ដោយៈ សុវណ្ណ​កុម្ភៈ / ភ្នំពេញៈ សហព័ន្ធ​កីឡាបាល់ទាត់​កម្ពុជា បានធ្វើ​ការព្រមាន ជា​សាធារណៈ ចំពោះ​ក្លិប សមាគម មន្ត្រី និង​កីឡាករ ដែលជា​សមាជិក របស់​សហព័ន្ធ កីឡាបាល់ទាត់​កម្ពុជា មិន​ឲ្យ​ធ្វើ​សកម្ម​ភា្ន​ល់ និង​ការផ្សព្វផ្សាយ អាជីវកម្ម ល្បែងភ្នាល់ គ្រប់​ប្រភេទ ទាំង​ក្នុង និង​ក្រៅប្រទេស ។​

​ក្នុង​លិខិត​មួយ ដែល​ចុះហត្ថលេខា ដោយ​លោក កែវ សារ៉េត អគ្គលេខាធិការ សហព័ន្ធ កីឡាបាល់ទាត់​កម្ពុជា បានបញ្ជាក់​ថាៈ នាពេល​បច្ចុប្បន្ន សហព័ន្ធ កីឡាបាល់ទាត់​កម្ពុជា បាន​សង្កេតឃើញថា សកម្មភាព​អាជីវកម្ម​ល្បែងភ្នាល់ តាម​ម៉ាស៊ីន​អេឡិចត្រូនិក និង​តាមរយៈ​អ៊ី​ន​ធឺ​ណេ​ត អន​ឡាញ (Internet Online) ក្នុង​និង​ក្រៅប្រទេស បាននិងកំពុង​តែ​រីកដុះដាល​ខ្លាំង​។ សកម្មភាព​ធ្វើ​អាជីវកម្ម ល្បែងភ្នាល់​ទាំងនេះ ក៏មាន​ក្លិប សមាគម មន្ត្រី និង កីឡាបាល់ទាត់​មួយចំនួន បាន​ចូលរួម​សកម្មភាព​ភ្នាល់ និង​ធ្វើជា​អ្នក តំណាង ផ្សព្វផ្សាយ​ឲ្យ​អាជីវកម្ម ល្បែងភ្នាល់​ទាំងនោះ​។​

​បន្ទាប់ពី​បាន​ពិនិត្យឃើញ មាន​ក្លិប សមាគម មន្ត្រី កីឡាករ មួយចំនួន បានធ្វើ​សកម្មភាព ភ្នាល់ និង​ផ្សព្វផ្សាយ​អាជីវកម្ម​ល្បែងភ្នាល់​តាមរយៈ អ៊ី​ន​ធឺ​ណេ​ត អន​ឡាញ និង​យោងតាម ស្មារតី​អង្គប្រជុំ គណៈកម្មការ​ជំនាញ​មក ទង្វើ​របស់​ក្លិប សមាគម មន្ត្រី កីឡាករ ដែល​ធ្វើ​សកម្មភាព​ភ្នាល់ និង ផ្សព្វផ្សាយ ឲ្យ​អាជីវកម្ម​ភ្នាល់​ទាំងនោះ គឺ​មិន​ត្រឹមត្រូវ​ទេ ។​

​លេខាធិការដ្ឋាន សហព័ន្ធ​កីឡាបាល់ទាត់​កម្ពុជា បាន​ពិនិត្យឃើញថា ទង្វើ របស់​ក្លិប សមាគម មន្ត្រី កីឡាករ គឺ​ផ្ទុយស្រឡះ​ពី​លក្ខន្តិកៈ សហព័ន្ធ​កីឡា បាល់ទាត់ និង FIFA code of Ethics ផ្ទុយ​ពី​ច្បាប់​របស់ ព្រះរាជាណាចក្រ​កម្ពុជា និង​សារាចរ​របស់ រាជរដ្ឋាភិបាល ស្ដីពី​ការពង្រឹង​ការគ្រប់គ្រង​អាជីវកម្ម ល្បែងភ្នាល់ តាម​ម៉ាស៊ីន​អេឡិចត្រូនិក និង​តាមរយៈ​អ៊ី​ន​ធឺ​ណេ​ត អន​ឡាញ ក្នុង និង​ក្រៅប្រទេស គ្រប់​ប្រភេទ និង​គ្រប់​រូបភាព នៅ​ព្រះរាជាណាចក្រ​កម្ពុជា និង​សេចក្ដីប្រកាស​ពត៌មាន របស់​និយ័ត​ករ របស់​ទូរគមនាគមន៍​កម្ពុជា ។​

​សហព័ន្ធ​កីឡាបាល់ទាត់​កម្ពុជា ប្រកាស​ព្រមាន ចំពោះ​សមាគម ក្លិប មន្ត្រី និង​កីឡាករ ដែល​ស្ថិត​ជា​សមាជិក សហព័ន្ធ​កីឡាបាល់ទាត់​កម្ពុជា មិន​អនុញ្ញាត ឲ្យ​ធ្វើ​ទង្វើ​ទាំងអស់ នេះ បាន​ទៀត​ទេ​។ នរណា នៅតែ​បន្ត នឹងត្រូវ​ទទួល ការពិន័យ ៕/V​-PC