ដោយៈ គង់​ហេង / កំពង់ចាមៈ ប្តី​ប្រពន្ធ នៃ​គ្រួសារ​មួយ បានសម្រេច​ចិត្ត បោះបង់ចោល មុខរបរ​ចិញ្ចឹមសត្វ​មាន់ ហើយ​បាន​ងាក​ចាប់យក មុខរបរ​ចិញ្ចឹម សត្វ​ចង្រិត ដែល​ទទួល ការបណ្តុះបណ្តាល បង្រៀន​តាម ប្រព័ន្ធ​អន​ឡាញ​វិញ ក្នុងកំឡុងពេល ការឆ្លង​រាលដាល ជំងឺ​កូ​វីដ ១៩​។​

​ជា​លទ្ធផល មួយឆ្នាំ បាន​កន្លងផុតទៅ គឺ​បានទទួល​ទិន្នផល ប្រសើរ​ជាង​ការ ចិញ្ចឹម​មាន់​។ ប៉ុន្តែ​ការប្តូរ​មុខរបរ ពី​កសិកម្ម ទៅ​មុខរបរ​កសិកម្ម ដដែល​របស់ កសិករ​ប្តី​ប្រពន្ធ​មួយគូ ដែល មាន​កសិដ្ឋាន​ចិញ្ចឹម​ចង្រិត សម្រាប់​លក់​ជា​ចង្រិត រស់ និង​ជា​ពង ដែល​ស្ថិត​ក្នុងភូមិ កោះ​រកា​ក្នុង ឃុំ​កោះ​រកា ស្រុក​កំពង់សៀម​នេះ គឺ​នៅតែ​ជួប​បញ្ហា ប្រឈម​នឹង​ជំងឺ​ម្តងម្កាល នៅពេល​សត្វ​ចង្រិត ដុះស្លាប​ពាក់ អាវកាក់ អាយុ​ចន្លោះ ២៧ ទៅ ៣០ ថ្ងៃ បាន​ឆ្លង និង​ងា​ប់ត​គ្នា អស់​ពេញ​កសិដ្ឋាន គឺ​អត់​មាន​វិធី​ព្យាបាល ក្រៅពី​ចាប់​ប្រមូល​ដុត​កម្ទេចចោល ទាំង​សម្បុក ហើយ​ចាប់​ជ្រើសរើស​ពូជ​ថ្មី មក​ចិញ្ចឹម​បន្ត​។​

​ជុំវិញ​បញ្ហា​ជំងឺ​លើស​ត្វ​ចង្រិត​នេះ អ្នក​ចិញ្ចឹម បាន​សាកសួរ​ព័ត៌មាន តាម​ប្រព័ន្ធ សង្គម ពី​អ្នក​ចិញ្ចឹមសត្វ មួយ​ប្រភេទ​នេះ រួចហើយ គឺ​នៅតែ​គ្មាន​វិធី​ព្យាបាល និង​ទប់ស្កាត់ ជំងឺ​នេះ​ដដែល​។ ដូច្នេះ​ពួកគាត់ សូម​ស្នើ​ដល់​មន្ត្រី​ជំនាញ ជួយ​បង្រៀន​ពី​ការព្យាបាល​ជំងឺ និង​វិធី​ទប់ស្កាត់​លើស​ត្វ​ចង្រិត​នេះ ដើម្បី​ជៀសវាង​ការខាតបង់​ច្រើន​បែបនេះ​។​

​ស្ត្រី​វ័យ ៣៤ ឆ្នាំ ឈ្មោះ ហួរ វួ​ច​ឡែ​ន ជា​ម្ចាស់​កសិដ្ឋាន​ចិញ្ចឹមសត្វ​ចង្រិត នៅ​ទីតាំង ខាងលើ បាន​ប្រាប់ឱ្យដឹង នៅ​ថ្ងៃទី ៩ កុម្ភៈ​ថាៈ អ្នកស្រី និង​ស្វាមី វ័យ ៣៥ ឆ្នាំឈ្មោះ អុល សំអន បាន​រៀន​ចិញ្ចឹមសត្វ​ចង្រិត តាម​អន​ឡាញ ពី​លោកគ្រូ នៅ​ខេត្តតាកែវ​។ ក្រោយពី ចេះ​វិធី​ចិញ្ចឹម ក៏បាន​ចាប់ផ្តើម បង្កើត​មុខរបរ ចិញ្ចឹម​ចង្រិត ជាមួយ​ដើមទុន​ចំនួន ៥០ ម៉ឺន​រៀល​។​

