រដ្ឋ​មន្ត្រី​មកពី​គណបក្ស​ភូម​ចៃ​ថៃ​(Bhumjaithai)​ដែល​ជា​សមាជិក​ធំ​ទី​ពីរ​ក្នុង​រដ្ឋាភិបាលចម្រុះ អាច​ជា​ការ​អាម៉ាស់មុខ​មួយទៀត​សំរាប់​លោក​ប្រា​យុទ្ធ បន្ទាប់​ពី​គណបក្ស ផា​ឡាង​​ប្រា​ចា​រ៉ា​ត​(Palang Pracharat)​របស់​លោក​កាលពី​ខែ​មុន​បាន​បណ្តេញ​ក្រុម​មួយ​ដែល​គ្រប់គ្រង​កៅអី​សភា​ចំនួន​២១ ដោយ​ចោទ​ក្រុម​នេះ​ថា​បង្ក​ការបែកបាក់​ក្នុង​បក្ស​។​

​ពហិការ​នេះ​ដោយសារតែ​ពួកគេ​ជំទាស់​នឹង​ផែនការ​របស់​រដ្ឋាភិបាល​ដើម្បី​បន្ត​អោយ​ក្រុមហ៊ុន​BTS Group Holdings​ធ្វើ​អាជីវកម្ម​រថភ្លើង​អាកាស​ក្នុង​ក្រុង​បាងកក​រយៈពេល​៣០​ឆ្នាំ​ទៀត​។​

​លោក​ប្រា​យុទ្ធ​បង្ហាញ​ទឹកមុខ​មិន​សប្បាយ​នៅក្រោយ​កិច្ចប្រជុំ​។​លោក​បាន​បដិសេធ​មិន​ព្រម​និយាយ​ទៅកាន់​អ្នកយកព័ត៌មាន​។​មាន​សេចក្តីរាយការណ៍​ថា សូម្បី​តែ​ក្នុង​គណបក្ស​របស់​លោក ក៏​លោក​រង​សម្ពាធ​ខ្លាំង​ផងដែរ​

​អ្នកវិទ្យាសាស្ត្រ​នយោបាយ ទី​ទី​ផូល ផាក​ឌី​វ៉ា​នី​ច (Titipol Phakdeewanich)​បាន​និយាយថា​ការបង្ហាញ​ការ​ម​ងាយ​ជា​ចំហ​បែបនេះ​វា​បង្ហាញ​ចលាចល​កាន់តែ​ខ្លាំង​ឡើង​នៅក្នុង​ក្រុមចំរុះ​កំពុង​​កាន់​អំណាច​នៅ​មុន​ការ​កាន់តំណែង​១២​ខែ​ចុងក្រោយ​របស់​លោក​ត្រូវ​ចប់​។​«​ការ​តថ្លៃ​អំណាច​កំពុង​បង្ហាញអោយឃើញ​កាន់តែ​ច្បាស់​រវាង​ក្រុម​ក្នុង​រដ្ឋាភិបាល ដោយ​មួយៗ​បង្កើន​ចំណែក​របស់​គេ​នៅពេល​​ការបោះឆ្នោត​ជិត​ចូលមក​ដល់​»​។​

​ក្នុងពេល​ជាមួយគ្នា ឧបនាយករដ្ឋមន្ត្រី ប្រា​វីត វង់​ស៊ូ​វ៉ុន ដែល​ដឹកនាំ​គណបក្ស​ផា​ឡាង ប្រា​ចា​រ៉ា​ត បាន​និយាយថា គណបក្ស​នេះ​នឹង​មិន​បែក​ទៅជា​ក្រុម​តូចៗ តែ​មាន​ផែនការ​ពង្រីក​វា​នៅក្នុង​ការបោះ​​ឆ្នោត​នាពេលខាងមុខ ហើយ​លោក​ប្រា​យុទ្ធ ចាន់​អូ​ចា នៅតែ​ជា​បេក្ខជន​នាយក​រដ្ឋមន្ត្រី​របស់​គ​ណ​បក្ស​ដដែល​។​

​លោក​ថា ទោះជា​មាន​ការ​ជម្រុះ​ចេញ​សមាជិក​បក្ស​ខ្លះ​កាលពីពេល​ថ្មីៗ តែ​គណបក្ស​រំពឹងថា​នឹង​ឈ្នះ​បាន​កៅអី​សភា​យ៉ាងតិច​១៥០ ដោយ​កើន​ពី​១១៥​នាក់​ក្នុង​ការបោះឆ្នោត​កាលពី​ឆ្នាំ​២០១៩​។​

​ទោះជា​មាន​ការធានា​ដូច្នេះ នៅ​ថ្ងៃ​ពុធ​ទី​៩​កុម្ភៈ​នេះ អនុរដ្ឋមន្ត្រី​ខុទ្ទកាល័យ​នាយករដ្ឋមន្ត្រី ប្រា​យុទ្ធ បាន​និយាយថា​លោក​បាន​បង្កើត​គណបក្ស​ថ្មី​មួយ​ឈ្មោះថា​«​រួម​ថៃ​សាង​ជាតិ​»​ហើយ​លោក​ប្រា​យុទ្ធ​​នឹង​ត្រូវ​អញ្ជើញ​អោយ​ដឹកនាំ​គណបក្ស​នេះ បើ​គណបក្ស ផា​ឡាង ប្រា​ចា​រ៉ា​ត​(Palang Pracharat)​ដែល​ដឹកនាំ​ដោយ​ឧបនាយករដ្ឋមន្ត្រី ប្រា​វីត បន្ត​ដាក់​សម្ពាធ​លើ​លោក​ប្រា​យុទ្ធ​។​

​លោក​សេក​សា​កុល អាត​ថា​វុង​(Seksakol Atthawong)​បានបញ្ជាក់​ថា លោក​បង្កើត​គណបក្ស​នេះ​ដើម្បី​ជា​ការត្រៀម​ទុក​ក្នុងករណី ផា​ឡាង ប្រា​ចា​រ៉ា​ត មិន​ដាក់​លោក​ប្រា​យុទ្ធ ជា​បេក្ខជន​នាយក​រដ្ឋ​​មន្ត្រី​ក្នុង​ការបោះឆ្នោត​នាពេលខាងមុខ​។​

​សូមបញ្ជាក់​ថា កាលពី​ខែ​កញ្ញា​ឆ្នាំ​មុន​មាន​ការប៉ុនប៉ង​មួយ​ដើម្បី​ទម្លាក់​លោក​ប្រា​យុទ្ធ​ចេញពី​អំណាច​ក្នុងអំឡុង​ការជជែក​សួរដេញដោល​ក្នុង​សភា​តែ​លោក​បាន​រួចផុត​ពី​ការបាត់បង់​តំណែង​នៅក្នុង​បោះ​​ឆ្នោត​សម្តែង​ការ​មិន​ទុក​ចិត្ត​លោក​នា​ពេល​នោះ​។ ទោះជា​យ៉ាងណា​សម្ពាធ​នៅតែ​បន្ត​នៅក្នុង​គណបក្ស ផា​ឡាង ប្រា​ចា​រ៉ា​ត រហូតដល់​មាន​ការដេញ​ឧបនាយក​រដ្ឋមន្ត្រី​ម្នាក់ អគ្គលេខា​របស់ ផា​ឡាង ​ប្រា​ចា​រ៉ា​ត​និង​សមាជិក​សភា​២១​នាក់​ចេញពី​ក្រុមចំរុះ​កាន់អំណាច​៕