ដោយ​: កាំ​ពី / ក្រចេះ​÷ នៅ​រសៀល​ថ្ងៃទី​៩ ខែកុម្ភៈ ឆ្នាំ​២០២២​នេះ ខ័​ណ្ឌ​រដ្ឋបាល ជលផល​ខេត្តក្រចេះ បាន​បញ្ជូន​ជនសង្ស័យ ចំនួន​ពីរ​នាក់ ទៅកាន់​សាលាដំបូង ខេត្តក្រចេះ​។

​រដ្ឋបាល​ជលផល បាន​សហការ​ជាមួយ​ក្រុម​ឆ្មាំ​ទន្លេ សហគមន៍​នេសាទ​កោះ​ផ្ដៅ និង​កម្លាំង​នគរបាល​ស្រុក​សំបូរ បាន​បង្ក្រាប​បទល្មើស​ឆក់​ត្រី ក្នុង​ទន្លេមេគង្គ ដោយបាន​ឃាត់ខ្លួន​ជនសង្ស័យ ចំនួន​ពីរ​នាក់ និង​វត្ថុតាង នៅ​ចំណុច​ភូមិ អំពិល​ទឹក ឃុំ​កំពង់ចាម ស្រុក​សំបូរ ខេត្តក្រចេះ កាលពី​យប់ ថ្ងៃទី​៨ ខែកុម្ភៈ ឆ្នាំ​២០២២ នេះ​។​

​លោក ម៉ុក ពន្លក នាយ​ខ័​ណ្ឌ​រដ្ឋបាល​ជលផល​ក្រចេះ បានបញ្ជាក់​ឱ្យដឹងថាៈ កម្លាំងចម្រុះ បាន​ចុះ​ល្បាត ត្រួតពិនិត្យ​ចាប់ពី​កន្ទុយ​កោះ​ដំឡូង ឡើង​ទៅលើ ហើយក៍​ជួបប្រទះ បទល្មើស​ឆក់​ត្រី មួយ​ករណី ហើយ​កម្លាំង​សមត្ថកិច្ច ក៍បាន​ដេញ​បង្ក្រាប ដោយ​ចាប់បាន ជនសង្ស័យ ដែលជា​មុខសញ្ញា​ឆក់​ត្រី ចំនួន​ពីរ​នាក់ ដោយ​ប្រើប្រាស់​ទូក ចំនួន​ពីរ​គ្រឿង អាំង​វែ​រ​ទ័​រ ប្រភេទ​ឆក់​ស្រូប ចំនួន​១ អាគុយ​៧០​អំពែរ​មួយ ក​ន្ទ្រ​ក​ដងត្រី​មួយ និង​មាន​ត្រី មួយចំនួន ជា​វត្ថុតាង​ផងដែរ​។​

​លោក​បាន​បន្តទៀតថាៈ ជនសង្ស័យ​ទាំងពីរ​នាក់ និង​វត្ថុតាង​ខាងលើ ត្រូវបាន​មន្ត្រី​ជំនាញ របស់លោក បាន​កសាង​សំណុំរឿង បញ្ជូន​ខ្លួន​ទៅ កាន់​សាលាដំបូង ខេត្តក្រចេះ នៅ​រសៀល​ថ្ងៃទី​៩ ខែកុម្ភៈ ឆ្នាំ​២០២២​នេះ ដើម្បី​ចាត់ការ​តាម​នីតិវិធី​ច្បាប់​៕/V-PC