​ប្រែ​សម្រួល : កញ្ញា​ដា​លី​ស (​ដេលី​មែ​ល​) ៖ ក្រុមហ៊ុន Ford និង​Toyota​បាន​និយាយ​កាលពី​ថ្ងៃ​ពុធ​ទី​៩​កុម្ភៈ​ថា​ពួកគេ​បាន​ផ្អាក​ផលិតកម្ម​មួយ​ចំនួន​ខណៈ​ក្រុមអ្នកតវ៉ា​ប្រឆាំង​ការចាក់​វ៉ាក់សាំង​​ការ​ត​ព្វ​កិច្ច​បាន​បិទ​ច្រកព្រំដែន​អាម៉េរិក​-​កាណាដា ដែល​ញ៉ាំង​ឱ្យ​មាន​ការព្រមាន​ពី​ទីក្រុង​វ៉ាស៊ីនតោន​និង​អូ​តា​វ៉ា​អំពី​ការខូចខាត​សេដ្ឋកិច្ច​។​

​បណ្តា​ប្រទេស​លោកខាងលិច ដែល​ហត់នឿយ​នឹង​ជំងឺ​រាតត្បាត នឹង​កត់សម្គាល់​ការ​រឹតបន្តឹង​ទប់ស្កាត់​កូវី​ដរយៈពេល​ពីរ​ឆ្នាំ​ក្នុងពេល​ឆាប់ៗ​នេះ​ខណៈ​ដែល​ការតវ៉ា​យក​ស្ទីល​បិទផ្លូវ​ដោយ​ឡាន​ដឹក​​ទំនិញ​ធំៗ​ដូច​នៅ​កាណាដា​បាន​រីក​រាលដាល​ដល់​ប្រទេស​អូស្ត្រាលី នូវែ​លសេ​ឡង់ និង​បារាំង ដោយហេតុ​ថា​ឥឡូវនេះ​មេរោគ​អូ​មី​ក្រុង​ចាប់ផ្តើម​ធូរស្រាល​នៅ​កន្លែង​ខ្លះ​។​

​ការតវ៉ា​ដែល​មាន​ការ​ចុច​ស៊ី​ផ្លេ​តម្លង់ បាន​បង្ក​ឱ្យ​មាន​ការ​បិទ​ផ្លូវ​នៅក្នុង​រដ្ឋធានី​អូ​តា​វ៉ា​ចាប់តាំងពី​ចុង​ខែ​មករា ហើយ​ចាប់ពី​យប់​ថ្ងៃ​ចន្ទ​មក​អ្នក​ដឹក​ទំនិញ​បាន​បិទ​ចរាចរណ៍​ចូល​ប្រទេស​កាណាដា​​នៅ​ឯ​ស្ពាន​ឯកអគ្គរដ្ឋទូត (Ambassador Bridge)​ដែល​ជា​ផ្លូវ​ផ្គត់ផ្គង់​សម្រាប់​ក្រុមហ៊ុន​ផលិត​រថយន្ត​និង​ផលិតផល​កសិកម្ម​របស់​ទីក្រុង​ដេ​ត្រយ (Detroit)​។​

​ឥឡូវនេះ ក្រុមហ៊ុន​ផលិត​រថយន្ត​មួយចំនួន​បាន​រង​ផល​ប៉ះពាល់​ដោយ​ការរំខាន​នៅ​ជិត​ទីក្រុង​ដេ​ត្រ​យ ដែល​ជា​បេះដូង​នៃ​វិស័យ​រថយន្ត​ជា​ប្រវត្តិសាស្ត្រ​របស់​សហរដ្ឋ​អាម៉េរិក​ប៉ុន្តែ​មាន​កត្តា​ផ្សេង​ទៀត​ផង​​ដែរ ដូចជា​អាកាសធាតុ​ធ្ងន់ធ្ងរ និង​ការខ្វះខាត​បន្ទះ​ឈីប​។​

Toyota ដែល​លក់ដាច់​បំផុត​នៅ​សហរដ្ឋ​អាម៉េរិក បាន​និយាយថា ខ្លួន​មិន​រំពឹង​ផលិត​រថយន្ត​នៅ​ទីតាំង​នៅ​ខេត្ត​អុង​តា​រី​អូ (Ontario) របស់​ខ្លួន​សម្រាប់​រយៈ​ពេល​សេសសល់​នៃ​សប្តាហ៍​នេះ​ទេ​។​​ទិន្នផល​ត្រូវបាន​បញ្ឈប់​នៅ​រោងចក្រ​ផលិត​ម៉ាស៊ីន​របស់ Ford និង ក្រុមហ៊ុន​ផលិត​រថយន្ត Chrysler-Stellantis ក៏​ត្រូវ​បាន​រំខាន​ផងដែរ​។​

​ច្រក​ព្រំដែន​មួយ​ផ្សេង​ទៀត​នៅក្នុង​ខេត្ត​អាល់បឺថា (Alberta) ត្រូវ​បាន​បិទ​ក្នុងទិសដៅ​ទាំងពីរ​ចាប់តាំងពី​ល្ងាច​ថ្ងៃ​អង្គារ​។​

​សូមបញ្ជាក់​ថា ជាង​ពីរ​ភាគ​បី​នៃ​ទំនិញ​ដែល​ជួញដូរ​តម្លៃ ៥១១ ពាន់​លាន​ដុល្លារ​អាម៉េរិក​ជា​រៀងរាល់​ឆ្នាំ​រវាង​កាណាដា​និង​សហរដ្ឋ​អាម៉េរិក​ត្រូវបាន​ដឹកជញ្ជូន​តាម​ផ្លូវគោក​៕

​ឡាន​ដឹក​ទំនិញ​ធំៗ​របស់​អ្នក​តវ៉ា​កាណាដា​កំពុង​បិទ​ច្រក​ព្រំដែន​រវាង​កាណាដា​និង​អាម៉េរិក​