ដោយៈ​តារា​រិ​ទ្ធ​/​ភ្នំពេញៈ​ដូច​កម្មវិធី​ដែល​បាន​គ្រោងទុក នៅ​ព្រឹក​ថ្ងៃទី ១០ ខែកុម្ភៈ​នេះ​សម្តេច​អគ្គមហាសេនាបតី​តេ​ជោ ហ៊ុន សែន​នាយករដ្ឋមន្ត្រី​នៃ​ព្រះរាជាណាចក្រ​កម្ពុជា​បាន​អញ្ជើញ​ដឹកនាំ​គណៈប្រតិភូ​ជាន់ខ្ពស់​អញ្ជើញ​ទៅ​បំពេញ​ទស្សនកិច្ច​នៅ​ប្រទេស​កូរ៉េខាងត្បូង​និង​ធ្វើជា​សហប្រធាន​កិច្ចប្រជុំ​កំពូល​សន្តិភាព​ពិភពលោក​ឆ្នាំ​២០២២ ។​កិច្ចប្រជុំ​កំពូល​នេះ ធ្វើឡើង​ក្រោម​មូលបទ​«​ឆ្ពោះទៅកាន់​សន្តិភាព​នៅ​ឧបទ្វីប​កូរ៉េ​»​។​សម្តេច​តេ​ជោ​នឹង​ធ្វើជា​សហប្រធាន​ជាមួយ​លោកស្រី​បណ្ឌិត ហាក់ ចា​ហាន់​មូ​ន (Dr. Hak Ja Han Moon ) សហ​ស្ថាបនិក​នៃ សហព័ន្ធ​សន្តិភាព​សកល (UPF) និង​លោក បាន គី​-​មូ​ន (Ban Ki-moon) អតីត​អគ្គលេខាធិការ​អង្គការសហប្រជាជាតិ​។

ប្រមុខ​រាជរដ្ឋាភិបាលអញ្ជើញ​ដឹកនាំ​គណៈប្រតិភូ​ជាន់ខ្ពស់ទៅបំពេញទស្សនកិច្ចកិច្ចនៅសាធារណរដ្ឋកូរ៉េនិង​ចូលរួម​ធ្វើជា​សហប្រធាន​កិច្ចប្រជុំ​កំពូល​សន្តិភាព​ពិភពលោក​ឆ្នាំ​២០២២(រូបថតផេកសម្តេចតេជោហ៊ុន សែន)

​កិច្ចប្រជុំ​កំពូល​សន្តិភាព​ពិភពលោក​នេះ រៀបចំឡើង​រយៈពេល​បួន ថ្ងៃ​ចាប់ពី​ថ្ងៃទី​១០ ដល់​១៣ ខែកុម្ភៈ ឆ្នាំ​២០២២ នៅ​ទីក្រុង​សេ​អ៊ូ​ល ប្រទេស​កូរ៉េខាងត្បូង ដោយមាន​ការចូលរួម​ពី​បណ្តា​វាគ្មិន​សំខាន់ៗ​និង​អ្នកចូលរួម​មកពី ១៥៧ ប្រទេស​ដើម្បី​ស្វែងរក​ក្តីសង្ឃឹម​ក្នុងការ​បង្រួបបង្រួម​ឧបទ្វីប​កូរ៉េ ប្រកបដោយ​សន្តិវិធី​។

​អញ្ជើញ​អម​សម្តេច​តេ​ជោ​នាយករដ្ឋមន្ត្រី ហ៊ុន សែន នៅក្នុង​ដំណើរ​ទស្សនកិច្ច រួមមាន​៖ លោក សួស យ៉ា​រ៉ា ប្រធាន​គណៈកម្មការ​កិច្ចការបរទេស សហប្រតិបត្តិការ​អន្តរជាតិ ឃោសនាការ និង ព័ត៌មាន​នៃ​រដ្ឋសភា និង​លោកស្រី អ៊ឹង កន្ថាផាវី រដ្ឋមន្ត្រីក្រសួង​កិច្ចការនារី ព្រមទាំង​មន្ត្រីជាន់ខ្ពស់​នៃ​រាជរដ្ឋាភិបាល និង​រដ្ឋសភា​កម្ពុ​ជាមួយ​ចំនួន​ទៀត ។​

