​ប្រែ​សម្រួលៈ​បំណង​(ST)៖ រដ្ឋមន្ត្រី​ការពារជាតិ​អាម៉េរិក​លោក​ឡយ អូ​ស្ទីន កាលពី​ថ្ងៃ​ពុធ​ទី​៩​កុម្ភៈ​បាន​និយាយ​ជាមួយ​សម​ភាគី កូរ៉េ​ខាងត្បូង​និង​ជប៉ុន​អំពី​ការ​គំរាម​បង្កឡើង​ដោយ​កូរ៉េខាងជើង​ក្រោយ​​ការបាញ់​កាំជ្រួច​បន្តបន្ទាប់​ដោយ​រដ្ឋាភិបាល​ក្រុង​ព្យុង​យ៉ាង​។​

​ភាព​តានតឹង​អន្តរជាតិ​បាន​និង​កំពុង​កើនឡើង​ដោយសារ​ការបាញ់​សាកល្បង​កាំជ្រួច​ជា​បន្តបន្ទាប់​របស់​កូរ៉េខាងជើង ជា​អំពើ​ដែល​ត្រូវ​ក្រុមប្រឹក្សាសន្តិសុខ​អង្គការសហប្រជាជាតិ​ហាមឃាត់​ជា​យូរ​មក​​ហើយ​។​កាលពី​ខែ​មករា ការសាកល្បង​ដូច្នេះ​កើតមាន​ច្រើន​បំផុត​គឺ​ដល់​ទៅ​៧​លើក រួម​មាន​ការបាញ់​សាកល្បង​«​កាំជ្រួច​លឿន​ជាង​សម្លេង​»​ដែល​អាច​គេច​ចេញពី​ការ​ស្ទាក់​កំទេច​។​

​អ្នកនាំពាក្យ​ក្រសួង​ការពារជាតិ​អាម៉េរិក លោក​ច​ន ឃឺ​ប៊ី (John Kirby)​បាន​និយាយ​ក្នុង​សេចក្តីថ្លែងការណ៍​មួយ​ថា «​ពួក​មេដឹកនាំ​បាន​សង្កត់ធ្ងន់​ថា ការបាញ់​កាំជ្រួច​ដោយ​កូរ៉េខាងជើង​កំពុង​ធ្វើ​​អោយ​សន្តិសុខ​តំបន់​បាត់បង់​ស្ថិរភាព​និង​ជា​ការរំលោភ​យ៉ាង​ច្បាស់ក្រឡែត​មួយ​លើ​សេចក្តីសំរេចចិត្ត​របស់​ក្រុមប្រឹក្សាសន្តិសុខ​អង្គការសហប្រជាជាតិ​»​។​

​ចំណែក​រដ្ឋមន្ត្រី​ការពារជាតិ​កូរ៉េខាងត្បូង លោក​ស៊ូ វូ​ក​(Suh Wook)​បាន​និយាយថា​ការបាញ់​បង្ហោះ​ទាំង​នេះ​បង្ក​«​ការ​គំរាម​ដោយផ្ទាល់​និង​ធ្ងន់ធ្ងរ​»​មួយ​ហើយ​បាន​ប្តេជ្ញា​ពង្រឹង​សមត្ថភាព​ឆ្លើយតប​​ឈរ​លើ​សម្ពន្ធភាព​ជាមួយ​អាម៉េរិក​។​

​រដ្ឋមន្ត្រី​ទាំង​បី​បាន​ព្រមព្រៀង​បើក​ជំនួប​ផ្ទាល់​នៅ​ពេល​អនាគត​ដ៏​ខ្លី ។​

​សូមបញ្ជាក់​ថា កាលពី​ថ្ងៃ​អង្គារ កូរ៉េ​ខាងជើង​បាន​អួតអាង​ថា ខ្លួន​ស្ថិត​ចំណោម​ប្រទេស​បួន​ប្រាំ​ក្នុង​លោក​ដែល​មាន​សព្វាវុធ​នុយក្លេអ៊ែ​រ​និង​កាំជ្រួច​ទំនើប និង​ក៏​ជា​ប្រទេស​តែមួយគត់​ដែល​ងើបឈ​រប្រ​​ឆាំង​នឹង​អាម៉េរិក​តាមរយៈ​«​អង្រួន​ពិភពលោក​»​ជាមួយនឹង​ការសាកល្បង​កាំ​ជ្រួច​។​

​របាយការណ៍​មួយ​របស់​អង្គការសហប្រជាជាតិ​បាន​និយាយថា កូរ៉េ​ខាងជើង​បាន​បន្ត​អភិ​វឌ្ឈកម្ម​វិធី​នុយក្លេអ៊ែ​រនិងកាំជ្រួច​របស់​ខ្លួន​នៅ​មួយ​ឆ្នាំ​មក​នេះ​និង​ការវាយប្រហារ​តាម​អ៊ិន​ធឺ​ណិ​ត​លើ​ការ​ដោះ​​ដូរ​រូបិយ​បណ្ណ​អេឡិចត្រូនិ​ចជា​ប្រភព​ចំណូលដ៏​សំខាន់​មួយ​សំ​រាប់រដ្ឋាភិបាល​ក្រុង​ព្យុង​យ៉ាង​៕

​ភាព​តានតឹង​អន្តរជាតិ​បាន​និង​កំពុង​កើនឡើង​ដោយសារ​ការបាញ់​សាកល្បង​កាំជ្រួច​ជា​បន្តបន្ទាប់​របស់​កូរ៉េខាងជើង​