ដោយ​:​បាយ័ន​/​សៀមរាបៈ អាជ្ញាធរ​ជាតិ​អប្សរា បានឱ្យដឹងថា ក្រុម​អ្នក​បច្ចេកទេសផ្នែក​បុរាណវិទ្យា​អាជ្ញាធរ​ជាតិ​អប្សរា កំពុងដំណើរការ​ជួស​ជុល ថែទាំ ប្រាសាទលលៃ ដែល​កំពុងមាន​សភាព​ទ្រុឌទ្រោម​ប្រឈម​នឹង​គ្រោះថ្នាក់​ខ្លាំង ដោយសារ​សម្ភារៈ​សំណង់​ដែលមាន​អាយុកាល​ជាង​១.០០០​ឆ្នាំ​មកហើយ​នោះ មានការ​បែកបាក់ និង​ពុកផុយ​ច្រើន​។​

ការងារ​សំខាន់ៗ​ចំពោះមុខ​ដែល​កំពុង​យកចិត្តទុកដាក់​ធ្វើ​បច្ចុប្បន្ន​រួមមាន ជួសជុល​ពង្រឹង​រចនា​សម្ព័ន្ធ​ខ្លោងទ្វារ​ដែល​ធ្វើ​កំណាយ​ឃើញ​នៅមុខ​ប្រាសាទ​ផ្នែក​ខាងកើត ជួសជុល​ពង្រឹង​រចនា​សម្ពន្ធ​ជើង​ក្រោម​របស់​តួ​ប្រាសាទ និង​ចាប់​ផ្តើមធ្វើ​កំណាយ​យក​គំនរ​ថ្ម​ដែល​បាក់​លុប​តួ​ប្រាង្គ​និរតី​របស់​ប្រាសាទចេញ ដើម្បី​ត្រៀម​ធ្វើការ​ជួសជុល​នាពេលខាងមុខ​។

​ចំពោះ​ការងារ​ជួសជុល​តាម​ចំណុច​ដែលមាន​ហានិភ័យ និង​ការថែទាំ​ប្រាសាទ អាជ្ញាធរ​ជាតិ​អប្សរា​បាន និង​កំពុង​អនុវត្តន៍​ជាប្រចាំ មិន​ចំពោះតែ​ប្រាសាទលលៃ​មួយ​នេះ​ទេ​។​

​ប្រាសាទលលៃ​មាន​ទីតាំងនៅ​ក្នុងស្រុក​ប្រាសាទបាគង ខេត្តសៀមរាប ដែល​ទីនោះ​ជា​រាជធានី​ចំណាស់​មួយ ដែល​គេ​ហៅថា​រាជធានី​រលួស មុន​ផ្លាស់ប្តូរ​មក​តាំងនៅ​ក្នុង​រាជធានី​អង្គរ ៕​