​ម្ចាស់​កសិដ្ឋាន​រូបនេះ បានឱ្យដឹង​ទៀតថាៈ ក្នុងនោះ​អ្នកស្រី និង​ប្តី បាន​ជ្រើស រើស​ទិញ​ពូជ ចង្រិត​ខ្នាតតូច ពីរ​ប្រភេទ ក្រហម និង​ប៉ា​រ៉ា មក​ចិញ្ចឹម​រយៈពេល​ជាង ៣០ ថ្ងៃ​ទៅ ៥០ ថ្ងៃ គឺ​បាន​ប្រមូល​ផល ដោយ​ក្នុង​មួយ​អាង ទំហំ ១,២ ម៉ែត្រ គុណ​នឹង ២,៤០ ម៉ែត្រ បាន​ចំនួន ពី ១៥ ទៅ ២០​គីឡូក្រាម ចង្រិត ចំនួន ១៨ អាង និង​ក្នុង​មួយខែ​ចាប់ ឬ​ប្រ​មួល​ផល​ចំនួន ពីរ លើក សរុប​ប្រមាណ ១០០ គីឡូក្រាម​។​

​អ្នកស្រី វួ​ច​ឡែ​ន បាន​បន្ថែមថាៈ ការចិញ្ចឹម​ចង្រិត រយៈពេល​មួយឆ្នាំ មកនេះ ក្រៅពី​លក់ ជា​ចង្រិត​រស់ មួយ​គីឡូក្រាម តម្លៃ ១៧.០០០ រៀល អ្នកស្រី ក៏​លក់​ជា​ពង​ចង្រិត ដល់​អ្នក​ចិញ្ចឹម​ដូចគ្នា មួយកញ្ចប់ សម្រាប់​មួយ​អាង​តម្លៃ ៦០.០០០ រៀល ដែល​អតិថិជន បាន​ទូរស័ព្ទ​មក​សួរ ហើយ​មក​ទិញ ដល់​កសិដ្ឋាន គឺមាន​លក្ខណៈ​ល្អប្រសើរ ជាង​ការ ចិញ្ចឹម​មាន់​ស្រែ ដែល​អ្នកស្រី និង​ប្តី បាន​ចិញ្ចឹម​ច្រើន​ខែ នាពេល​កន្លងមក​នោះ​។​

​អ្នកស្រី បាន​បន្តថាៈ ប៉ុន្តែ​ទោះជា​យ៉ាងណា ការចិញ្ចឹម​ចង្រិត នៅ​ជួប​បញ្ហា ប្រឈម​នឹង​ជំងឺ ម្តងម្កាល​ដែរ ដោយ​ការចិញ្ចឹម មួយឆ្នាំ​មកនេះ បាន​ជួបនឹង ជំងឺ​ម្យ៉ាង ធ្វើឱ្យ​សត្វ​ចង្រិត មាន​អាយុ​ចន្លោះ​ពី ២៧ ទៅ ៣០ ថ្ងៃ កំពុង​ដុះស្លាប ពាក់អាវ​កាក់ មិន​ស៊ី​ចំណី និង​មិន​ផឹកទឹក ហើយ​ពោះ​របស់​វា មាន​សភាព​ពណ៌​ខ្មៅ រួច​ក៏​ឆ្លង​ត​គ្នា ពី​អាង​មួយ ទៅ​អាង​មួយ ពេញ​កសិដ្ឋាន​ទាំងមូល​។ អ្នកស្រី បាន​សាកសួរ​ពី​វិធី​ព្យាបាល និង​ទប់ស្កាត់ ជំងឺ​នេះ ក្នុង​បណ្តាញ​សង្គម អ្នក​ចិញ្ចឹម​ចង្រិត ដូចគ្នា ទូទាំងប្រទេស គឺ​គ្មាន​មធ្យោបាយ ណា​ផ្សេង ក្រៅពី​ប្រមូល​ចង្រិត និង​សម្បុក ដុត​កម្ទេចចោល ហើយ​ចាប់​ជ្រើសរើស​ពូជ ចិញ្ចឹម​សារជាថ្មី​ឡើងវិញ​។​