​ប្រភព​ក្រសួងការបរទេស​បាន​បញ្ជាក់ថា នៅក្នុង​អំឡុងពេល​ស្នាក់នៅ​ទីក្រុង​សេ​អ៊ូ​ល សម្តេច​តេ​ជោ​នាយករដ្ឋមន្ត្រី នឹងមាន​ជំនួប​ជាមួយ​លោក មូ​ន ចេ​អ៊ី​ន​ប្រធានាធិបតី​កូរ៉េ​ច​ខាងត្បូង​ដើម្បី​ពិភាក្សា​អំពី​ទំនាក់ទំនង និង​កិច្ចសហប្រតិបត្តិការ​ទ្វេភាគី​រួមមាន​កិច្ចសហប្រតិបត្តិការ​លើ​វិស័យ​នយោបាយ សេដ្ឋកិច្ច និង​សង្គម​-​វប្បធម៌ និង​ធ្វើការ​ផ្លាស់ប្តូរ​ទស្សនៈ​លើ​បញ្ហា​តំបន់​និង​អន្តរជាតិ ដែលជា​កង្វល់​និង​ចំណាប់អារម្មណ៍​រួមគ្នា ។ សម្តេច​តេ​ជោ​នាយករដ្ឋមន្ត្រី​ក៏​នឹង​ទទួល​ជំនួប​សម្តែង​ការគួរ​សមពី​សំណាក់​លោក បាន គី​មូ​ន អតីត​អគ្គលេខាធិការ​នៃ​អង្គ ការ​សហប្រជាជាតិ​ផងដែរ ។ បន្ថែម​លើ​នេះ​សម្តេច​តេ​ជោ ហ៊ុន សែន រំពឹងថា​នឹងមាន​ជំនួប​ជាមួយ​ប្រមុខរដ្ឋ ប្រមុខ​រដ្ឋាភិបាល​នៃ​ប្រទេស​មួយចំនួនទៀត ក៏ដូចជា​ទទួល សវនាការ​ពី​សំណាក់​ឥស្សរជន​នយោបាយ​និង​ធុរជន​ផ្សេងទៀត​។

​ដោយឡែក​នៅ​ថ្ងៃទី ១២ ខែកុម្ភៈ​កិច្ចប្រជុំ​កំពូល​សន្តិភាព​ពិភពលោក នឹង​ប្រគល់​ជា​ផ្លូវការ​នូវ​ពានរង្វាន់​សន្តិភាព «​ស៊ុន​ហាក់​» លើក​ទី​៥​ជូន​ដល់​សម្តេច​តេ​ជោ ហ៊ុន សែន នាយករដ្ឋមន្ត្រី​កម្ពុជា​សម្រាប់​ភាពជា​អ្នកដឹកនាំ​ដ៏​ខ្ជាប់ខ្ជួន​របស់​សម្តេច​ក្នុង​រយៈពេល​ជាច្រើន​ឆ្នាំ​មកនេះ​ក្នុងនាម​ជា​នាយករដ្ឋមន្ត្រី នៃ ព្រះរាជានាចក្រ​កម្ពុជា ដែល​បានរួម​ចំណែក​ដល់​ស្ថិរភាព ការអភិវឌ្ឍ​សេដ្ឋកិច្ច និង សន្តិភាព​នៅ​កម្ពុជា​និង​តំបន់​អាស៊ីអាគ្នេយ៍​ទាំងមូល ។

