ប្រែ​សម្រួលៈ​បំណង​(​ដេល្លី​ម៉េល​)៖​រុស្ស៊ី​បាន​ព្រមព្រៀង​លើ​កិច្ចសន្យា​ផ្គត់ផ្គង់​ហ្គាស​អោយ​ចិន​រយៈពេល​៣០​ឆ្នាំ​តាម​បំពង់​បង្ហូរ​ថ្មី​មួយ ហើយ​នឹង​ទូរ​ទាត់​ការលក់​ជា​ប្រាក់​អឺរ៉ូ ។​វា​ជា​ការពង្រឹង​សម្ពន្ធភាព​ថាមពល​​មួយ​ជាមួយ​រដ្ឋាភិបាល​ក្រុង​ប៉េកាំង​ចំពេល​ទំនាក់ទំនង​របស់​រុស្ស៊ី​ជាមួយ​លោកខាងលិច​ដោយសា​រ​បញ្ហា​អ៊ុ​យក្រែ​ន​និង​បញ្ហា​ដទៃ​ទៀត​កាន់តែ​យ៉ាប់យ៉ឺន​ឡើង​។​

​ក្រុមហ៊ុនហ្កា​ស​ប្រូម​(Gazprom)​ដែល​គ្រប់គ្រង​ផ្តាច់មុខ​ខាង​នាំចេញ​ហ្គាស​តាម​បំពង់​បង្ហូរ បាន​យល់ព្រម​ផ្គត់ផ្គង់​អោយ​ក្រុមហ៊ុន​ថាមពល​ចិន​CNPC​នូវ​ហ្គាស​១០​ពាន់​លាន​ម៉ែត្រគូប​ក្នុង​មួយ​ឆ្នាំ​តាម​បំ​​ពង់​បង្ហូរ​ដែល​ភ្ជាប់​តំបន់​ចុង​បូព៌ា​របស់​រុស្ស៊ី​ទៅ​ប្រទេស​ចិន ។​វា​ត្រូវ​គេ​រំពឹងថា​នឹង​ចាប់ផ្តើម​នៅ​ពីរ​ទៅ​បី​ឆ្នាំ​ខាងមុខ​។​

​តាមពិត​រុស្ស៊ី​បាន​បញ្ជូន​ហ្គាស​ទៅអោយ​ចិន​តាម​បំពង់​បង្ហូរផោ​វើ អូ​ហ្វ ស៊ី​ប៊ឺ​រី​(Power of Siberia)​របស់​ខ្លួន​នៅ​ឆ្នាំ​២០១៩​។​វា​បាន​នាំចេញ​ហ្គាស​១៦,៥​ពាន់​លាន​ម៉ែត្រគូប​ទៅកាន់​ចិន​នៅ​ឆ្នាំ​២០២១​។​

​សូមបញ្ជាក់​ថា បណ្តាញ​បំពង់​បង្ហូរ Power of Siberia​មិន​ជាប់​គ្នា​ជាមួយនឹង​បំពង់​បង្ហូរ​ហ្គាស​រុស្ស៊ី​ទៅ​អឺរ៉ុប​ទេ​។​

​នៅក្រោម​ផែនការ​ពីមុន រុស្ស៊ី​មានបំណង​ផ្គត់ផ្គង់​ហ្គាស​អោយ​ចិន​៣៨​ពាន់​លាន​ម៉ែត្រគូប​តាម​បំពង់​បង្ហូរ​នេះ​នៅ​យ៉ាងយូរ​ត្រឹម​ឆ្នាំ​២០២៥​។​

​កិច្ចព្រមព្រៀង​ដែល​ត្រូវ​បាន​សំរេច​ឡើង​ចំពេល​ប្រធានាធិបតី​រុស្ស៊ី​ធ្វើ​ទស្សនកិច្ច​ចិន​កាលពី​ដើមខែ​កុម្ភៈ​ដើម្បី​ចូលរួម​បើក​កីឡា​អូឡាំពិក​រដូវរងា​ក្រុង​ប៉េកាំង ។​

​ក្រុមហ៊ុន​Gazprom​ផ្តល់​ព័ត៌មាន​ពិស្តារ​តិចតួច​អំពី​កិច្ចព្រមព្រៀង​នេះ តែ​ប្រភព​ចិន​មួយ​បាន​និយាយថា ហ្គាស​របស់​រុស្ស៊ី​មក​ពី​កោះ​សាខា​លីន​(Sakhalin)​នឹង​ត្រូវ​បញ្ជូន​តាម​បំពង់​បង្ហូរ​កាត់​សមុទ្រ​​ជប៉ុន​ទៅ​កាន់​ខេត្ត​ហេ​ឡុង​ជាំ​ង​(Heilongjiang )​ភាគ​ឦសាន​របស់​ចិន និង​ឈាន​ដល់​១០​ពាន់​លាន​ម៉ែត្រគូប​នៅត្រឹម​ឆ្នាំ​២០២៦​និង​ការ​ទូរ​ទាត់​គិត​ជា​ប្រាក់​អឺរ៉ូ ស្របតាម​កិច្ចខិតខំ​របស់​ប្រទេស​ទាំង​​ពីរ​ដើម្បី​ងាក​ចេញពី​ការប្រើ​ប្រាក់​ដុល្លារ​។​

​ការពិភាក្សា​រវាង​ក្រុមហ៊ុន​ទាំងពីរ​បាន​ចាប់ផ្តើម​ប៉ុន្មាន​ឆ្នាំ​មកហើយ​ក្រោយ​ការ​ចាប់ដំណើរការ​បំពង់​បង្ហូរ​ហ្គាស​Power of Siberia​ប្រវែង​៤.០០០​គីឡូម៉ែត្រ​ដើម្បី​បញ្ជូន​ហ្គាស​ទៅ​ចិន​។​កិច្ចពិភាក្សា​​កាន់តែ​បង្កើនល្បឿន​បន្ទាប់​ពី​រដ្ឋាភិបាល​ក្រុង​ប៉េកាំង​កំណត់​យក​ឆ្នាំ​២០៦០​ជា​ឆ្នាំ​បញ្ចេញ​ឧស្ម័ន​កាបូនិច​សូន្យ​មានន័យថា​កាត់ប​ន្ថ​យ​ការប្រើ​ធ្យូង​ថ្ម​ស្ទើរ​ទាំងស្រុង​។​ការខ្វះ​ធ្យូងថ្ម​របស់​ចិន​កាលពី​ឆ្នាំមុន​​វា​កាន់តែ​រំលេច​អោយឃើញថា ហ្គាស​(​ឧស្ម័ន​ធម្មជាតិ​)​មាន​តំលៃ​ពិសេស​ហើយ​ជំរុញ​បង្កើត​កិច្ចព្រមព្រៀង​ថ្មី​៕

​កិច្ចព្រមព្រៀង​ដែល​ត្រូវ​បាន​សំរេច​ឡើង​ចំពេល​ប្រធានាធិបតី​រុស្ស៊ី ជួប​ប្រធានាធិបតី​ចិន​ក្នុងអំឡុងពេល​លោក​ធ្វើ​ទស្សនកិច្ច​ចិន​កាលពីដើម​ខែ​កុម្ភៈ​ដើម្បី​ចូលរួម​បើក​កីឡា​អូឡាំពិក​រដូវរងា​ក្រុង​​ប៉េកាំង​