​ទាក់ទិន​នឹង​ជំងឺ លើ​សត្វ​ចង្រិត​ចិញ្ចឹម​នេះ លោក កាតំ​ម សូ​ណាវ​ណ្ណ អនុប្រធាន មន្ទីរ កសិកម្ម រុក្ខាប្រមាញ់ និង​នេសាទ ខេត្តកំពង់ចាម បាន​ប្រាប់ឱ្យដឹង នៅ​ថ្ងៃទី ១០ កុម្ភៈ នេះ​ថាៈ យើង​នៅ​ពុំទាន់​មាន វិធី​ព្យាបាល ប្រភេទ​ជំងឺ​ជា​បាក់តេរី លើ​សត្វ​ចង្រិត​ចិញ្ចឹម​នេះ នៅឡើយ​ទេ​។ ប៉ុន្តែ​យើង​មាន​វិធី​ទប់ស្កាត់ មួយចំនួន ដូចជា ទីតាំង​កន្លែង​ចិញ្ចឹម ចាំបាច់​ត្រូវមាន​លក្ខណៈ​ទូលាយ ការផ្តល់​ចំណី ជៀសវាង​ជម្រក មាន​សំណើម​។ ដោយ​បង្កើត​បរិយាកាស ចេញចូល ឱ្យបាន​ល្អ ពោលគឺ ជៀសវាង​បរិយាកាស​អាប់អួរ​។​

​លោក​អនុប្រធាន មន្ទីរ​កសិកម្ម រុក្ខាប្រមាញ់ និង​នេសាទ​ខេត្ត បានឱ្យដឹង​ទៀតថាៈ អ្នក​ចិញ្ចឹម​ចង្រិត ត្រូវ​ប្រើប្រាស់​ពន្លឺ​អំពូល​ភ្លើង ពណ៌​ក្រហម ឱ្យបាន​ច្រើន ដោយ​មិនត្រូវ​ប្រើ អំពូល​ភ្លើង ដែលមាន​ពន្លឺ​ពណ៌​ស ឡើយ​។ ព្រោះ​ជំងឺ​ជា បាក់តេរី​នេះ ឆ្លង​លឿន​តែ ១២ ម៉ោង ធ្វើឱ្យ​សត្វ​ចង្រិត ងាប់​អស់ ជាពិសេស ឧស្សាហ៍ ផ្លាស់ប្តូរ​សម្បុក និង​ទីតាំង​កន្លែង រស់នៅ​របស់​វា (​សត្វ​ចង្រិត​) ចំពោះ​ប្រភេទ​ចង្រិតដូង មួយ ម៉ែត្រការ៉េ ផ្ទុក​មិន​លើស ពី​ចំនួន ៣៥ ក្បាល​ឡើយ​។​

​សូមបញ្ជាក់ថា ជុំវិញ​ប្រជាពលរដ្ឋ ចិញ្ចឹម​ចង្រិត​នេះ គឺ​នៅ​ពុំទាន់​មាន​ប្រភព​ណា បញ្ជាក់​ពី​ចំនួន កសិដ្ឋាន អ្នក​ចិញ្ចឹមសត្វ​នេះ នៅឡើយ​ទេ នៅ​ខេត្តកំពង់ចាម ប៉ុន្តែ​សម្រាប់ នៅក្នុង​ឃុំ​កោះ​រកា ស្រុក​កំពង់សៀម តាម​ការ​ប្រាប់ឱ្យដឹង របស់​អ្នកស្រី ហួរ វួ​ច​ឡែ​ន មាន​កន្លែង​ចិញ្ចឹមសត្វ​ចង្រិត​ចំនួន បី កន្លែង​៕/V​-PC