​បើតាម ឯកសារ ដែល ផ្ដល់ ដោយ​SUNHAK Peace Prize បាន បញ្ជាក់ថា​សម្តេច​តេ​ជោ​នាយក រដ្ឋមន្ត្រី ហ៊ុន សែន បាននិងកំពុង ជំរុញ កិច្ចសហប្រតិបត្តិការ អន្តរជាតិ​ដើម្បី សន្តិភាព​ដោយបាន ចូលរួម យ៉ាងសកម្ម នៅក្នុង វេទិកា សន្តិភាព អន្តរជាតិ​និង គំនិត ផ្តួចផ្តើម សន្តិភាព​រួមទាំង កម្មវិធី ដែល រៀបចំ ដោយ សហព័ន្ធ សន្តិភាព សកល (UPF) ហើយ ជាពិសេស បានបង្ហាញ ពី ភាពជា អ្នកដឹកនាំ ឆ្នើម​សម្រាប់​ការអភិវឌ្ឍ ប្រកបដោយ ចីរភាព នៅ អាស៊ីអាគ្នេយ៍ ។​ជាពិសេស សម្រាប់ សម្តេច នាយករដ្ឋមន្ត្រី​បាន ធ្វើជា​សហប្រធាន នៃ “ កិច្ចប្រជុំ កំពូល ស្តីពី សន្តិភាព នៅ ឧបទ្វីប កូរ៉េ ” ស្របតាម គម្រោង សន្តិភាព កូរ៉េ តែមួយ ដែលជា ដំណើរការ សន្តិភាព ថ្មី នៅលើ ឧបទ្វីប កូរ៉េ ហើយ ដែល ស្នើឡើង ដោយ លោកស្រី បណ្ឌិត ហាក់​ចា ហាន់​មូ​ន ។​

​ទន្ទឹមនឹង​ដំណើរ​ទស្សនកិច្ច​នេះ មាន​ប្រជាពលរដ្ឋ សិស្ស​និស្សិត ដែល​កំពុង​រស់នៅ សិក្សា និង​ធ្វើការ​នៅ​សាធារណរដ្ឋ​កូរ៉េ បានប្រកាស​ស្វាគមន៍​វត្តមាន​សម្តេច​តេ​ជោ ហ៊ុន សែន ។ តាមរយៈ​ឃ្លី​ប​វីដេអូ​ដែល​ប្រជាពលរដ្ឋ សិស្ស​និស្សិត ដែល​កំពុង​រស់នៅ សិក្សា និង​ធ្វើការ​នៅ​សាធារណរដ្ឋ​កូរ៉េ បាន​បង្ហោះ​ជា​បន្តបន្ទាប់ បានបញ្ជាក់​ដូចៗ​គ្នា​ថា​៖ សូម​ស្វាគមន៍​វត្តមាន​ដ៏​ខ្ពង់ខ្ពស់​របស់ សម្តេច​តេ​ជោ ហ៊ុន សែន នាយករដ្ឋមន្ត្រី នៃ​ព្រះរាជាណាចក្រ​កម្ពុជា ដែល​នឹង​អញ្ជើញ​មកដល់​សាធារណរដ្ឋ​កូរ៉េ នៅ​ថ្ងៃទី​១០ ខែកុម្ភៈ ខាងមុខនេះ ដើម្បី​ទទួល​ពានរង្វាន់​សន្តិភាព​ស៊ុន​ហាក់ នៃ​អំឡុងពេល​កិច្ចប្រជុំ​កំពូល​ពិភពលោក និង​ធ្វើជា​សហប្រធាន​នៃ​កិច្ចប្រជុំ​ដ៏​សំខាន់ នៅ​សាធារណរដ្ឋ​កូរ៉េ​៕​សរន​

ប្រមុខ​រាជរដ្ឋាភិបាលអញ្ជើញ​ដឹកនាំ​គណៈប្រតិភូ​ជាន់ខ្ពស់ទៅបំពេញទស្សនកិច្ចកិច្ចនៅសាធារណរដ្ឋកូរ៉េនិង​ចូលរួម​ធ្វើជា​សហប្រធាន​កិច្ចប្រជុំ​កំពូល​សន្តិភាព​ពិភពលោក​ឆ្នាំ​២០២២(រូបថតផេកសម្តេចតេជោហ៊ុន សែន)