ដោយ​:​ស​រិ​ទ្ធ​/​ភ្នំពេញ​: សណ្ឋាគារ​យីហោ «​សឹង​ប៉ាវ​ឡុង និង​ក្លឹប​កម្សាន្ត​» ស្ថិតនៅ​ផ្លូវ​៣១០ សង្កាត់​បឹង​កេងកង​ទី​៣ ខណ្ឌ​បឹង​កេងកង រាជធានី​ភ្នំពេញ ត្រូវ​កម្លាំង​កងរាជអាវុធហត្ថ​ខេត្តស្វាយរៀង សហការ​ជាមួយ​កងរាជអាវុធហត្ថ​រាជធានី​ភ្នំពេញ និង​កម្លាំង​កងរាជអាវុធហត្ថ​លើ​ផ្ទៃ​ប្រទេស បាន​ចុះ​ប្រតិបត្តិ​ការបង្ក្រាប និង​ឡោមព័ទ្ធ ដោយ​ឃាត់​ជនសង្ស័យ​ជា​ជនជាតិ​ចិន ចំនួន​ប្រាំមួយ​នាក់ កាលពី​វេលា​ម៉ោង​៤:៣០​រសៀល ថ្ងៃទី​៩ ខែកុម្ភៈ ឆ្នាំ​២០២២​។​

​កម្លាំង​សមត្ថកិច្ច កងរាជអាវុធហត្ថ​រាជធានី​ភ្ន​ពេញ បាន​ប្រើប្រាស់​រថយន្ត​ចំនួន​បី​គ្រឿង និង​មន្ត្រី​កម្លាំង​កងរាជអាវុធហត្ថ​ជាច្រើន​នាក់ ប្រដាប់​ដោយ​កាំភ្លើង​វែង​ខ្លី​គ្រប់​ដៃ បាន​ចុះ​ទៅដល់​សណ្ឋាគារ​ខាងលើនេះ និង​សម្រុក​ចូលទៅ​ខាងក្នុង​។​
​កម្លាំង​កងរាជអាវុធហត្ថ​ចុះ​ប្រតិបត្តិ​ការបង្ក្រាប​ជនសង្ស័យ​អស់​រយៈពេល​ជាង​មួយ​ម៉ោង ទើប​ឃាត់ខ្លួន​បុរស​ជនសង្ស័យ​ជា​ជនជាតិ​ចិន ចំនួន​ប្រាំមួយ​នាក់ បញ្ជូន​ទៅកាន់​ទីបញ្ជាកា​រ​កងរាជអាវុធហត្ថ​រាជធានី​ភ្នំពេញ​។​

​សូមជម្រាបថា ក្នុង​ប្រតិបត្តិការ​ចុះបង្ក្រាប​ខាងលើនេះ បើតាម​ប្រភព​ព័​ត៍​មាន​លួច​បង្ហើប​ប្រាប់ថា ជនសង្ស័យ​ដែល​កម្លាំង​ជំនាញ​ឃាត់ខ្លួន គឺពាក់ព័ន្ធ​នឹង​ករណី​ចាប់ជំរិត​ទារប្រាក់​៕